Hato yn dang ioh kam lyngba ka Syllabus kaba Rim?

Ka jinglamphang:

Ka jingkyrduh kam ka long kawei na ki jingsyrtok kiba khraw tam kiba ki khun samla ki iakynduh ha kine ki sngi kiba mynta. Kane ka ktah lang ia kito kiba lah don ka kyrdan pule ba halor ne kiba ym don ruh kumjuh. Ka jingkiew jong ka roi ka par ryngkat bad ka technology ka la wanrah ia ka jing kylla ha ka rukom treikam ban kamai kajih ha ka ri. Ka jingpyndonkam da ki bor technology ha ki bynta baroh jong ki kam pynroi ka pynpeit mat ia baroh ba lymda ngi pynkylla noh ia ka rukom wad jingnang jingstad, ki khun ki kti jong ngi kin nang mad shuh ia ka jingjynjar ban trei ban ktah bad kamai jakpoh ha ki snem kiban dang wan. Ka rukom treikam ha ka pyrthei mynta ka donkam da ki briew kiba don ym tang ia ka kyrdan pule hynrei khamtam eh ia ka jingtbit (skill).Pynban kata kaba ngi ong ka skill kumba long mynta hi ka dang duna haduh katta katta ha ki khun samla wad kam. Ka daw ka long namar ba ka rukom ai jinghikai ha ki jaka pule naduh ba ki khynnah ki dang rit ka lam ia ki ba kin tip ym eh ban nang shaphang ka subject. Bun bah na ki khynnah bad samla hadien ba ki la dep ia ka jingpule kin hap ban pynlut biang  ia ka por bad pisa ruh kumjuh ban pyntbit shuh shuh lyngba ki training bad skill development programme khnang ba kin ioh kam ioh jam. Na ka bynta kito kiba ym ioh lad ban leh kumne kine ki shu iai apply kam kat shaba iohsngew bad kynrup ia kano kano kat kaba ioh. Ngi ju iohsngew ba bun na ki khynnah samla kiba la don kyrdan pule (degree) bunjait hynrei ki iaid khlem kam khlem jam.

[pullquote align=”left” cite=”” link=”” color=”” class=”” size=””]Bunsien ngi dang hap ban ap ia ki briew kiba nabar ban pyntrei wat ia ki kam kum ban niad rong, ne tah tiles ne plaster kynroh iing ne shna sad ne shna motor tan um, ne ring lait, ne repair mobile bad computer [/pullquote]

Ka jingmir jingmut:

Ka jingpynrung skul ia baroh ki khynnah kiba  hapoh 14 snem ka long kaba donkam haduh katta katta. Ha kajuh ka por kan nang wanrah ruh kham bun shuh shuh ki khynnah ha ki kyrdan pule ba halor, kata sha ka secondary, graduate bad post graduate level. Kumne man ka snem ngin nang iohi ia ka jingkiew jong ki khynnah ba la dep jingpule ka ban wanrah ruh ryngkat ia ka jingjyllei  jong ki samla nongwad kam kiba ngi khot ia ki kiba la nang la stad. Kumba long mynta hi ka jinghiran ban ioh kam ka la ishyrkhei shisha ym tang namar ba ka sorkar kam lah ai kam shuh hynrei khamtam eh namar ba kito baroh kiba la pynlut por bad pisa ruh ban pule kot kim ioh pat ia ka jingtbit (skill) ban seng, ban sdang bad ban pyniaid ia ki kam ki jam katkum ka jingdonkam ka juk mynta. Hooid don ki scheme sorkar ba kyrpang na bynta ki samla ba wad kam hynrei ban trei ia ki donkam ruh ban don ka jingtbit (skill) khnang ban ym pynsep ei ia ki. Te kumne ngi iohi ba kat nang mih ki snem nang bun ruh ki nong ap kam  kiba hap ha ka kynhun ‘unemployable educated class’ lane ka kynhun jong kiba la don ka kyrdan pule hynrei ki bym lah ban pyniaid iew ia kane ka jingpule jong ki.

La dei shisha ka por ba la hap ban pyrkhat ban pynkylla noh ia ka syllabus na kaba rim sha kaba thymmai da kaba thep khleh lang ha ka ia ki rukom hikai ba la tip ha ha ktien phareng kum ka ‘Elementary, Vocational and Training (EVT)’. Lyngba kane ia ki subject skul naduh ka high school level yn hikai ruh ia ki jait jingtrei bapher bapher ryngkat bad ki training kiba lah ban plie lad ia ki khynnah skul ym tang ban nang ban tip hynrei khamtam ban pynshai ia ki sha kano ka lain kin pynkhreh ban ioh pyntbit bad ban pynlong ka lad kamai jakpoh hadien habud. Lyngba ki jinghikai thymmai lehse ki jingmyntoi kiba kongsan eh ki long ba (a) ki khynnah kin ioh ia ki kam kiba lah ban tyrwa sha ki lane wat ba kin sdang kam sdang jam da lade hi katkum ka jingtbit jong ki (address the need for skilled hands),  (b) yn lah ban pyniaid iew noh ia ka jinghikai kaba ki la ioh (improve employability) bad (c) yn lah ban pynduh pyndam noh shisyndon ia ka jingsngew ne niew poh (stereotyping) haba trei ia ki kam kiba ym dei ki kam sorkar.

Khyndiat ngi lah ban pynkynmaw hangne ba ka ri China ka kylla long ka ri kaba pawkhmat eh ha kaba pynmih ia ki jait tiar ba har rukom na ka bynta ki jingdonkam ba bun jait kiba pyndonkam da ki briew man la sngi . Kum kine ki jait tiar la die ha kylleng kylleng ki iew jong ka pyrthei satlak kaba la kyntiew ruh syndon ia ka ri China sha ka kyrdan kaba ha khmat eh ha ka pyrthei ha ka liang jong ka jingriew spah jong ka. Lehse ngi dang hap ia wad bniah (research) la kane ka long ne em na ka daw ba ka ri China ka la sdang pynrung ia ka vocational course naduh ka school level.

Ngi shem ba kumba long mynta hi ha ka jylla jong ngi, ngi dang donkam shibun bah ki briew kiba lah ban trei ia ki kam ba rit ba ni. Bunsien ngi dang hap ban ap ia ki briew kiba nabar ban pyntrei wat ia ki kam kum ban niad rong, ne tah tiles ne plaster kynroh ing ne shna sad ne shna motor tan um, ne ring lait, ne repair mobile bad computer khlem pat iakren ia kiwei pat ki kam kiba ngi dang iai ap nabar kum kito kiba ngi ong ha ka ktien phareng ki kam manufacturing, processing bad services. Lada ngi ioh ban pyntreikam ia ka EVT lehse ngin lah ruh ban wanrah ia ka jingshemphang shaphang kiei kita ki jait jingpule kiba iahap bad ki kam kiba ngi lah ban sdang kat kum ki ki jingdon jingem (resources) hapoh ka State. Kane kan ialam lynti ia kiba bun ki khynnah ba kin tur shaphrang ban nang wad jingtip bad pyntbit shuh ha ki lain bapher bapher la ka long ha ka agri business, consumer products business, home economics bad wat ha ki lain ba iadei bad ka management, engineering, healthcare, finance, economics, commerce, law, information technology bad kiwei kiwei. Kum kane ka rukom pule kan iarap shibun eh ban pynduh jait syndon ia ka jinghiran ban ioh kam ioh jam khamtam ia kito baroh kiba la pyntbit ia lade.

Kawei pat ka bynta kaba donkam eh ka long shaphang ka jingpyntbit ia ki nonghikai ha ki subject bapher bapher. Ka jingtbit jong ki nonghikai ka shong eh ha ka jingpynkhreh ia ki lyngba ki training bad ki ‘learning by doing exercise’ kumba ong ha ka ktien phareng khnang ba kin ioh lad ban pyntbit ia lade shuwa ban hikai ia kiwei. Namar ka jingkylla stet jong ka technology donkam ban pynlong khah khah ia ki training na ka bynta ki nonghikai. Ym tang katta, donkam ia ka rukom pynrung kam nonghikai kaba pyrkhing bha. Donkam ia ki kyndon kiba paka ba ki nong apply kam nonghikai ki dei ban don. Na ka bynta ki vocational course sngewdei eh ban kynthup ia ka jingtbit ha ki technology ba iadei bad ka kam ba la apply ryngkat ruh bad ka experience ha ki factory (real time factory and plant exposure). Ha kajuh ka por ka long kaba kongsan tam ban ai ha kum kine ki nonghikai ia ka tulop kaba kor ryngkat bad ki allowance namar ki jaka pule khamtam ki khynnah pule kim dei ban duh noh ia ki jinghikai bad ruh ban lait na ka jinglehnohei ha ka jingpyntrei kam ia ka EVT.

Ka jingpynkut:

Ym lah ban len ba ka don shisha ka jingkyrduh kam kaba shykhei hapdeng ki khynnah samla ha ka ri. Lah pat ban iohi ba ki kam ki kyrhai hynrei ym don nongtrei ba tbit ban trei ia ki (skills-mismatch). Kane lehse ka long na ka daw jong ka jing bym iahap hapdeng ka kam bad ka degree, diploma bad certificate kiba ki khun samla ki ioh na ki skul, college bad university. La sngew kyrkieh shisha ban pynmih ia ki khun samla kiba tbit khnang ban iohi ia ka jingkylla ha ka rukom trei kam trei jam ha ka State jong ngi khnang ban kiew irat ka longbriew manbriew ruh kumjuh.  Ka constitution jong ka ri ka pynkup bor ia ka State ban pynurlong ban pynioh ia ki nongshongshnong baroh ia ka jingnang, jingtbit bad ki lad ioh kam ioh jam (education, skills and job creation). Ka jingpynthymmai ia ka rukom pule kaba ia hap dur bad kane ka juk ka long shisha ka kam kaba eh namar ba ka jinglut ka jingsep ka long kaba bun. Lehse lah ban oh dor na ki nongshah hikai hynrei ia kane yn ym lah ban leh salonsar namar dang don bun bah ki khynnah pule kiba wan na ki ing kiba duk tasam khamtam na ki thain nongkyndong kiba donkam pynban ia ki lad jingiarap kum ka subsidy, free tuition, scholarship, stipend, sponsorship bad kumta ter ter. Hynrei namar ka jingdonkam jong ka por, la sngewdei ban mang pisa kham bun lyngba ki plan outlay ban pynkhreh thymmai ia ka lawei jong ki khynnah bad kumjuh ban kyrshan ia ki ba kin ioh ia ki jing nang jingtbit kiba paka ym ba kin kylla long tang ki nong wad kam wad jam hynrei khamtam eh ba kin iaid lynti sha ka jing sdang kam sdang jam bad nangta pat shaduh ba kin da lah ban  ai kam kylla ia kiwei.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Sara Lyndem Written by:

Sara Lyndem works for SIRD, Meghalaya

Be First to Comment

Leave a Reply