Ka JingiaTUR ban ioh Ki kam ki jam, Ka kamai ja kpoh bad ki hok nongtrei nongbylla ba pura

Ki Nongtrei-nongbylla ki kynthup ia baroh kiba treikam ne bylla ha ki ophis sorkar, ki dukan, ki karkhana, ki nonghikai skul, kolej ne university haba ki dei jong ka Sorkar ne riewshimet ruh kumjuh, ki nongthoh khubor, ki nongrep, ki nongbylla sngi, ki nongtrei kynta, ki nong niah kali, ki nongap dukan ne pahara Iing (Private Security Guard), ki misteri, ki nongkit nong, ki nongtih marpoh khyndew, bad kiwei kiwei de kiba shakri bad kiba im kyndoi jakpoh na kti ha shyntur kynthup ia ki ba im sngi na ka NREGS. Ha kane ka juk kaba mynta kaba khwan myntoi bad ba lah shilliang, ki don sa kiwei pat ki rukom aikam bylla, kiba tip kum ki “contract system” ne ki kam ba shipor ba ai ki riewshimet, company bad sorkar ruh kumjuh.

Ha ka jingshisha Ki Nongtrei-Nongbylla ki dei u budlum jong ka ioh ka kot, ka khaii-pateng bad ki noh synniang shibun sha ka roi ka par jong ka Ri. Hynrei ki dang shah niewbein bad shah khnoit bein na baroh ki liang bad la pynkylla mraw ia ki. Bunsien ka por bylla ka long kaba jrong bad ka bym iahap dor bad ka jingioh bainong bad ki sngi shongthait sngi shuti ruh lah shah knieh noh khamtam haba kidei ki kam contract bad kam private. Ym don jing burom ia ki hok nongbylla ba iadei bad ka koit ka khiah, ka jing kyrshan ia ka pule puthi ki khun, ki hok jong ki nongtrei kynthei haka kha ba pun bad ki hok ban ioh jingiada na ki jingshah leh bein bad beain ha ki jaka trei. Wat ia ka jingsiew bai bylla ruh bun sien pynslem bad ym ju pynkiew wat hadien ki phew snem ruh.

Kine ki jingeh bad kiwei de kiba ki nongtrei-nongbylla ki mad man la ka sngi ki dei ban pynkhih bad pynlong ia ki ban ieng joit bad iawanlang ha kawei ka kynhun na ka bynta ban iada ialade bad ban dawa ia la ki jong ki hok. Katba nangiaid ki por ka jingshah thombor ki nongtrei-nongbylla ka la nangjur hynrei sngwsih ba ha ka jylla Meghalaya, lait noh na katto katne ki seng kiba la don lypa, ym pat don kano kano ka jingpyrshang ban lum lang ia ki Nongtrei-Nongbylla hapoh kawei ka kynhun ban iakhun tyngeh na ka bynta ki hok ki jong ki. Shuh shuh, kumba 50 na ka 100 ki samla ha ka jylla kim don kam don jam ne ka kamai kajih kaba thikna bad kane ka dei ka jingeh kaba khraw tam. Ki Nongsynshar ki kular bad pynbna ban pynmih lad ioh kam ia ki samla pynban kine ki shu kut tang ha ki jingkular. Ki jait kam ba pynmih ruh bun ki long ki jaitkam kiba tang shipor (Contract basis) kiba plie lad ia ka jingshim kabu, jingbanbein bad kaba pynshong syier ia ki rangli-ki juki.

Para Nongtrei-Nongbylla ka por ka dawa ia ngi ban ia buh jingkylli, ban iatai bniah bad ban dawa ia ki hok jong ngi kum ki Nongtrei-Nongbylla bad ban iada ialade na ka jingshah khnoit bein ha ki bor kiba khein dew thala ia ka jingim bad jingshakri jong ngi. Ngi don ka hok ban im ka jingim ba pura bad ba dap kyrhai, ka jingim kaba shngain, kaba suk ba thikna, kaba koit ba khiah, kaba biang ka ja ka doh, ka umbam umdih, ka ba biang ki lad ban pynang pynstad ia ki khun ki kti bad ka hok ban ieng pyrshah ia ki bor kiba thombor bad khnoit bein ia ngi.

Kumta ki jing dawa ba donkam bad ba ngi tyrwa kum ki nongrim jong ka rynsan iakhun ki long kumne harum:

  1. Ka bai bylla sngi la dei ban pynkiew ba kan ym duna ia ka Rs. 320 (Unskilled) bad 450 (Skilled) ha ka shi sngi, namar ha meghalaya haba khein bniah ia ki jinglut jingsep baroh kynthup ia ka bai bam bai dih, bai wai iing, bai jain bai nep, bai skul/kolej, bai leit bai wan, ki jinglut na ka bynta ka koit ka khiah kumta ter ter, ia ka longiing ba don kumba 5 dkhot ha kaba 2 ngut ki bylla kumba 6 sngi shi taiew, tang ban shu lah im ruh la kumno kumno donkam kumba Rs. 15,297 ha ka shi bnai. Ia kane ka dor, ka sorkar ka dei ban peitbniah ba ka iahap bad ka jingkiew dor ki mar ki mata bad ka dei ban long ym tang ka dor ba duna tam ban lah im (minimum wage) hynrei ka Living Wage. Ka “Living wage” ka dei ka bainong kaba kyrshan ia ka longiing longsem ban im ka jingim kaba don burom ha kaba ki dkhot jong ka iing kin ioh ki jingbam kiba tei, ka jingkoit jingkhiah, ka jingnang jingstad, ka iing shong iingsah, ka jainkup jain sem bad kumta ter ter. Ka Iing bishar ba ha khlieh tam jong ka ri India (Supreme Court) ka lah batai shai ba ka bai bylla kam dei ban duna ia ka dor bai sngi ba la pynbna da ka sorkar ne ka minimum wage bad ki nongaikam kim dei ban pynduna ia kane ka bai bylla da lei lei ruh. Ki ba jingpynkhein ia kane ka hukum yn pynngat ha ka Ain kaba khang pyrshah ia ka jingpyntrei mraw (forced labour) ia ki briew.
  1. Dei ban don ki soskular ba thikna hapdeng ki nongaikam bad nongtrei-nongbylla. Ka dulir soskular ka dei ban long kaba shai bad ka bym lah shilliang. Dei ban batai shai ia ki kamram baroh, ka jingkhia-jingshon jong ka kam, ka bai bylla, ki sngi shuti, ki kynta trei kam, ki jingkyrshan ki nongaikam ha ki por ba pang ba shitom, ki kyndon rukom iapynbeit haba mih jingkulmar bad jingeh ha ka kam, bad kumta ter ter. Ka soskular ka dei ban long katkum ki kyndon ain Nongbylla (labour laws), Ka ain Riti Synshar jong ka Ri India (Constitution) bad ki ain ba iadei bad ki hok Longbriew Manbriew ba la bat kylleng pyrthei (Human Rights).
  1. Ki nongtrei-nongbylla ki dei ki briew kiba treikam bad noh synniang shibun sha ka ioh ka kot bad ym lah ban pyniapher ia ki. Ha kajuh ka por ki don ia ka hok ban im ka jingim kaba pura bad ban ioh iala ki hok longbriew manbriew. Ka Article 23 (2) jong ka Universal Declaration of Human Rights 1948, ka mana pyrshah ia kino kino ki jingiapher hapdeng ki nongbylla bad khamtam eh ban pyniapher ia ka dor bai bylla katkum ki kam ba ki trei. Ka jingsiew ka dei ban ia ryngkat hapdeng shynrang bad kynthei ruh kumjuh.
  1. Dei ban pyntreikam thikna ia ki kyndon ain ba iadei bad ki hok nontrei nongbylla ha ka por ba pun ba kha (Maternity Benefit Act) bad kane ka dei ban kynthup ruh ia ki kynthei kiba don ha ki kam ba shipor (contract) khamtam kiba trei hapoh ki scheme sorkar bapher bapher bad ruh ia ki nongtrei bylla ha ki jaka kiba hap hapoh ka Factories Act bad ka Shop and Establishment Act.
  1. Ki kynta trei kam ki dei ban long 8 (kynta) shisngi. Haba trei tam dei ban ioh ka jingsiew ia kine ki kynta ba tam (overtime). Lada hap kit bad bah kham palat ban ia kaei kaba lah dep iapynbeit, ki nongaikam ki dei ban siew dor tam katkum ka jingkhia jong ka kam. Kane ka kynthup ia ki nongtrei shipor lane ‘contract workers’ ruh kumjuh. Dei ban don ruh ka jingnoh synniang na ki nongaikam sha ki jingkynshew na bynta ki nongtrei kum ka PF, ESI bad Gratuity. Dei ban don ruh ki insurance na ka bynta ka koit ka khiah bad ki jingsiew na ka bynta ka por ban shong thait na ka kam (Pension).
  2. Ki nongtrei bylla contract hadien ba treikam lynter kumba 240 sngi ei ei dei ban pynklla “tenure workers” bad ym dei shuh ban khein ia ki kum ki nongbylla ba shipor. Dei ruh ban ithuh noh ia kita ki ‘honorarium workers’ ba la trei da ki phew snem kum ki nongtrei ba pura.
  1. Ka State Reservation Policy ka Jylla Meghalaya ka dei ban treikam ha baroh ki jaitkam naduh ki kam sorkar (Central bad state Govt.), ha ki dukan, ki company, ki kharkhana la kidei jong ka sorkar ne ki riewshimet bad ruh ha ki project bad Consultancies ne ki kynhun kiba treikam ban ai buit ne ai jingmut ia ki tnat treikam ka Sorkar khamtam eh ki kam pynroi.
  2. Dei ban pyntrei shisyndon ia ka 3% reservation policy na bynta kito kiba don ki jingduna ha ka bor met bor pyrkhat katkum ba la bthah ha ka Disability Act.
  1. Baroh ki nongbylla ha Meghalaya ki dei ban ioh ki hok longbriew manbriew . Ki nongbylla Trai Jylla bad ki nongbylla bar Jylla ruh kumjuh kiba wan shipor ban treikam ki dei ban ioh ka jingsiew ba lah ban pynioh iaki ia ka jingim ba donburom (Life of dignity) ha kaba biang ka umbam umdih, ka jaka sah, ka koit ka khiah bad ban im ha ka jingshngain. Ki dei ban ioh ka jingiada na ka jingshah thombor ha ki nongiakam ne kiwei pat. Baroh ki nongbylla ki dei ban trei ha ki jaka kiba shngain bad kino kino kiba thombor ia ki, dei ban pynshitom katkum ka ain.
  1. Ki nongaikam, kum ki kontraktor bad kiwei kiba pynkhein ia ki ain nongbylla bad ia ki hok jong ki nongbylla, dei ban knieh noh shisyndon ia ka license jong ki bad dei ban pynsangeh bad pyndam syndon ia ki kam/contract ba ki ioh na ka sorkar.
  1. Dei ban don ka jaka bishar ka bym noh shiliang ka ban bishar bad ai ki rai ia ki nongpynkhein ia ki Ain Nongbylla.
  1. Dei ban thung ka Labour Commission kaba laitluid bad kaba khlain ka ban khmih bad peit pyrman ia ka jingpyntreikam ia ki Ain Nongbylla da ka Sorkar ne ki Riewshimet. Kane ka Commission ka dei ban kynthup kham bun ki Nongbylla, ki Nongsaid Ain bad ki riewpawkhnmat ha ka imlang sahlang.

KA RUKOM THUNGKAM KA SORKAR BAD KI HOK KI SAMLA WAD KAM

  1. Ha baroh ki kam sorkar, kynthup ia ki projek ba kyrshan bad bei tyngka ka sorkar ne kito ha kaba ki riewshimet ki shimti ban ia trei ryngkat bad ka sorkar (public private partnership), ka rukom thung kam ka dei ban long kaba shai, kaba khuid bad ka bym don ka jingbamsap, jingleh tuh ne jing shah shilliang khmat.
  1. Dei ban kdew shai ia ka jinglait kam bad ki jaitkam bad baroh ki eksamin thungkam ba la pynbeit pynbiang da ka sorkar Meghalaya dei ban:a. Pyntip lypa ha ka por ba biang lyngba ki kyrwoh bad ki lad pathai khubor (advertisement) ia ka tarik, por bad rukom long ki eksamin thungkam, khnang ba ki nongwad kam kin lah ban pyndep ia la ki kamram.b. Ia ki result dei ban pynbna hapoh ka por ba biang ym ban pynslem bad dei ruh ban pynbna paidbah ia ki lyngba ki kot khubor, Internet bad kumta ter ter.
  2. Ki jubab eksamin (answer script) jong ki nongialeh eksamin bad ia ka jubab eksamin kaba dei ne model answer script dei ban buh ha ki jaka paidbah khnang ban shai bad iatip lang baroh. Ia ka personal interview dei ban ring video bad paidbah ha ka internet bad kiwei de ki lad khnang ban khang lad ia kano kano ka jingthmu ban leh shilliang khmat kaba mih na ka jingbamsap.
  3. Dei ban pynsangeh noh shisyndon ia ki jingthung kam tuh ne sop sop (Ad Hoc/ Backdoor appointments) bad ia kito kiba thungkam be-ain bad don kti ha ka jingbamsap bad jinglehshilliang dei ban pynshitom katkum ki Ain bad dei ban pynduh ia ki pension jong ki bad ruh kidei ban siew ia ki jinglut jingsep ba mih na ki jinglulmar ba kum kine.
  4. Dei ban pyrkhing ia ka jingthung kam ia ki briew kiba la shongthait la ka long ha ki kam Sorkar ne kino kino ki jaka treikam ba kyrshan bad bei tyngka da ka Sorkar kynthup ia ki projek ba kyrshan da ka Sorkar khnang ban plie lad plie lynti ia ki samla wad kam bad ruh ban ym don ka jingtrei shah shilliang (conflict of interest).
  5. Ka jingtreikam jong ka tnat MPSC ka dei ban long kaba khuid bad kaba ai jingkhein jingdiah. Ia ka rukom triekam ka MPSC dei ban bishar bniah da ki paidabah nongshong shnong ( Social Auditing).

Para Nongtrei Nongbylla Nongrep bun ki jingeh bad ki jingshah khnoit bein, hynrei yn ym lah ban pynbeit bad pynthymmai lada baroh mangi ngi sheptieng bad ngi randien. La dei ka por ba ngin ia mih madan ban ieng bad iakhun na ka bynta kita ki hok kiba lah shah knieh jubor na ngi khamtam ha kane ka juk kaba mynta. Ngi kyrpad iaphi ban wan snohkti lang bad ngi na ka bynta ki hok jong nga jongphi ha kane ka jingiatur ka jong ngi ban ioh ki kam ki jam, ka kamai ja kpoh bad ki hok nongtrei nongbylla ba pura.

Phi lah ban iadon ryngkat bad ngi da kaba phone ha kine ki nombor: Angela 9863097754, Roney 8014935470,

Shanlang 9862477325, Kyrsoi 943612576 Wanpynhun 8575048724

email : thma.u.rangli.juki@gmail.comWork Poster Khasi

Have your say

comments

Raiot

Subscribe to Raiot via Email

Enter your email address to subscribe to this blog and receive notifications of new posts by email.

Raiot Collective Written by:

We are many, we are one.

Be First to Comment

Leave a Reply

Your email address will not be published. Required fields are marked *