Ka jingkiew ka seng BJP bad kaei ka ba lah ban long hadien

Ha kine ki khyndiat bnai ka BJP ha Meghalaya ka sdang ban kop ba Kan jop suk ia ka ileksion 2018 ka ban sa long ha Meghalaya. Kawei na ki daw ba pynlong ia kane ka parti ban kren kob kumtei dei namar ba ka ong ba bun ki MLA/MDC jong ka Congress kin phet seng lut sha ka BJP. Ngi dei ban sngew khia ia kane ka jingkren ka BJP namar ka jingkiew sted ka BJP ha kylleng ka ri India bad khamtam shatei ka thain mihngi ka dei ka jingphet krad ki nongialam congress sha ka BJP naduh ba u Narendra Modi u jop suk ha ka ileksion 2014.

Ka jingnud jong ka BJP Meghalaya ban byrngem leileh leiiong ka dei hadien ba ka BJP ka jop suk ha Assam ha u snem 2016. Ha Assam ruh ka BJP ka jop hadien ba bun na ki MLA Congress ki phet seng sha ka BJP. Ka BJP naduh ba sdang ka ju ong ba ka dei ka party ba pher na kiwei. Naduh ba seng ia ka, Kane ka party ka ju ong ba kan pynthymmai ia ka jingtreikam ka politics ha India. Ka jingkylli ka mih ba lada ka BJP ka pdiang lut ia ki nongialam ka Congress bad kiwei ia party hato ka pher aiu pat lada ki juh ki briew na kawei ka seng ki wan buhai ha kane ka seng?

Ka BJP ka jop ia ka eleksion 2014 ha ka mat jong ka corruption. U Narendra Modi u kynnoh bad u kynthah ia ka Congress halor ki kam Corruption. U ong ruh ba lada u jop bad leit long Prime Minister ne Myntri Rangbah ka ri India, yn rat dynkhong lut ia ka corruption bad un sa set phatok lut ia ki Minister, ki MLA, ki nongialam jong ka Congress. Hato dei na kane ka daw mo ba ki nongialam Congress ki phet lut sha ka BJP ban ioh jingiada ha ka parti? Kine ki jingkylli ki mih namar haduh mynta mynne ym don uwei ruh u nongialam congress uba lah shah set phatok. Shaei kata ka jingkular u Narendra Modi?

Ki nongialam ka seng BJP na Delhi ki wan man ka por sha Shillong ban wad lad wad lynti ban pynkhyllem ia ka sorkar congress hapoh ka jingialam u Dr Mukul Sangma (kumba ka leh ha Arunachal Pradesh bad Uttarakhand) da kaba tuh bad thied ia ki MLA Congress. Haduh mynta mynne ruh kim pat lah. Kat nang jan ki sngi eleksion kane ka jingkhwai ka BJP ia ki MLA congress kan nang jur shuh shuh. Ha kajuh ka por bun Ki MLA barim, ki MDC bad kiwei na ri-lum khasi-Jaintia-Garo ki rung sha ka BJP namar ki sngewthuh ba ka eh ia ki ban ioh ticket ha ki seng ba ki don. Ka BJP ka bym don nongbud ha ki ri-lum Meghalaya ka kloi ban plie ia ka jingkhang ban pynskhem shuh shuh ia ka party da ka jingrung kine ki nongialam barim bad bathymmai.

Hato ka BJP ka lah ne em ban khring ia ki nongialam ka Congress Meghalaya? Ngi dei ban phai khmat sha ka jingjia ha kine ki khyndiat bnai ba lah lei. Ha u November 2016 U Narendra Modi u pynkut kynsan ia ki pisa barim (500 bad 1000) bad pynmih pat ia ki pisa thymmai halor ka nongrim ba kine ki pisa rim kin pynduh lut ia ki kam corruption bad pisa thok. Bun bah ki briew ha kylleng ka ri ki shem jynjar ban kylliang ia ki pisa ba rim jong ki ha ki bank.

Da ki spah ngut ki briew ki iap tang ha ka ieng lain kylleng ka ri India. Ka BJP ka ong ba ka India kan sa kiew sted bha lyngba kane ka polisi pynthymmai pisa. Ki riew stad ki ong ba kane ka polisi kan sa ktah ia ka roi ka par jong ka India bad ba kan ktah ia ka rep ka riang khamtam ia ki briew ba sah ha ki nongkyndong. Ka jingkren jong kine ki riewstad ka urlong shisha namar ka roi ka par jong ka India ha u quarter Jan-March 2017 ka hiar bha bad ka poi tang 6%. Jan baroh ki MLA congress ki pyrshah ia kane ka polisi pynthymmai pisa bad ki ong ba ka ktah lut ia ka iaid ia ieng ki briew ha Meghalaya. Lada ki leit bsut sha ka seng BJP te ka mut ba ki dei ki briew ki ba arsap bad ki ba klot ban klet ia ka jingeh ki paidbah ban myntoi ia lada.

Naduh ba ka BJP ka jop ha ki jylla ba bapher ka ri, ki mih ki jingjia ba sngew phylla bad sngewsmiej ban pyrkhat. Ngi iohsngew kumno baki riew rit paid kum ki Dalit bad ki Muslim, ki Kristan, ki adivasi bad kiwei ki shah ban bein, shah pyniap, shah bom, shah kem khlem daw ha ki jylla ba Synshar ka BJP kum ka Gujarat, Maharashtra, Uttar Pradesh, Madhya Pradesh bad kiwei. Ngin shim ka nuksa jong ki Dalit. Kine ki jaid briew ki dei ki breiw kiba poh tam ha ka imlang sahlang jong ka niam Hindu (low caste). Bun na kine ki trei ki kam ba poh kum ka jingpynkuid painkhana, nala, kit ki metiap mrad bad metiap briew bad kum kita ki jaid kam.

Naduh ba jop ka BJP ha kylleng ka ri, ki Dalit kiba ju kit ia ki masi ba iap sha ki jaka bret ki shah kem ha ki nongbud jong ki seng Hindu kiba kyrshan ia ka BJP bad kine ki riew runar ki shoh ki sympat ia kine ki dalit tang namar ba ki kit ia ka metiap masi. Ki video bapher bapher ki mih ha kine ki khyndiat snem ba kumno ki samla dalit ki shah teh ha ki post, ki dieng bad shah bom shnong ha ki seng shit niam Hindu kiba kyrshan ia ka RSS, BJP bad kiwei.

­­­­­­­­­­­­­­­­­­­­­­­­­­­­­­­­­Tang ha kine ki Kyndiat sngi ka sorkar India hapoh ka jingialam ka BJP ka wanrah ia ka ain thymmai kaba iadei bad ka jingdie jingthied ia ki Masi, ki Muid bad kiwei. Ki ain jong ka Prevention of Cruelty to Animals (Regulation of Livestock Markets) Rules, 2017 ka khang lad ban die ban thied ia ki masi, ki muid bad kiwei ha ki iew ki hat. Kane ka ain ka buh kyndon ba donkam jingmynsur ne permission na ki bor sorkar shwa ban pyniap ia ka Masi.

Ka jingkhang bam dohmasi ka dei ka thong ba kongsan tam jong ka RSS kaba dei ka kmei jong ka BJP. Bun ki ong ba kane ka dei ka buit tuh jong ka RSS. Hadien ba ka BJP ka khur jingjop ha ki jylla bapher bapher ka nang ioh bor ban pyntreikam ia ka Hindutva politics lane ka politics ban pynkylla Hindu ia ka India baroh kawei. Kawei na kita ki polisi dei ban khang doh masi.

Kane ka ain ka iuhroit ia ka Hok jong ki Jylla namar katkum ka List II jong ka Konstitution ia ka kam pyniaid ia ki iew masi bad kiwei lah buh ia ka hapoh ka jingpyniaid jong ki sorkar jylla. Mar ia mih kane ka ain bun ki jylla ka ri India kum ka Kerala, Goa, Tamil Nadu, Meghalaya, Mizoram bad kiwei ki pyrshah ia kane ka ain kaba na jrong i kumba ka dei tang ban iada ia ka koit ka khiah ki masi hynrei napoh pat dei ka ain ban khang syndon ia ka bam doh masi ha ri India.

Kane ka ain ban teh lakam ia ki kam khaii masi ka deng tang ka jingsdang jong ka jingtuklar ka BJP ia ki kam iap kam im jong ki briew ka ri India khamtam ki riew rit paid kum ki ST, SC ki OBC. Ka jingpyntieng pynsmiej ia ki khristan, ki Muslim bad kiwei ki niam rit ha ri India ki lah nang bun kat nang mih ki sngi. U Narendra Modi imat u lah sdang ban pynjem ialada ha ki nongialam ka RSS. Une u Prime Minister ka ri India u tip bha ba lada ka RSS kam sngewtynnat ia u bad lada u leh pyrshah, kane ka seng kan sa pynhiar shuki ia u lane kam ai lad ba yn jop ha ka ileksion MP 2019.

Ka BJP ha Meghalaya hadien ba lah pynmih ia kane ka ain masi ka shem ha ka apot ha kan ieng ruh tyngkhuh ban shong ruh jhieh. Baroh shi katta ka BJP Meghalaya ka ieng ban iada burom ia ki ain ka pynkulmar jong u Narendra Modi kum ka demonetisation bad kiwei. Ha kane ka kynti kane ka seng ka pynmih ki nia ba sngew jakor da kaba ong ba lada kan wan ha ka bor ha u snem 2018 kan nym khang ia ka Doh masi ha ka jylla Meghalaya. Ka jingkylli ka mih ba lada ia ki masi lah khang ban die lut ha ka ri India, naei pat ki briew ka jylla Meghalaya kin ioh dohmasi? Balei ba haduh mynta ka BJP Meghalaya kam pyrshah ia kane ka ain?

Uwei na ki nongialam jong ka seng na ri lum Garo u Bernard Marak u ong ba lada ka BJP kan jop ha Meghalaya ka seng kan sa pynhiar ia ka dor jong ka doh masi. Tang hadien saw sngi une u nongialam ka BJP u mih noh na ka seng lem bad ki nongbud jong u. Ki nongialam na ri lum khasi kum u Bah Antonio bad kiwei ki byrngem ban hiar shuki lada kane ka ain ka iai neh kumba ka long. Ngi hap peit haduh katno kine ki nongialam khasi kin burom ia ka Ktien ba ki lah khlei. Lada ki dang iai neh bad ka BJP dei ban pynrem kput ia ki ha ka ileksion ban wan.

Ka BJP ka nang iai ioh bor hadien ba u Narendra modi u wan kum u Myntri Rangbah ka ri India. Ha ka juh ka por ki kam pyntriem kiba shyrkhei pyrshah ia ki riew rit paid kum ki Dalit, Muslim bad kristan ki nang iai mih na kawei ka sngi sha kawei pat. Uwei na ki Nongialam ka RSS u da buh thong ba ka ri India hapoh ka jingialam jong ka BJP kan sa kylla long ka Hindu Rashtra ne ka ri ba sah tang ki hindu shwa ka 2023. Kawei pat ka seng jong ka RSS ka Dharm Jagran Samiti (DJS) ka ong ba ki kristan bad ki muslim kin duh ka jinglong trai ha india ha u snem 2021.

Hato kine kim dei ki dak ba ka BJP ka dei ka party ka ban pynpait pynpra ia ka ri India baroh kawei. Lada ka nang iai jop ha kine ki snem ban wan kan ktah lut ia ki kyndon ba lah buh ha ka konstitution kiba dei ki kyndon ba iada ia ki riew rit paid, ki niam ba rit, ka imlang sahlang, ka iaid ka ieng bad kiwei. Lada ka long kumta niuma kan sa mih ka thma ha kylleng ka ri khamtam ha ki jylla shatei lam mihngi kum ka Meghalaya, Nagaland, Mizoram bad Manipur kiba don ka riti ka dustur kiba pher na kiwei pat jong ka ri India.

Ka RSS ka lah sdang ban leh khla mynta wat ha ki jylla shatei lam mihngi. Ha Shillong ha u snem 2016 ka RSS ka pynlong ia ka rally paidbah. Kumjuh kane ka seng ka pynlong ia ki rally kylleng ha Assam, Manipur ban pyni ia ka jingbun briew jong ka seng. Kane ka dei ban ktik ia ngi kum ki briew ba shemphang. Ngim dei ban ai lad ia kane ka seng buaid niam Hindu kaba kham mynshwa ka kam ba ki riew lum ha India kynthup ia ki khasi niam trai/niamtre ki dei ki paid ba saphret jong ka niam Hindu. Kane ka dei ka kam shalak jong ka ban pynpait pynpra ia ka Hynniew trep Hynniew skum da ka ba pynshong shit niam kumba ka leh ha Uttar Pradesh bad shawei.

Katba ka ileksion ka nang jan, toh ngin shim ia kane ka jingkitkhlieh ba ngim dei ban ai lad ia ka BJP ba kan jop ha ka ri lum khasi Jaintia bad Garo. Ngi dei ban sngewthuh ia ka jingma ba wan na ka jingjop ka BJP bad kumno kan ktah ia ka riti dustur, ka niam, ka Ktien ka thylliej bad kiwei jong ki jaidbynriew kiba pher na kiwei pat ha ka ri India.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Phrangsngi Pyrtuh Written by:

Phrangsngi Pyrtuh teaches in a college and is a fellow traveller

Be First to Comment

Leave a Reply