Ka Maitphang ba la shim na ka kot ‘KA MARYNTHING RUPA’

ALL ASSAM INTER-COLLEGE MUSIC COMPETITION, 1959 (TEZPUR) — Ba Ieng (na kadiang sha kamon) : Bah Ganold S Massar, Bah L.Gilbert Shullai, Bah Nando E Wankhar, Bah H. Teslett Pariat, Bah Bevan L Swer, Bah Webster Davies Jyrwa, Bah Densil Lyngdoh. Ba Shong (na kadiang sha kamon) : Bah Newland Sohliya, Bah Sumar Singh Sawain, Bah Teddy Pakyntein, Bah Nestor Dkhar

Ka Maitphang :

Ym don u kynja ba don jingim, naduh u briew haduh u mrad u mreng uba iaid ha sla khyndew, ki sim ki doh kiba her ha suiñ, ki dohkha bad kiwei ki jait jingim kiba don hapoh um bad wat ki dieng ki siej, ki syntiew ki skud, ki jingthung jingtep kiba ym ktah da ki sur jingtem jingput ne jingrwai. Ki puriskam ki Greek ki ong ba haba u tem u Orpheus wat ki maw ruh ki khih. Ki riewstad mynta pat ki pynshisha ba ki jingthung ki sei ki plung bha haba ki iohsngew ia ki sur jingrwai.

Ki jingrwai, khamtam kito kiba la shna bha, kata, kiba iabiang ka dur bad ka sur ki ngam shaduh ka dohnud u briew bad ki ktah ia ka jingsngew jong u. Haba nga ong ka dur bad ka sur, nga mut ki ktien ka jingrwai bad ki sur ba la shna ban pyniahap bad ki ktien ka jingrwai. Dei kane ka jingpynbiang ia ki ktien bad ki sur kaba la pynim slem-slem ia ki jingrwai kiba rim bad shisien ba la iohsngew ia kine bad la nang ia ki, ki neh sah ha ka jingkynmaw. Lym kumta i Bah L.Gilbert Shullai in ym da la lah ban kynmaw ia ki jingrwai kiba i la iohsngew, nga ngeit, naduh ba i dang khynnah. Wat u nongrwai ruh haba u rwai ia ki jingrwai kiba rim u da pynpaw ba ki ktah ia ki dohnud bad ka jingpyrkhat jong u, kata, kumba ong ha ka ktien Phareng, u rwai da ka ‘expression’.

Baroh ki jingrwai ba la shna bha ia ki, ki don la ka por ban rwai ia ki. Don na ki kiba dei ban rwai mynstep, donpat ban rwai mynmiet. Don na ki kiba dei ban rwai haba sngewsih bad don pat kiba dei ban rwai haba sngewbha. Don kiba iadei ban rwai haba sngewkynjah sngewblaw bad don kiba iadei ban rwai haba paidbah. Ki don ki sur kiba ktah ia ka jingieit samla bad don ki sur kiba pynsngewtriem ne pynshyrkhei.

Haba nga dang samla khynnah bad nga leit bud leit jingleit ia u Sahep Bishar (Dohlieh) sha Mawphlang, katba nga dang shongkai ha ka karma ha ïing u Lyngdoh Mawphlang ha kaba la pynbeit ia nga ban sah, uwei u nong-Mawphlang u wan wad ia nga hadien ba u la syaid bad shongshit bha bad u rwai artat ia kawei ka jingrwai kaba la rim bad kaba ju iarwai bha ha kita ki por.

‘I’m only painting the Clouds with Sunshine’.

Ynda la iashongkai, nga sa sngewthuh ba u long u briew uba shem lanot bha. Kumta ngi iohi hangne ba ka jingrwai kaba la shna bha bad dur bad sur ka ktah haduh katno?

Kawei pat kaba pynshoh ia ka jingrwai ka long ka jingbuh kaba biang ia ka rukom tied kaba ki ong ka Timing ne Measure, la ka dei kaba shi-dieng shi-dieng, arsaw, laisaw kum ki Foxtrot, ki Waltz, ki Rhumba, ki Samba, ki Bequine Tempo, ki March. Ki don ki jingrwai kiba  suki bad ki don ki jingrwai kiba stet. Ha ki por hyndai haba dang shlei ka Iewduh da ki dorji phin iohsngew ia kine ki rukom rwai ha ka jingryntih ka jingiaid ki shalyntem ka kor suhjaiñ ba la kynjat da ki kjat u nongrwai ne u dorji, lane ia ki ‘Walts’ haba kynoi khun ka kmie ne haba dril ki khynnah bad kumta ter-ter.

marynthing 011 marynthing 009

Mynta ha kine ki por pat imat la shu shna ki jingrwai kiba shisur tang ban shu pynsmiej ia ki kjat ki samla ne ki basan kumjuh ban shad lymmuh. Tang shu iohsngew ia ki jingrwai, la shu tied klumar ia ka miej ka shuki bad ieng bad shad katba mon, kata ban Jive, Rock ne Disco. Ha ki samla jong ngi mynta lei-lei imat la shu iashna klumar haduh ba ka dur kam iadei bad ka sur ne ka sur kam iahap bad ka dur. Bun na ki jingrwai la shu pyniahap jubor ia ka dur bad tan jubor ia ka sur. Teng-Teng ia ka dur ruh ym sngewthuh bad ka sur ruh kam pei ia ka skhor. Phin sngap ba don ki Cassette Khasi mynta kiba ka dur ne ktien kaba mut shawei bad ka sur pat kaba thew shawei. Kumba ong u paralok jong nga ba bun ki Cassette Khasi te imat ki long Three in One – ka dur la ka jong, ka sur la ka jong, bad ka jingkynnoh ia ki ktien la ka jong. Te namar kata kim biang keiñ.

Kawei pa kawei ka laiñ ba nyngkong jong ki jingrwai ha kane KA MARYNTHING RUPA jong i Bah Gilbert ka pynkynmaw ia nga  ia ki por kiba ki jingrwai Phareng ki la long don long snam ha u nongrwai nongtem Khasi bad la i kumba kin long ka bynta jong ka Culture jong u Khasi hi. Kane ka lah ban long, lehse, bym pat mih ki nongshna jingrwai Khasi kiba tbit ban shna ki jingrwai kiba biang bad dur bad sur. Ki jingrwai Khasi ba shna ha kito ki por ki long kito ki jingrwai ba la shna dur bad pyniahap ha ki sur Dkhar bad ba rwai ne tem ia ki haba ialehkai theatre kum ha Jowai, Mawphlang, Mawngap, Marbisu, Sohra, Mawsynram bad ha Seng Khasi ha Mawkhar.

Ka jingbang ia ki jingrwai Phareng ha ngi ki Khasi, imat ka long hadien ka Thma Bah kaba Nyngkong, kata hadien ka snem 1918 ynda ki Khasi jong ngi ki la iawan na France bad Mesopotamia. Ynda la wan sa ka Thma Bah kaba ar, la nang jur shuh-shuh ka jingiarwai Phareng.

Haba nga kynmaw ia ki por shuwa ka Thma Bah kaba ar, ka wan shat ha nga ka dur jong ki radbah ha ka put ka tem, ka rwai ka siaw. Nga kynmaw ia u Bah Rishot uba tem Bela, Bah Destar ba tem Mandolin, Bah Kelly Diengdoh ba tbit bha ban tem Bela, Accordion, Clarinet bad kiwei- kiwei ki jingtem jingput, Bah Syndor ba put Clarinet, Bah Jokes ba tem Accordion, Bah Bihsar ba tem Banjo, Bah Baden ba tem Ukelele, Bah Reban ba put Besili. Nangta sa ki jong u Bah Theo Lyngdoh, Bah Soverine, Bah Orgheus Pakma, Bah Owen Rowie, Kong Trilian Pariat kiba tem Bela, Bah Vie Swer, Bah Garlile Diengdoh kiba tem Hawaiian Guitar, Bah Din Swer ba tem mandolin.

Nga dang kynmaw haba tem u Bah Kelly Diengdoh shiteng miet ia ka jingrwai “Ramona” ha surok Jaiaw, baroh ki jingkhang – ïit ki mih jingshai ban sngap ia ka sur kaba mih na ka Bela jong u bad kumjuh ruh haba put Clarinet u bah Syndor. Nga la iohsngew ruh ia ki kti ba pnah jong u Bah Rishot Khongwir ha ka Bela bad u Bah Destar Khongwir ha ka Mandolin bad nga la ioh ka lad ban iatem lang bad ki shisien arsien ia ki jingrwai kiba nga dang kynmaw kum ka jingrwai “South of the Border”, “Little Girl of my dream”,”After the Ball”, “Merry Widow”, “ Three O’clock in the Morning”, “Colonel Boogie” bad bun kiwei kiwei ki jingrwai. Ha kata ka por nga la pyntbit ialade ban tem Mandolin bad Bela.

marynthing 012Sngewtynnad ban Kynmaw ia kitei ki radbah nongtem ba kida pyntbit bha ialade shuwa ba kin mih pyrthei bad kida nang ruh ban pule Music, kata ia ka Staff. Ki long ki briew kiba khraw ka jingmut jingpyrkhat bad kim ju pynthut ia kiwei. Ka jingiatem ha kito ki por ka long ka jingsngewtynnad ialade bad ka jingpynsngewtynnad ia kiwei. Haba ki iatem ha surok, ym ju don ba pynwit ne kynroi ia ki. Don na ki katba kim pat sngewtynnad ne syiad bha, kim ju sdang ban iatem hynrei ki ialeh ka pynbeit ksai. Uwei u rangbah u iathuh ba haba ki leit iatem ha Shillong Club ha ki por ba dap ka Club da ki Dohlieh, ynda u Chowkidar u lum ia ki bitor, u lap katto-katne ki bitor khlem lavel ba la set da ka sla.

Ha ki snem kiba kham hadien la mih sa uwei u nongtem Bela uba tbit bha bad uta u dei u Bah Besterwel Soanes. Ki ong ba haba tem u Bah Besterwel ha ka Concert ha Gauhati Cotton College, la hap cancel lut ia ki Item kiba hadien namar ki paitbah ki ia kwah ia u Bah Besterwel ban tem baroh shimiet.

U nongtem Bela uba la palat liam ia baroh ki nongtem Khasi pat u dei u Bah Ramsong uba la khlad noh haba nga dang khynnah bad ngam pat iohsngew ia ka jingtem jong u, ne kynmaw ia u. Ki ong ba haba tem u Bah Ramsong wat ki Mem kiba la nang bha ban tem Piano ki shitom ban iabud ia u haba ki iatem na ka kot (Music Book), kata da ka Staff. U lah ban tem ia ki sur Classical kiba eh katno-katno ruh namar u da nang bha ia ka Staff. To, la dei ban tei mot ia uba kat une u rangbah nongtem uba ym pat ju don kat ma u ha ka Ri jong ngi bad ban ym mih shuh ruh kiba kat ma u, khamtam mynta ba la shu tem ne rwai tynneng khlem da sngewthuh ne nang ia ka Music ( nga mut Staff Notation bad Tonic Solfa).

Ha ka Thma Bah kaba ar ha ki snem 1939-45, ka la don ka jingwan poi ki shipai dohlieh, ki Johny bad Tommy hangne ha shillong bad sdang shongshit ka rwai ka tem sur Phareng ka shnong ka thaw. Ha kitei ki snem ki wan poi sa ki kynhun put kynhun tem bad nongialeh kai pynbyrngia ki dohlieh ba ki khot ki ENSA kiba wan khnang ban pynsngewbha ia ki shipai kiba don ha Shillong. Jan man ka miet ki iarwai iaput iatem bad ialehkai ha Garrison Theater Cantonment ha kaba don ka jingpyni film phareng ( Cinema ) man ka sngi. U Paitbah Khasi u tuid man ka sngi sha Garrison Theater, ym ban peit eh ia ki film hynrei ban iohi ia ki nongrwai nongtem ne nongialehkai bad ban iarwai hapoh Cinema. Shwa ban sdang ka ‘show’ ju don ka jingiarwai lang ia ki sur kiba sngewtynnad kiba ki ktien la pyni ha ka Screen kum –

You are my sunshine, Lily Marlane,
Sierra Sue, Goodnight Irene,
Lay that pistol down, With someone like
you, White Cliff of Dover,
Slow boat to China, Home on the range,
My wild Irish Rose,
Rose of Tralee; bad bun kiwei-kiwei ki jingrwai.

Ha katei kajuh kapor la mih shuh-shuh ki nongrwai nongtem Khasi kiba nang bad pawkhmat bha kum ki jong u Bah John Shome, Bah Hebress Marbaniang, Kong Semina, Bah Rosbell Chyne, Bah Gretan Sun, Bah Richard Nalle, Bah Beriwell Kyndiah, Bah Lebi, Bah Filkin Laloo kiba tem Bela ; Bah Noel Arbor Khongwir bad Lursingh Jyrwa kiba tem Mandolin ; Bah Thomlin, Bah Kynsai Nalle, Kong Icydian Swer kiba tem Hawaiian Guitar ; Bah Cyril Lyngdoh, Bah Harvey kiba tem Spanish Guitar. Dei ha kane ka por ba u Bah Andreas Shome u la plie ia ka Shillong Music School ha Umsohsun. Kane ka skul ka la long kaba nyngkong ban hikai jingtem bad ka la lah ban ai jingmyntoi ia kiba bun. Hynrei hadien ba u Bah Andress um don shuh, kane ka skul kala duh noh bad ym don skul hikai jingtem shuh haduh mynta.

U bah John Shome u la pyni ia la ka jingtbit tem jong u ha ki Concert kiba bun. U Bah Gretan Sun pat u don ki kti kiba jem. U Bah Noel Arbor Khongwir u long lehse uba tbit tam ka mandolin, nga la iohsngew ia u Bah Arbor ha ki ‘Peak Hour’ ba u tem ia ki Tango, kum ia ka ‘Jealousy’ bad ‘La Cumparsita’ ryngkat bad ki jong u De Mello bad De Suza. U Bah P.Ripple Kyndiah ruh u long uwei na ki nongtem mandolin ba tbit bad ba paw bha. Nga la iatem lang shisien ia kawei ka Concerto ha Dinam Hall ryngkat bad ki jong I Kong Trilian, Bah Orpheus, Kong Semina, Richard Nalle ha kaba la pynlyngngoh ia ki paidbah. Ki nongrwai jingrwai Phareng kiba radbah ruh ki la mih ha kine ki por hadien ka Thma Bah kaba ar kum ki jong u Bah Jes Nongkynrih uba lah ban rwai baroh shimiet bad la ka Guitar bad uba lah da shisha ban rwai Phareng. Nga dang kynmaw ia ki katto katne ki jingrwai ba u rwai kum – “Sheik of Araby”, “Slow boat to China”, “I’ll get by”, “Lay that pistol down”, “come on and hear” bad kiwei kiwei. U Bah Jes u lah ban rwai sngewtynnad wat lada sah sa tang ar tylli ki ksai ha ka Guitar jong u.

La don ruh ki nongrwai kum ki jong u Bah Hem Swett uba la palat liam kum u Tenor Voice. U Bah Hem u lah ban rwai ia ki jingrwai u Slim Whitman ia ka “Indian Love Call”, “China Doll” bad “May Time” jongu Nelson Eddie bad ka Jenet Medonald bad kiwei kiwei ki jingrwai kiba syiang da u ryndang uba um bad jail bha. Ki ong ba haba u rwai bad tem Piano ha kawei ka Hotel heh ha Calcutta, ki Dohlieh ki shu kyrngah khlieh bad lyngngoh ngaiñ. Mano ban klet ruh ia ka jingrwai jongu Bah Siken Swer uba don u ryndang uba sngewthiang bad ba lah ban bteng ia ki Octave sha u ‘note’ uba jrong tam khlem da don kano kano ka jingdkoh. Nga kynmaw ia kawei ka jingrwai ba u Bah Siken u rwai mynba u dang khynnah samla “Ave Maria” ha ka ktien Italian, kaba la palat ka jinglah jong u ban rwai bad ka ‘expression’ haduh wat ki Catholic Father ruh ki la lyngngoh. Ym don jingthut ne jingkynnoh bakla ia ki ktien bad la sngew kumba tem da ka Bela. Nangta mih sa u Bah A.B.Wahlang ba ju tip kum u bah Toto ha ki Club kiba heh ha Calcutta ; u la pynpaw ia ka jingtbit ban rwai ia ki jingrwai Phareng bad ka kyrteng jong u ka la mih man ka por ha ki kot khubor Phareng. Ha ki snem kiba kham hadien lah mih ka kynhun tem “The Dynamite” kaba long ka band group kaba sngewtynnad bad kaba la neh shipor.

Ha ka snem 1948 ki samla nongtem Jaiaw kila ia lum lang bad ki la pynmih ia ka kynhun tem kaba ki la ai kyrteng – “Jaiaw Orchestra”. La jied ia nga kum u Nongialam (Leader) jong ka Orchestra bad nga la trei shitom bun-bun snem ban pynbeit bad ialam ia ka “Jaiaw Orchestra”. Ki dkhot kiba nyngkong jong ka Orchestra ki long :-

  1. Bah Bonarwell Lyngdoh – Bela bad Guitar.
  2. Bah Harold Nongkynrih – Mandolin, Ukelele bad Bela.
  3. Bah Everland Syiemlieh – Mandolin bad Piano Accordian.
  4. Bah kyndwer Khongwar – Bela.
  5. Bah Rosswel Chyne – Bela.
  6. Bah Soken Kharshandi – Spanish Guitar bad Bango.
  7. Bah Betterland Syiemlieh – Spanish Guitar.
  8. Bah H.Methington – Hawaiian Guitar.
  9. Bah Arthur Warren – Harmonica bad Drums.
  10. Bah Hubert Dkhar – Spanish Guitar.
  11. Bah Mawrong Kharsati – Spanish Guitar bad Bango.
  12. Bah Borwin Nongrum – Maracas bad Guitar.
  13. Bah Osland Nongrum – Bela.
  14. Bah John Ryntathiang – Bela.
  15. Bah Sainmanik Syiemlieh – Spanish Guitar.
  16. Bah Clader Rynjah – Spanish Guitar.

Nalor ba ki dei ki nongtem, u Bah Sainmalik Syiemlieh bad u Bah Calder Rynjah ki dei ruh ki nongrwai.

Hadien pat la wan iasoh sa kine :-

  1. Bah Marshal Blah – Bela.
  2. Bah Fredie Cholas (na Riatsamthiah) – Spanish Guitar.
  3. Bah Dodo (na Laban) – Spanish Guitar.
  4. Bah Orlando (na Mawlai) – Spanish Guitar.
  5. Bah Phil Lyngdoh – Spanish Guitar.
  6. Bah Horil – Bela.
  7. Bah Diren Swett – Bela.
  8. Bah Aibor Lyngdoh – Spanish Guitar.
  9. Bah Defend War – Bela.

Nalor kitei ki regular members ki don sa kiwei pat kiba ju wan iasoh kum ha ka concert –

  1. Bah Pires – Drums.
  2. Kong Stelly Rynjah – Piano.
  3. Kong Eugene Rynjah – Piano.
  4. Bah Phersingh Lyngdoh – Piano.

marynthing 003Ki Tham Sisters, kata I Kong Deidora Tham, Kong Ivora Tham bad Kong Balmora Tham ki long ki nongrwai kiba bang tam ha kito ki por bad kine ki rwai bad katei ka Jaiaw Orchestra wat la kim long ki regular members.

Katei ka Jaiaw Orchestra ka la neh bun-bun snem. Ka la pynlong ki Concert kiba bun ban iarap ia ki Hospital, ki Skul bad ban pynmih pisa na ka bynta kiba shem lanot ha ki Flood bad Jumai. Ki pynlong Anniversary man ka snem. Ki Opening Number ha kitei ki concert ka long ka “Danawelin” ne “Waves of the Danube” bad ka closing number pat ka long “Look for the Silver lining” ha kaba baroh ki nongtem ki nongrwai ki iashim bynta lang.

Katei ka Orchestra ka pynbit ban tem ia ki jingrwai Phareng kum ki Waltz, ki Rhumba, ki Samba, ki Tango, ki Bequine Tempo, ki Quick Steps bad Slow Steps bad kiwei-kiwei. Nalor ki jingiatem ki la pynmih ruh ki short plays kum “Discovery”, “Bishop’s Candlesticks” ha ka jingpynbeit jong u Bah B.R.Dohling. Ki Tham sisters ki la rwai bun bun tylli ki jingrwai ha kitei ki Concert, bad ki jingrwai ha ki ryndang ba bha bad ka jingryntih jong ki ka la pynlong ia ki nongpeitkai ban ym ngiah ban sngap ia ki ba ki rwai ia ki jingrwai kum – “Harbour Lights”, “My Happiness”, “Souvenir”, “Juanita”, “Sweet Marie”, “Mexicali Rose”, bad kiwei-kiwei.

Kumjuh ruh u Bah Sainmanik Syiemlieh bad Bah Clader Rynjah ki la long ki nongrwai kiba don ka bor bad ryndang kaba sngewtynnad bad ki rwai bad ka “expression”, kata ka dohnud bad ka jabieng ki iatrei lang. Katto-katne na ki jingrwai u Bah Sainmanik Syiemlieh ki long – “I love those dear hearts”, “Have I told you lately”, “Broken Hearts”, bad ki jingrwai u Bah Clader Rynjah pat – “Damino”, “Begin the Bequine”, “Delilah” bad kiwei-kiwei.

Ha kane ka por la mih sa uwei u samla nongrwai na Jaiaw, u Bah Markos Sawian uba don ka ryndang ba bang bad ba um bha bad ba lah ban rwai ia ki jingrwai kiba eh jong ki Platters kum – “Only You”, “Twilight Time”, “Great Pretender” bad kiwei-kiwei.

Ki Warbah Sisters, kata I kong Merinda Warbah, kong Itymon Warbah bad kong Liomon Warbah ki long kawei pat ka group kaba tyngeh bha ban rwai bad iamir bha ki ryndang. Ki ju rwai bad ka Jaiaw Orchestra kum ia ki number – “Lightning Express”, My Lonely Footsteps”, “Carolina Moon”, “Tennesse Waltz” bad kiwei-kiwei ki jingrwai.

Ngi ju ialam ha kito ki snem ia ki katto katne ki nongtem bad nongrwai kiba tbit na ka Orchestra ban ia tem ha ki “Annual Meet” jong ki Sahep Bakisha ha ki Club kiba heh ba heh sha Assam kum ia u Bah Bonerwell Lyngdoh (Guitar), Bah Everland Syiemlieh (Piano Accordian), Bah John Ryntathiang (Bela), Bah Arthur Warren (Drum). Nga la ialam ruh ia kiwei pat ar ngut ki nongtem kiba tbit bha kum U Bah Noel Arbor Khongwir (Mandolin) bad Kong Eugene Rynjah (Piano).

marynthing 013Shuwa ban leit tem sha kitei ki Club ngi la dei ban practice da ki bnai ia ki jingrwai kiba bun khamtam kiba dang thymmai. Ha kito ki por ngi ju ioh ia ki jingrwai ha ki kot pamphlet ba ngi phah na Calcutta bad Bombay kiba don ka Staff Notation bad Tonic Solfa.  Nga la dei ban pynkhreh bun spah ki jingrwai kum ki Waltz, ki Rumba, ki Samba, ki Tango, ki Foxtrot, kiBegin, ki Reels bad ban long kiba la kloi ban tem ne rwai ia kano-kano ka jingtem ne jingrwai ba ki phah ki members jong kitei ki Club. Nalor kitei ki nongtem la ialam ruh ia u Bah Sainmanik Syiemlieh bad u Bah Clader Rynjah kum ki nongrwai ki jingrwai Phareng kiba paw ha KA MARYNTHING RUPA ki long tang katto-katne na kiwei pat kiba bun ki jingrwai ba ngi la tem bha ha kita ki por. Ngi la dei ban da nang bha ban tem ban rwai namar ngi tem ngi rwai ia ki jingrwai Phareng ha ki Phareng hi. Lada rwai Phareng ha ki Khasi te ka long da kumwei pat kumba leh Sing hapdeng ki Suri, hynrei ban leh Sing hapdeng ki Sing te phi la tip hi.

Ha kitei ki por la mih ki nongrwai kiba tbit bha, kum ki jong u Bah A.B.Wahlang (Bah Toto) ba la leit rwai shaduh Calcutta, Bah Peter Shylla, Bah Herman Lyngdoh, Bah Bernard Khongmen U Lok Jyrwa bad kiwei-kiwei.

U nongtem Piano uba ju iarap bha ia ka Jaiaw Orchestra u long u Bah Persing Lyngdoh. U long uba la nang palat hapdeng ki Khasi ia ka Piano bad u lah ban tem ia kano-kano ka piece na ka kot namar u da nang bha ia ka Staff bad ulah ruh ban tem lyndet ia ki jingrwai kiba eh katno-katno khlem da peit na ka kot.

Sa uwei pat u nongrwai uba ngim dei ban klet u dei u bah Phrangsngi Kharlukhi. Ym ang ba u Bah Phrang u nangbha ban rwai Phareng hynrei u lah ruh ban put jingput da ka ktien. Nga kynmaw ba haba u rwai ha Gauhati ha kawei ka All Assam Inter-College Music Competition, u la lah ban pynbyrngia, kum u Bing Crosby, ia ki nongsngap kiba ia pyrta “Phrangki” “Phrangki”. Nangta wan sa ki jong u Bah Bransley Marbaniang bad Bah Khain Maink Roy ki nongrwai jingrwai Pharang kiba sngewtynnad bha.

Haba phai sha ki jingrwai Khasi ha KA MARYNTHING RUPA, ym lah khlem da iaroh ia ka sap thaw jingrwai jong i Bah Gilbert, namar kam long kaba jem ban shna jingrwai, bad khamtam da ki phew tylli. Lada la shu kylla Khasi ia ki jingrwai Phareng ka long da kumwei pat, hynrei ban shna la ki jong, ka long kaba eh lymda u nongshna jingrwai u don la ka sap. Haba nga ong ka sap, nga mut ka bor pyrkhat bad ka jinglah ia kano-kano ka kam ba u briew u trei. Hangne nga lah ban kdew khyndiat, ba don ki briew kiba thoh kot, hynrei haba ia kynduh ne kren pat bad ki pat, kim long KA KOT ; kiba bun tang ki suda jingtip. Don pat kiba ym shym thoh kot hynrei ki long KA KOT ; haba ia kren ia syllok bad ki, ki sei ia ki symboh pyrkhat kiba lah ban iarap bad pynioh jingmyntoi ne pynnoh synniang, la ka long haba shna jingrwai ne ha ka thoh ka tar.

I Bah Gilbert, la ngim ju iohi ne iohsngew ba i rwai ne tem jingtem, pynban i long uba ieit bha ia ka rwai ka siaw, ka put ka tem. Nga kynmaw ia i Bah Gilbert kum iwei na ki nongiarap kam ha ka kam kaba iasnoh bad ka jingpynlong ia ka All Assam Inter-College Music Competition ha Tezpur ha ka snem 1959. Nga kynmaw ba nga leit lang kum u Judge (ryngkat bad ki jong u Bah H.Teslet Pariat bad Bah Nando E Wankhar) sha katei ka All Assam Inter-college Music Competition, bad kata ka la long mynta la kumba laiphew san snem ei-ei. Ki la ia don ki Khasi Student’s, kum ki Competitors, kiba wan na ki College kiba pher ba pher ba don hapoh ka Gauhati University, bad kita ki la long ki jong u Bah Sumar Singh Sawian, Bah Newland Sohliya, Bah Teddy Pakynteiñ, Bah Ganold S. Massar, Bah Bevan L.Swer, Bah Neston Dkhar, Bah Densil Lyngdoh. Nalor ki jingtem ba ki tem bad jingrwai ba ki rwai marwei-marwei, la don ruh ka jingiarwai Kynhun, bad ka Kynhun kaba kynthup ia kitei ki nongrwai ka la ioh ka ‘Trophy’ kum ka kynhun kaba bha tam, bad katei ka ‘Trophy’ ka dang don haduh mynta ha iing jong nga kum ka sakhi ia ka jingtbit kitei ki rangkynsai ha ka rwai ka siaw, ka put ka tem. Ngam pat kynmaw ba ki samla khasi kin ioh kum katei ka nam lahduh bad ban ioh ka ‘Trophy’. Katba dang ia don ha Tezpur ha ki sngi ba long katei ka Inter College Music Competition la ia leit ban ia rwai bad ia put ia tem ha Mental Hospital, bad ruh ha Baptist Mission Hospital.

Nga la pule ia ki ktien bad kyntien jong ki jingrwai ha KA MARYNTHING RUPA. Nga tharai kin kham bang lada buh ia ki da ki sur Khasi, namar imat don ki jingrwai kiba ym da iahap eh bad ki sur jingrwai Phareng kumba la kdew. Ñiuma i Bah Gilbert ila lah pynpaw hi ia kata, bad la iehnoh ha ki nongthaw jingrwai ban nang ia thaw ia ki sur kat kum ka jingsngewbit jong ki. Ki don katto-katne ki jingrwai kiba ia dei ruh lada rwai da ka sur jingrwai ba la buh ha KA MARYNTHING RUPA. Ban shu ai nuksa harum : mshim ia ka jingrwai Phareng – “Colonel Boogie” lane “Bridge Over the River Kwai” ; ka jingrwai lehse kaba baroh ia nang ia ka sur, bad buh da ka dur (Ktien) ba nga la shna kham mynshuwa kumne:-

Shaphrang
Ki Khun U Hynniewtrep

Shaphrang
Ka um ka ding ia ia phi kim khang,
Lada phi iaid lang
Phi ia tylli bad ryntih lang.

Shirup
Shirup u lai ko Khon ka Ri
Naduh Rilang haduh Kupli
Ban skhem la riti
Ban sah nam burom
Ban im ka Ri.

(Webster Davies Jyrwa)

Katei ka jingrwai kan biang bha lada rwai paidbah ia ka ha ki kynja jingialang ban pynioh ia ka jingshitrhem “Ka Jingiatylli Ki Khun U Hynniewtrep” ha kano-kano ka kam kaba kthah ia ka iap ka im. Lane shim ia ka jingrwai Phareng “Ramona” bad buh da ka dur (ktien) kumne :-

Lanosha,
Ki por b’la leit kin wan pat

Lanosha,
Phin wan ummat jong nga kin rngat
Sa tang ha jingphohsniew
Ia dur bhabriew jong phi nang i,
Ban da don ki thapniang
Sha kut pyrthei nga ruh ngan jngi

Lanosha,
Ki lum ba jrong kin hiar madan

Lanosha,
Phin wan ia nga nangne ban tan
Sha Ri ba suk ban im bad phi baroh shirta
Lanosha – iathuh seh – ia nga.

(Webster Davies Jyrwa)

Ynda phi la rwai ia katei ka jingrwai phin shem ba ka dur bad ka sur ki iahap bad u nongrwai u lah ban rwai da ka jingshem mynsiem bad kata ka ‘expression’ ba nga la thoh shakhmat.

Ki don bun ki jingrwai Phareng kiba la pynkylla Khasi ba la rwai ha ka ktien Khasi ha kito ki por hadien ka Thma Bah hynrei ym lah kynmaw shuh ia ki. Kiba dang kynmaw malu mala ki long – “ When Whip poorwhils Call” ba la pynkylla –

Ha la i ïingtrep ba kynjah marwei,
Duitara kynud sngewsynei.
Ki khla ki dngiem ki kitbru bad ki ñiangkynjah
Sawdong i ïingtrep ki wan kynoi thiah.

U Bah Windronel u nang bha ban rwai biria, haba u kylla Khasi ia ki jingrwai Phareng u rwai –

Nga wan hynnin na Sohra
Nga wan kit u slap bad u phria.
I thei kup’ nup-bah ha u slap i shah
Ban peit tang khohwah i iapngiah.

Kawei kaba nga iohi ha ki jingrwai kiba don ha KA MARYNTHING RUPA ka long-

  1. Ka jingpynroi ia ka ktien Khasi da kaba pynrung ia ki ktien bad kyntien na kylleng ka Ri, kum Shirup-Shiliang, Kuku ne Titpu, Kynmaw (Kynmo) Tympang. Kane ka la long ka jingpyrshang jong i Bah Gilbert bad jong kiwei-kiwei de ki nongthoh kot Khasi ban iarap ban pynroi bad pynphuh pynphieng ia ka ktien khasi, kata da kaba shim ia ki ktien bad kyntien kiba iahap sbiak ha ka rukom ia kren ha ki thaiñ bapher bapher. Hapoh ka Bri U Hynñiewtrep, Talawiar U Sohpet Bneng la na thaiñ Khynriam ne thaiñ Pnar, thaiñ Bhoi ne thaiñ War. Peit ia ka jingmut jong ka ktien ‘Shirup’ –

            Shirup u ialai
            La Kam ki shipai,
            U miat i muluk i pyrthai.

Ka ktien Kynmaw Tympang ka sngewtynnad hynrei kham sngewshngiam lada buh Kynmo Tympang : kumjuh ruh ha Tre Riat ban ha Trai Riat.

  1. Ka jingpynwan biang ia ki ‘ktien Kylla kiba ngi ju ia mlien ban kren ha ki por mynshuwa ka pynsngewtynnad ia ka jingpule kum –

          Ynnai lengtynneh, ynnai litshongsheh,
          Likhaseh, ynnai leng phareh.
(Jingrwai No.12 – na ka kot ka marynthing rupa.)

           “KING MORNUD” ia phi lang baroh

                                                   (Jingrwai No.51 – na ka kot ka marynthing rupa.)

Kum ban shu pynkynmaw hangne, u Babu Soso Tham ruh ha poitry – Ki Sngi Barim U Hynñiewtrep u buh ia kum kine ki ktien kylla –
 “Bor ha la, snoh ha piew”.

  1. Ka jingbuh ia ki kyrteng shnong kiba pher ba pher kiba don ha kylleng ka Ri, kum Jaliakhola, Maheskhola, Mawlat, Shiliang Myntang, Tuber, Lapalang, Sohmynting, Mawsynram, Dawki, Majai bad kiwei-kiwei, ka pynpaw ia ka jinglah bad jingtip kaba kham bha jong i bah Gilbert shaphang la ka Ri.
  1. Ka jingbuh ia ki lum ki wah, ki kshaid ki krem ba pawnam bad ki pung ba itynnad ha ka Ri jongngi, ba ki lawei kin tip, ioh ba kine ki jah ha ka jingkylla ki jingpynlong kum U Lum Sohpetbneng, Lum Diengïei, Kshaid Nohkalikai, Wah Myntdu, Wah Umngi, bad kum ka pung Thadlaskeiñ ba la tih u Sajar Nangli bad ka kynhun ki khla ka wait jong u da ki tdong ryntieh. Kumjuh ruh kum ka Nanpolok ba la shna da u Polok Engineer ha ka por u Sahep Ward.

Ha ka jingrwai No 67, i Bah Gilbert i iathuh shaphang ka Iew Mawngap kaba la long ka Iew Khasi dei phan kaba heh tam ha kine ki thaiñ. Naduh surok bah haduh ba lait ka surok shnong, ki ieng ki ïing buh phan bad ki pylla ramhah. Ki briew na ki thaiñ sepngi ki wan kit phan da ki kulai. Ki thep ia u phan ha ki byrni ba la sdien ar liang ia u kulai bad ki kit ha la met. Da ki spah ki kulai ki wan kit phan man ka sngi ha ki por phan. Ynda ki leit phai pat sha la shnong ki shong da ki kulai kit phan ba la siang jin da ki byrni ; ki shynrang kumjuh, ki kynthei ruh bad ki pynmareh kum ki “Cowboy” bad “Cowgirl”.

  1. Ka jingbatai ia ka Kolshor U Khasi, kum na ka liang ka iadei kur iadei kha, ka kynjoh khaskaiñ haba kiew ïing thymmai, ka jer khun, nguh meikha bad kumta ter-ter. Nangta sa ki jaid jhur bad jingbam trai ri, kum u Jamyrdoh, Jalynniar, Jangew, Jathang. Nangta ka Ja Sohriew ka ja Phandieng. Haba kren shaphang ka doh-tir na Mawkyrwat, ka pynkynmaw, ba ha ki por mynshwa ki die dohsniang, khamtam ka doh ba shu tir bad ba la shet thai ha Iew Mawkyrwat bad kumjuh ruh ha Mawsynram. Lah ban bam bad tah mluh sohmynken lada khlaiñ ki bniat bad khlaiñ ka nierbah.

Ki jingrwai ha KA MARYNTHING RUPA, ym tang ba ki pynsngewtynnad ia ki nongpule ne nongrwai hynrei ki iarap ban tip shaphang la ka jong ka Ri ba nga ieit ; KA RI UMSNAM U KÑI U KPA. Nga sngewburom ia i Bah Gilbert ba i la pynkynmaw biang ia ngi kiba bun ki ‘riew rim ia ki por ba la leit – KI SNGI KA AIOM KSIAR, bad ba la bsuh shibun ki jingtip ia la ka Ri da ki ktien bad kyntien ba don ha ki jingrwai. Nga kyrmen ba i Bah L.Gilbert Shullai in nang lum bad thoh shuh ki kot kiba lah ban pynroi ia ka Culture KA KOLSHOR U KHASI.

 

 

marynthing 008-horz

Webster Davies Jyrwa,
Retired Senior Station Director,
All India Radio
and
Member, Plan Projects Committee,
National Academy of Arts,
New Delhi.

Dated Jaiaw Langsning,

Shillong

The 15th October 1984.

Have your say

comments

Raiot

Subscribe to Raiot via Email

Enter your email address to subscribe to this blog and receive notifications of new posts by email.

L Gilbert Shullai Written by:

Be First to Comment

Leave a Reply

Your email address will not be published. Required fields are marked *