Ka Lamphrang Halor ka article 371 da ka RAIOT
Kumno ban synshar hi katkum ka tynrai ne thymmei sainpyrkhat bad ban iada bad kyntiew ia ka Jaidbynriew? Kane ka long ka jingkylli kaba ngi la iatai bad iakhih-iaksaid naduh ka snem 1924 ter ter haduh 1947 bad ruh hadien ba ka Ri India ka la ioh ka jinglaitluid, kane ka jingkylli ka iai buddien bad ka jingiakhih-iaksaid ka iai im. Hapdeng kine ki por la pynjari ia ka Sixth Schedule bad thaw ia District Council ha ka snem 1952 bad bud sa ka Jylla ba pura (Meghalaya)ha ka snem 1972. Kine baroh ki jialong da ka jingthmu ban ailad ia ki Trai Ri ban san ban roi katkum ka thymmei sainpyrkhat ne tynrai bad khamtam eh ban iada ia ka riti dustur, ka ktien, ka khyndew ka shyiap bad kiwei de ki bynta kiba iasnoh bad ka tynrai long jaidbynriew. Mynta ka jingkylli ka mih kano ka bynta ha ka Riti Synshar ka Ri India kaba lah ban ai ia ka bor ban synshar bad pyniaid laitluid katkum ka thymmei sainpyrkhat ne ka riti dustur bad ban iada ia ka Ri bad ka Jaidbynriew? Don kiba iakhun ban ioh syndon da ka Jinglaitluid na ka Ri India? Kiwei pat ki dawa ban pynim biang ia ka Instrument of Accession? Hateng hateng ka sur ka sawa ruh ba dei ban pynrung ia ka Ri Hynniewtrep hapoh ka Article 370 kumba long ka Jammu & Kashmir? Don ruh ka jingpyrta ban ioh la ka jong ka Jylla? Ka District Council lyngba ka bor ba la ai ha ka Sixth Schedule ka la treikam mynta la palat hynriew phew snem bad sawphew lai tylli ki snem ki la iaid naduh ba la ioh ia ka Jylla ba pura. Hapoh ka Sixth Schedule bad ka Jylla ba pura, haduh katno ngi lah ne ngi la lah ban synshar hi bad ban iada bad kyntiew ia ka Bri ne Jaidbynriew? bad nangne shano ngin iaid? Mynta kumne la don sa kawei pat ka jingdawa ban pynrung ne pynioh ia ka Jylla katkum ki kyndon jong ka Article 371 ka Riti Synshar ka Ri India.Ka jingiatai halor kane ka mat ka dang iaid bad ka raiot ka wanlam shaphi ia ki ar tylli ki jingthoh kiba iapher kawei na kawei pat halor ka Article 371.
Jingkynthoh Halor Ka Article 371 – Bindo M. Lanong
Haba nga la pule ia katei ka phang kaba la mih ha ki kot khubor ha kine ki sngi, ba la thoh da i Bah Ardent M.Basaiawmoit, Vice President HSPDP,nga sngew ban kynthoh bad bynrap de katto kattne,ban kham shai ki nongpule. Ka ri India baiar, kaba dei kata ka ri Synshar Laitluid(Sovereign-Socialist-Secular-Democratic Republic), ka ri ka baheh bad kaba bun briew bha ha pyrthei, mar ia kumjuh bad ka China, ka don ruh ka riti synshar baheh tam eh ha pyrthei, kaba ngi tip kum ka Constitution of India(COI), kaba don haduh 395 tylli ki Article. Namar ba ka Sorkar India ka hap ban pynhun ia ki jingdawa bashongnia jong ki jaitbynriew bapher-bapher kiba dei lut ki nong India jong ka, kumta ka Sorkar ka hap ban pynkylla na ka por sha ka por ia kane ka Constitution. Ban bsut thymmai ia ki jingdonkam babun jait, ka Sorkar India namar kata ka hap ban pynbeit (amend) ia ka COI, sa ban dap shispah sien.
Ia katei ka Art. 371, la pynbeit da ka Sorkar India, na ka por sha ka por, na ka bynta ki jylla ba la kdew kyrteng harum na ka bynta ki daw bapher, kawei na kawei pat. Ban kdew lyngkot katba lah, ia ka Art 371 ba la don naduh basdang (original) ka kdew ia ka bor kyrpang na ka bynta ka jylla Maharashtra bad Gujarat, ban thaw ia la kijong ki Development Board, ha kaba ia ki jingtrei jong ki, dei ban phah bad buh hakhmat ki Dorbar jylla man la u snem.
La wanrah pat ia ka Art 371-A bad Art 371-G na ka bynta ka Nagaland bad Mizoram, kaba kdew shai ba ka Sorkar India kan ym donbor halor ki riti-dustur, ki rukom im bad ki niam ki rukom jong ki,ia ki jingbishar ain katkum ki riti-dustur jong ki, ia ka jinglong trai ia ka khyndew bad ki spah mariang bad kum kine. Bud ka Art 371-B, kaba iadei bad ka jylla Assam, kaba ai bor ban thaw ia ka Committee jong ki MLA na ki rilum Assam, kynthup ia ki MLA na North Cachar Hills District bad Karbi Anglong District ba kin pyrkhat bad ai jingmut ia ki jingdonkam bakyrpang jong ki. Ka Art 371-C pat ka ai lad kyrpang ban peit ia ka jingdonkam ki rilum (hill areas)ka Manipur. Nangta ka Art 371-D, ka buh kyrpang ban ailad ia ki jait bynriew bapher kiba don hapoh ka jylla Andhra, ba kin ia ioh bynta lang ia ki kam ki jam, ka pule-puthi bad kiwei ki hok. La pynbeit ruh sa ia ka Art 371-E, na ka bynta ka jylla Andhra hi ba kan don la ka University lajong.
Ka Art 371-F pat ka ailad ia ka jylla Sikkim ba kan ioh ia ka bor trei kam bakyrpang naduh ia ka Dorbar Thaw Ain ka Jylla, ia u Lat ka jylla bad ia ka Sorkar Sikkim, katkum ki kyndon iateh hapdeng ka Sorkar India bad ki nongsynshar ka Sikkim laitluid, shuwa ba kan wan ban long ka bynta jong ka ri India ha u snem 1974. Nangta ka Art-371-H ka kdew ia ka jingpynkup bor bakyrpang ia u Lat ka jylla Arunachal bad ia u President ka ri India, halor ki kam kiba iadei bad ki kam iakhih huri-hura, ka suk-ka sain bad kiwei kiba ktah ia ka jylla Arunachal. Kaba khatduh ka dei ka Art 371, ia kaba la pynkylla sha ka Art 371-I na ka bynta ka Goa, lyngba ka 56th Amendment jong ka COI, 1987, kaba la kdew ba ka Dorbar Thaw Ain Goa, kan don 30 ngut ki dkhot MLA.
Ki Autonomous District Council (ADC)
Ka jylla Meghalaya kaba sdang kum ka jylla bapura naduh u snem 1972, ka la don lypa ki Autonomous District Council, kiba don shibun ki bor kiba la kdew hapoh ka Sixth Schedule, kiba kynthup ia ki bor peit bad pyniaid ryntih ia ki Hima ki Sima, ki Dorbar Raid, Dorbar Shnong, ki riti-dustur ka jaitbynriew, ki bynta ha ka khyndew ka shyiap, ki bynta ha ki mar poh khyndew, ki kyndon khaii da ki khyllah jait ki kam bishar ain kashari, ha ki kam khlaw bad bun kiwei kiwei, ba la buh kyrpang ha ka para 3(1), a,b,c ter ter haduh j.
Ka Sorkar jylla ruh ka don la ki jong ki ain khyndew, ain khlaw, ain mar poh khyndew bad kiwei kiba don jingiadei bad ki bor ki ADC, ia kiba ka Sorkar jylla ha ki khep ki khep ka ju kwah ban don da ki ain jong ka, kum ka jingknieh noh ia ka Primary Education ba dei hok jong ki ADC.
Ki kynrum-kynram hapoh ka jylla mynta ki mih namar ka Sorkar jylla ka kwah ban knieh noh sa ia ka kam pyniaid ia ki Hima, ki Raid bad ki Dorbar Shnong ruh, kiba la don bad ki ADC naduh ba la seng ia ki. Ia kane la leh da ka Sorkar Jylla hapoh ka para 12 A jong ka 6th Schedule.
Ki ADC ki long kiba donkam bha ban don, ym kumba kren da katto katne kibym sngewthuh ia ka jingdonkam jong ki. Bun ki jylla ha ri India kiba kwah ADC.
Lada don ki ADC ki bym trei kam bha, kam mut ba donkam ban pynduh noh ia ki, hynrei ban pynbeit ne weng noh ia kita kiba pyniaid kulmar. Kumba long ha Garo Hills mynta bad hawei hawei ruh, ki CEM, ki EM kiba shong shuki ki bamsap pyllein-pyllein hynrei ka Sorkar jong ki ka iada ia ki bad ka leh kum bym tip ei-ei.
Kumjuh ha Jaintia Hills, khamtam ha ki khyndiat por ba la leit, haba u CEM barim ula bam klop da ka klur tyngka. Tip balei ka Sorkar u Dr. Mukul Sangma kam ju leh ei-ei ia kine ki kam palat pud, kiba mih ter shi ter, ki jait pa ki jait?
Ka jylla Meghalaya bad ki ADC ki don ki bor kiba la biang bha ban pynlong ia ka jylla kaba paw ha bun ki liang jong ka roi-ka par. Ka Nagaland bad Mizoram kim don ki lad bad ki bor trei kam haba ianujor bad ka Meghalaya. Ki lai tylli ki District Council ka Mizoram, Chakma, Lai bad Mara ADC, kim pat long ei-ei ruh hakhmat ki ADC jong ngi. Ka Nagaland lei kam don ADC. High Court ruh kim pat don kumba don ma ngi.
Kaei Ka Para 12-A?
Ka paragraph 12-A kaba don hapoh ka 6th Schedule ka kdew ia ka jing iatyngkhuh, ba lada jia ba ka ADC ka thaw ia kano kano ka ain jong ka halor ki bor ba la kdew hapoh ka para 3(1), lane hapoh ka para 8 bad 10 jong katei ka 6th Schedule, ia kiba lada ka Sorkar jylla ruh ka thaw hi halor ki juh ki ain, kaba pynmih ia ka jingiatyngkhuh bad jingiapher jingmut hapdeng ki ar-bor, kaei kaba thaw na ka liang ka Sorkar Jylla kan ieng .
Kum kane ka rukom buh ia ka nongrim trei kam ka don ruh hapoh ka Art 254 jong ka COI, ba lada mih kino kino ki jingiatyngkhuh kiba iadei bad kajuh ka mat, hapdeng ka Sorkar India bad kino kino ki Sorkar Jylla, kan ieng ka ain jong ka Sorkar India.
Hynrei nga kwah ban kynthoh khyndiat halor kane ka bynta, ba lada ka jing pynibor hapdeng ki ar-bor ka poi shaduh ki Kashari, ki Kashari barabor ki pynshong nongrim ban bishar halor ka ‘Justification’ ( ka jing shongnia) jong ka jingleh, da kaba poi ruh sha ka jingpynshong nia halor ki riti ‘Pith and Substance’ bad kiwei de ki riti bishar, da kaba peit bniah, halor ka nia, ka hok, ka jingshisha, ka nongrim, ki noh sha kano ka liang. Halor kitei ki nongrim, ki Kashari ki pynieng ia ki rai jong ki.
Ki paidbah ki kwah ban tip kiei pat kita ki bor kiba ka HSPDP ka dang kwah bad ialeh ban pynioh, nalor kitei ba la kdew lyngkot haneng? Ki bor ka Sorkar Jylla, 66 tylli ki la don lypa hapoh ka State List, khlem ia kren ia ki 47 tylli kiba ka Sorkar Jylla bad Sorkar India ki iadon bynta lang hapoh ka Concurrent List, katkum ka jingmang ka COI. Ka Sorkar India pat ka don haduh 97 tylli ki bor hapoh ka Union List.
Ka jingiasyllok para rangbah, namarkata hateng-hateng ka long kaba donkam, haba iapyrkhat ia ki kam ka Ri bad jong u paidbah, namar ia ki kam babha, ngi dei ban ia ai kti lang, khamtam ha ki por jingtynjuh kumba long mynta.
Click hangne ia ka jingbatai jong i Bah Ardent Basaiawmoit halor ka Article 371
Be First to Comment