Ka Jingieid kaba Sngur bad ka Jingmynjur

Ia ka sngi14^th February la juh niew kum kawei na ki sngi ba kyrpang ne ka sngi jong ka jingieid ha kylleng sawdong ka pyrthei la ka long ha ki jaka sor ne nongkyndong ha kaba kiba bun ki briew ki pynpaw iaka jingieid jong ki iwei ia iwei da kaba ki ai sngewbha da ki Card kiba dap da ki kyntien jingieid, da ki jain ba itynnad, ki syntiew, ki chocolate, ki kyrwoh jingieid lyngba ki “whats app”, “facebook” bad kiwei kiwei kum ka dak ban pynpaw ia ka jingieid kaba markylliang.Ia ka valentine bunsien hi la rakhe ia ka da  kino kino kiba don ka jingiadei la ka long kiba iaieid samla ne shitnga bad  wat kiba iaieid paralok ruh kumjuh.

Ha ka Ri khasi hi baroh kawei ki don la ka jong ka rukom rakhe ia kane ka sngi bad rukom leh kmen ia kane ka valentine day hala ki jong ki jong ki jaka,lyngba ki jingiathuh khana kiba nga la iohlum ki don ki jaka ha ki por ba mynshwa kaba ki samla shynrang ki tyrwa jingieid ia ka samla kynthei da kaba ki ai da ki snad kum ka dak ban tyrwa bad ka kynthei ka pynphai kylliang da ki jain rumal kumka dak ka jingpdiang ia ka jingtyrwa ban long I valentine jong I, bad don ruh ki jaka  kiba haba ki imon shisha iano iano ki da phah wad jingtip ha ki riewrangbah I dei I khun jongno I kur I jait jongno la ka don ne em ka jingsang jingma bad hangta kin sa phah tyrwa bad kim juh tur ruma khnang ba kin lait na ka jingma, mynta pat ki don kiba ai da ki syntiew kulab basaw bad lada ka kynthei ka pdiang ka pynphai da u chocolate bad ha kiwei kiwei ki rukom leh bapher bapher, ha ki jaka sor ki juh pynlong ki tamasa bapher bapher la ka long ki concert ne kiwei kiwei kum ka dak ban rakhe ia ka valentine day, ban rakhe ia ka valentine ka long kaba dei eh  lada ngi rakhe ia ka ryngkat ka jingmynjur lang ha ki liang baroh (Valentine with Consent). Hynrei haba ngi phai ha kine ki sngi ba mynta ha kaba ka jingshongsuk shongshngain ki kynthei kaba kynthup naduh ki tymmen ki samla bad wat haduh ki khynnah kam don shuh. Ba don ki briew haba la poi ka Sngi Valentine ki pyrkhat tang ka jingkwah brai ban pynhun  iaka jingkwah la jong, hooid ngam don jingeh ia kata namar u wei pa uwei ne kawei pa kawei ki don la ka jong ka hok ne jingkitkhlieh ia la ka jong ka met hynrei nga kwah ban pashat jingmut pat ka long ba ngim don hok bad ngim longtrai  ia ka met jong kiwei kaba mut ngim lah ban pynbor ia kiwei ba kin leh ia kaei kaba kim sngewdei khlem ka jingmynjur lang la ka long ha ki sexual activity ne jingleit kai shane shatai bad kiwei kiwei. Ha kaba kum kane ka sngi kaba ngi khot ka sngi jong ka jingieid ki juh mih ruh bunsien ki jingsngewsih kiba khraw kiba pynlong wat iaki katto katne ngut ki samla ba kin shim noh wat iala ka jong ka jingim namar ka don ka jingthombor khlem ka jingmynjur.

Ka por ne ka ia kaba ngi im ka dei ka ia kaba ki briew ki la sdang duh noh ia ka jingpyrkhat ban im kum ki briew ha kaba kim khein shuh ia ka sang ka ma ka longbriew manbriew.Kumta ha kane ka Sngi valentine kaba mynta ngi kwah ban ai khublei valentine ia baroh ki shijur kiba don ka jingiadei bad kyrpang eh na ka bynta ki samla ba phin rakhe ia kane ka Sngi Valentine da kaba phin kynmaw ba ka jingieid kan long kaba sngur bad kaba jynsur haba phi leh ia kiei kiei baroh ryngkat ka jingiamynjur bad kyrpang eh phin kiar na ki kam basniew da kaba phin burom ia I ba ieid jong phi ha kaba phin shim lang ia ka jingmynjur bad phin kiar na kiei kiei kiba sniew. Kyrmen ba kane ka  Sngi Valentine kan long ka sngi kaba kmen lang ia baroh bad kyrpang eh ka valentine kaba baroh ngin pynpaw ia ka jingpyrshah ia ka jingthombor ia ki kynthei.

Khublei Shibun. Ka Sngi Valentine kaba dap da ka jingieid kaba sngur bad kaba ieng ha ka nongrim jong ka jingmynjur.