Kaei Kaba Ki Nongtrei-Nongbylla Ki Angnud Na Kane Ka Elekshon 2018?

Hynne ka sngi ka 14 tarik u Rymphang 2018, 13 tylli ki Seng jong Ki Nongtrei-NongBylla, Ka Seng Ki Nongdie Madan ryngkat bad ka TUR ki la pynlong ia ka “Bread and Roses Campaign” lane “Ka Pliang Ja kaba dap bad ki Syntiew Kulab” kaba dei ka tien phira jong ki Nongtrei-Nongbylla; kaba mut ba ki Nongtrei-Nongbylla ki dei ban skhem bad shngain ha ka kam ka jam, ka kamai kajih khnang ban im ban dap ka ja ka doh, ban ioh ka koit ka khiah bad ban biang ka pule dangle ki khun ki kti. Ym tang katta ki don ruh ka hok ban kmen ban risa bad ban pynjah thait da ki rong biria ia ka jingim kaba lwait Kumta ha kane ka campaign ne ka jingiawer paidbah la pyllait ruh ia ki mat jingdawa kaba mih na ki jingiatai jong ki nongtrei-nongbylla kaba la long ha ki bnai bad snem kiba la lah.

Ki 13 tylli ki Seng, Ka kynhun ki nongdie madan bad ka TUR ki la leit ban ai ia ki mat jingdawa sha baroh ki Seng Sain Hima kiban iakhun ha kane ka election ka ban long ha ka 27 tarik Rymphang 2018 ( Ia ki mat Jingdawa la suh lang hangne).Ha ka jingiakynduh bad ki Seng Sain Hima la ai lang ruh ia ka pliang ja bad ki syntiew kulab ha ki Nongialam jong ki Seng Sain Hima. Kane ka Campaign bad ki mat jingdawa ka long ym tang ban pynkynmaw, hynrei ban kyntu ia baroh ki Seng Sain Hima ba ki dei ban shim khia ia ki jingeh jong ngi ki nongtrei-nongbylla, ban pyntreikam pura ia ki ain kiba iadei bad ki nongtrei-nongbylla, ban pynlong ia ka Jylla Meghalaya ka jylla kaba kyntiew bad ai jingiada ia ki hok jong ngi ki nongbylla bad ruh ban thaw ki policy kiba biang na ka bynta jong ngi ki nongtrei-nongbylla khnang ba ngin lah ban im pura kum ki briew bad ban ioh ia ka hok longbriew manbriew. La kyntu ruh ia ki Seng Sain Hima ba kin mih shakhmat bad pynbna paidbah ryngkat bad ki jingkular ba kin pyntreikam bad pynurlong ia ki mat jingdawa ha lane shuwa ka 20 tarik Rymphang 2018.

KINE HARUM KI LONG KI MAT JINGDAWA BA BNIAH

Ka Bai Bylla/Tulop

  1. Dei ban kyntiew ia ka bai bylla sngi bad tulop khnang ba kan kyrshan ia ka jingim ki Nongtrei-Nongbylla bad ia ka iing ka sem. Dei ban kyntiew bad pyntreikam katkum ka jingai jingmut jong ka Meghalaya 5th Pay Commission, ka Sorkar Meghalaya, kaba long Rs 580 shisngi ka bai bylla ia ki nongtrei Sorkar kiba rit tam, kaba mut ba ki nongtrei-nongbylla ha Meghalaya ki dei ban ioh bai bylla ym duna ia kaei kaba ki nongtrei sorkar Meghalaya kiba rit tam ki ioh shi sngi. Lah ruh ban kyntiew katkum ka jingkdew ka 15th labour commission bad ka Raptakos Judgement bad kane ka jingkyntiew bai bylla bad tulop ka dei ban long na ka bynta baroh ki nongtrei-nongbylla kiba trei ki jait kam ba pher, ki nongbylla rep, ki misteri, ki nongbylla sngi, kiba trei iing briew, kiba trei ha ki Sengbhalang, ophis sorkar, private company bad kiwei.
  2. Ia mynta hi ka Sorkar Meghalaya ka dei ban hukum ba ka bai bylla sngi kan long katkum ka bai bylla ba buh da ka Sorkar India ha ka hukum ba la pynmih da ka Ministry of Labour and Emplyment Govt of India, tat haduh ba ka Sorkar Jylla ka la lah ban pynbeit da kaba thymmai.
  3. Dei ban thaw lad ban pynsuk ia ki nongtrei-nongbylla ban ai jingujor haba ka bai bylla ka duna than eh.
  4. Ha ki jaka treikam ba ki nongtrei bylla ki treikam 5 sngi ha ka shitaiew, ki nongtrei casual bad ki nongtrei kiba shu thung da ki contractor ruh ki dei ban ioh bai bylla na ka bynta ki 2 sngi ki sngi shongthait.
  5. Ban siew bainong katkum ka Ain ia ki kynta ba ki nongtrei ki trei palat ia ka por treikam.
  6. Ka dei ban don ka Ain kaba thikna ban pyniaid ia ka rukom thung kam bad treikam jong ki Nongap iing ne Security Guards, Meghalaya Home Guards Volunteers. Kane ka Ain ka dei ban ai ka jingshngain bad jingiada ia ki nongtrei kiba trei ia kine ki jaitkam. Naduh ka bai bylla, ki kynta treikam, ka koit ka khiah bad kiwei ki jingdonkam ki dei ban long kiba biang briew, ym ban pyntrei mraw ia ki. Ka bai bylla jong ki ka dei ban long mar ryngkat bad ka jingioh jong ki Watch and Ward ba la mang da ka Sorkar pdeng.
  1. Dei ban pyntreikam noh mardor ia ka rai bad hukum jong ka Supreme Court kaba iadei bad ka Equal pay for Equal work. Kaba mut ka bai bylla/tulop ka dei ban long mar ryngkat na ka bynta kajuh ka kam ba ki nongtrei ki trei.
  2. Na ka bynta ki Nonghikai Skul bad ki bym dei ki nonghikai ha ki Skul Private kaba kynthup ia kiwei ki nongtrei kiba trei ha ki Skul ba pyniaid katkum ki kyndon ka CBSE/CICSE ka bainong/tulop jong ki ka dei ban long katkum ki kyndon bad jingkdew (Guidelines) jong ka CBSE/CICSE Board bad dei ruh ban ai ha ki nonghikai bad nongtrei ia kiwei de ki hok kum ki shuti, ki jingsiew increment, gratuity bad kiwei.
  3. Ka MBOSE ka dei ban shna noh mardor ia ki kyndon treikam na ka bynta ki nonghikai skul/nongtrei ha ki skul kiba hap hapoh ka MBOSE bad ki kyndon treikam ki dei ban long katkum ki kyndon jong ka CBSE/CICSE.
  4. Ki Nongtrei Aanganwadi, Asha, ki nongshet jingbam Midday Meal, Ki Nonghikai/Nongtrei ha ki skul SSA ki dei ban ioh noh da ka tulop kaba thikna, ym shuh da kaba shu siew bai burom.
  5. Dei ban thung bad pyntreikam noh ia ka Wage Board Salary na ka bynta baroh ki nongthoh kotkhubor bad ia kito kiba trei ha ki kam pathai khubor.

Ka Jinglong Jingman ka Treikam Treijam

  1. Dei ban pynbeit mardor ia ka jinglong jingman ha ka treikam treijam kaba la ktah jur ia ka jingim bad longbriew-manbriew jong ki nongtrei-nongbylla.
  2. Dei ban pynskhem bad pynshongshngain ia ki kam ba ngi trei. Kumta dei ban pynbeit bad pynskhem noh ia ngi ki ba trei ha ki ophis bapher bapher kum ki casual/adhoc/contract/mandays/daily wage etc. Bad dei ban pynsangeh shi syndon ia ka rukom thungkam kaba tang shipor, casual/adhoc bad ka jingthung kam lyngba ki contractor.
  3. Ha ki Ophis Sorkar bad bym dei Sorkar ka dei ban don ka rukom thungkam kaba shai bad ba khuid. Dei ban pyllait paidbah ia ki jubab jong ki nongialeh eksamin bad dei ban ring dur video ia ki interview thungkam.
  4. Dei ban pynbeit mardor ia ka rukom thungkam lyngba ka DSC bad MPSC. Ka rukom thungkam ka dei ban long kaba shai, ba khuid bad ha ka por.
  5. Ki nongtrei ki dei ban ioh ki shithi bad ki kot ki sla kiba batai shai ha ka por ba ki shah thungkam.
  6. Dei ban batai shai ia ki jaitkam bad dei ban phiah ia ki kam ki jam katkum ka sap, ka jingnang jingtip, ka jingshemphang bad kyrdan pule.
  7. Na ka bynta ka jingkyntiew bad jingpynbeit ia ki bai bylla/tulop dei ban iamir jingmut lang bad ki nongtrei.
  8. Ki snem treikam ba u/ka nongbylla ki la pyllut ka dei ban long ka nongrim ai kam bad phiah kam bad ka nongrim ban kyntiew ia ka bai bylla.
  9. Ki nongtrei nongbylla ki dei ban ioh ki jingmyntoi na ka PF, Health Insurance/ESI, Gratuity bad Pension. Kane ka jingmyntoi dei ruh ban long na ka bynta kiwei ki nongtrei kiba treikam ha ki Private Company bad ki jaka treikam bym dei Sorkar.
  10. Dei ban pyntreikam thikna ia ki hok jong ki nongtrei kum ki shuti bad ki shuti por ba kha ba pun khun. Dei ban pyntreikam thikna ia ka Ain Shops and Establishment Act jong ka Sorkar Meghalaya.
  11. Baroh ki nongtrei ki dei ban ioh ka lad ban kiew kam ha ki jaka treikam jong ki.
  12. Dei ban pynsangeh noh shi syndon ia ka jingthung kam ia ki briew kiba la shongthait.
  13. Ban iada ia ki hok jong ki nongbylla bar Jylla bad ba ki Nongaikam ki dei ban register ia ki bad ki bor Shnong/District Council/Sorkar bad kiwei pat khnang ba ma ki ruh kin ioh ia ki hok kum ka koit ka khiah, ka pule dangle ki khun ki kti, bai bylla bad kiwei kiba long katkum ka Ain bad Riti Synshar.
  14. Dei ban pyntreikam thikna ia ka Ain Unorganized Workers Social Security Act, 2008 ka ain kaba iada bad ai jingshngain ia ki Nongtrei-Nongbylla kiba treikam ha ki jaka bym dei jong ka Sorkar bad kiwei de ki jaka treikam bad dei ban thaw biang ia ka Meghalaya State Social Security Board ha kaba dei ban don ki Nongmihkhmat na ki Seng jong ki Nongtrei-Nongbylla.
  15. Ka Meghalaya Building & Other Construction Worker’s Welfare Board ka dei ban don ki kyndon ba dei ban register ia baroh ki nongtrei kiba trei ia ki kam shna iing kaba kynthup ruh ia kiba na bar jylla khnang ba ki nongbylla kin ym duh ei ia ki jingmyntoi bad ia ki hok ba ki nongbylla ba ki dei ban ioh. Ha kine ki Board ki dei ban don ki nongmihkhmat na ki Seng jong ki Nongtrei-Nongbylla.
  16. Dei ban thaw ia ka Meghalaya Workers Welfare Fund na ka bynta ban kyrshan ia ki Nongtrei-Nongbylla baroh kiba treikam ha ki jaka treikam ba pher ba pher. Kane ka Fund kan dei na ka bynta ban thaw ia ki scheme kiba pher, ban ai jingiarap bad kyrshan ia ki nongtrei casual, ki nongbylla sngi, kiba trei hapoh ki contractor bad kiwei dei.
  17. Katto katne bynta na ka khajna ba ka Sorkar ka ioh bad lum na ki kharkhana bad ka jingtih bad jingdie ia ki mar poh khyndew dei ban kynshew ha kane ka Meghalaya Workers Welfare Fund khnang ban lah ban kyrshan bad ai jingiarap ia ki Nongtrei-Nongbylla kiba treikam ha ki jaka bym dei jong ka Sorkar/unorganized sector bad ban kyrshan ia kiba trei casual, kiba shah thung kam shipor bad kiba shah thungkam lyngba ki Contractor.
  18. 75% na ka jingnoh synniang ki Company/Kharkhana sha kata kaba ki khot ka CSR ne ka synniang na ka bynta ban pynbha bad kyntiew ia ka imlang-sahlang, ka dei ban leit sha kane ka Fund katkum ba la pruid dak ha ka Ain.
  19. Dei ban thungkam tang ia kiba ha iing kiba jan tam jong u/ka nongtrei kiba khlad/mynsaw ha ki jaka treikam bad ha ka por ba treikam.
  20. Ym dei ban beh kam iano iano khlem ki nongrim bad ki daw kiba shong nia shong ain. Ym dei ban beh kam iano iano ruh tang na ka daw ka jinglong dkhot jong ki ha ki Seng jong ki Nongtrei-Nongbylla ne ba ki nongtrei ki mudui pyrshah ia ki nongiakam ne ba ki don la ki jong ki jingpyrkhat halor ka sain hima sima ka bym iadei satia bad ki nongaikam ne ba ki iapher ha ka jingngeit ne ka rong ka snieh doh ne ka jinglong kynthei jinglong shynrang ne namar ba ki pang bad ba kim shym lah ban poi trei da ki bun sngi ne ba ki pun bad kha khun bad kumta ter ter.
  21. Dei ban don ka jingjurip kaba bniah bad thikna halor ki kharkhana bad kiwei ki jaka treikam.

Ka Jingiada bad Jingshngain Ia Ki Nongtrei-Nongbylla:

  1. Dei ban don ki ESI Hospital ha Meghalaya, ym tang ki ESI Dispensari.
  2. Dei ban don bad pynbiang ia ki kali kamai paidbah na ka bynta ban kit ban bah ia ki nongtrei-nongbylla sha ki jaka treikam bad ruh dei ban pynduna ka bai kali ia ki nongtrei-nongbylla.
  3. Kino kino ki seng khaii/kharkhana paidbah ne ba pyniaid da ka Sorkar ki dei ban noh synniang kham bun sha ka koit ka khiah bad ka pule puthi na ka jingioh nong ba ki ioh.
  4. Ka Sorkar ka dei ban bthah ia ki tnat treikam ba kin thied kin pet ia ki jingdonkam na ki dukan Cooperative ba seng bad pyniaid da ki Nongtrei-Nongbylla.
  5. Ka Sorkar ke dei ruh ban pyrkhat bad ban shna ne kyrshan pisa ban shna ia ki iing shong iing sah kiba bit dor na ka bynta ki Nongtrei-Nongbylla bad ruh ban kyrshan ia ki kynhun shna iing shong ba pyniaid da ki Nongbylla.
  6. Ki nongtrei casual ne kiba shu shah thung contract bad kiba la trei slem ha ka kam ki dei ban ioh ki jingmyntoi bad ka jingithuh kaba khmat eh ha ki jaka treikam ha ka por ba ki thep kyrteng ne apply ia ki kam thymmai ha ki jaka treikam ba ki la trei lypa. Dei ban pynjynsur ruh ia ka rta jong ki lada ki thep kyrteng ne apply ia kino kino ki kam ba thymmai kiba mih.
  7. Ki ophis bad ki tnat treikam iada ri ka Sorkar India kiba don ha ka Jylla Meghalaya ki dei ban mang kyrpang ka bhah thungkam ia ki trai shnong ka Jylla Meghalaya ha ki jait kam ba lah ban trei ki riew paidbah.
  8. Baroh ki private company/ki kharkhana bad ki jaka treikam ba pyniaid da ki riew shimet ki dei ban bud pyrkhing bad pyntreikam ia ka Meghalaya Reservation Policy.
  9. Ki District Council ki dei ban buh ka kyndon ha ka trading license ba ki Company ne kino kino ki riewshimet kiba pyniaid ia ki kam khaii ki dei ban bud pyrkhing bad pyntreikam ia ka Reservation policy jong ka Jylla ha ka thungkam thungjam
  10. Ka Reservation Policy ka dei ban don jaka ia kiwei ruh ki Jaitbynriew rit paid kiba don ha Meghalaya.
  11. Dei ban don ki skul na ka bynta ki khun ki kti jong ki Nongtrei nongbylla
  12. Baroh ki Nongtrei-Nongbylla ki dei ban don bad ioh ka bai bam hadien ba ki la shongthait na ki kam.
  13. Dei ban pyntreikam noh ia ka Ain The Rights of Persons with Disabilities Act 2016.
  14. Ki lad iohkam iohjam kim dei ban don tang ha Shillong ne Tura, hynrei dei ban thaw ki lad iohkam iohjam ha man la ki district headquarter/sub-division bad ki shnong kiba kham heh.
  15. Dei ban thaw noh ia ka Ain ka Meghalaya Grievance Redressal Act bad ban kdew shai bad pyntreikam ia ki hok bad jingdonkam jong ki nongshong shnong ha ka por kaba biang
  16. Ba ym dei ban pynbor ia ki briew ban pynrung kyrteng ha u Aadhaar Number na ka bynta ban ioh ia ki jingmyntoi.

Ki Nongdie Madan/Surok

  1. Dei ban pyntreikam noh mar dor ia ka Ain jong ka Sorkar Pdeng (Central Street Vendors (Protection of Livelihood and Regulation of Street Vending) Act, 2014 ) kaba iadei bad ki Nongdie Madan/Surok bad dei ban pyndam noh ia ka Ain ka Sorkar Jylla.
  2. Ka Sorkar Jylla ka dei ban thaw noh ia ka pension fund ne ka bai bam tymmen ne ka bai bam hadien ba la shongthait na ka kam na ka bynta kito kiba treikam lajong kaba kynthup ia ki Nongdie madan.
  3. Dei ban don ki jaka buh ia ki mar ki matta bad ki kali ba kyrpang ban kit ia ki mar matta ne ki jingdie jingthied jong ki Nongdie madan.
  4. Baroh ki dukan die jingdie ha ki jaka sor ki dei ban don ki jaka ba la bhah bad mang kyrpang na ka bynta ki nongdie madan.

Ki Nongtrei-Nongbylla Kynthei.

  1. Dei ban thaw noh ia ka Internal Complaints Committee (ICC) bad Local Complaints Committee (LCC) katkum ki kyndon ain ka Sexual Harassment of Workmen at Workplace (Prevention. Prohibition and Redressal) Act 2013 ban iada ia ki kynthei na ka jingshah lehtohmet bad shah leh beijot ha ki jaka treikam.
  2. Ki ICC bad LCC ki dei ban treikam katkum ki kyndon ain bad ki dei ban kynthup ia ki briew kiba na shabar ban long ki dkhot.
  3. Dei ban pynbna paidbah ia ki hok jong ki kynthei ha ki jaka treikam katkum ba la pruid dak da ka Ain Sexual Harassment Act 2013.
  4. Dei ban pyntreikam pyrkhing ia ka Ain Maternity Benefit Act, ka ain na ka bynta ka kha ka pun ki kynthei , ha baroh ki jaka treikam.
  5. Dei ban don ki jaka ri bad sumar khyllung kiba bha bad ha man la ki jaka treikam kiba don ym duna ia shiphew ki nongtrei kynthei dei ban don ia ki jaka ri khyllung kiba biang ha kita ki jaka treikam.

Ki Nongrep Bad Ki Nongbylla rep.

  1. Dei ban ai ka jingkyrshan ia ki nongrep bad ia ki mar rep ba ki pynmih katkum ka jingai jingmut u M.S Swaminathan.
  2. Dei ban don bad shna ia ki jaka buh mar rep kiba biang bad kiba paka. Ia kine ki jaka buh mar rep dei ban longtrai bad pyniaid da ki Nongrep ne ki Seng Nongrep.
  3. Dei ban pynbun ia ki iew na ka bynta ki mar rep bad ban pynkhlain ia ki iew Shnong, Iew Raij/Elaka, ne Iew Hima
  4. Dei ban pynduna ia ka dor bai kit bai bah ia ki mar rep jong ki nongrep kiba rit seng.
  5. Dei ban pynioh ha ki nongshong shnong ia ki jaka rep.
  6. Dei ban don ka jingpyrkhat thymmai ia ki kam khyndew na ka bynta ban pynneh pynsah ia ki jaka rep bad ban khang lad shi syndon ban shna ia ki karkhana ne kino kino ki jingtei ha ki jaka rep ne ban khang ia ka jingshim ia ki jaka rep na ka bynta kiwei pat ki jingdonkam.
  7. Baroh ki longing kiba la duh noh ka khyndew na ka daw ba ka Sorkar ka shim na ka bynta ban tei ia ki karkhana ne ki ophis treikam ki dei ioh kam ha kita ki karkhana ne ophis treikam kiba tei ha ki jaka jong ki.
  8. Dei ban iasam bynta lang ia ka khyndew ka shyiap sha ki trai jylla (Khasi/Jaintia/Garo) ki bym don shuh ka khyndew ka shyiap ban shong ban sah ne ban rep ban riang.
  9. Dei ban shna noh ia ka Ain Land Ceiling Act ka ban khang bad buh pud katno u/ka riew shimet ki lah ban thied khyndew.
  10. Ban pynkhlain ia ki Bank Nongkyndong.
  11. Dei ban pyllait ha ka por ia ka bainong kaba ioh na ka bylla shi spah sngi ne NERGS.
  12. Dei ban pynshlur bad kyntiew ia ki karkhana mar rep, kum ki karkhana shna umsoh, wain, jingbam, thain shylliah, thain jain bad kiwei kiwei.
  13. Ka sorkar ka dei ban pynbun ka jingbei tyngka sha ki kam ban ai jingiarap bad ai bai seng ia ki Nongri jingri kum kiba ri sniang, masi, syiar bad kiwei.
  14. Dei ban don ka jingmang pisa kaba bun bad kaba kyrpang na ka bynta ki mar rep khnang ban iada ia ki nongrep ha ka por ba lynshop ka khlam, u phria, u slap bad kiwei bad dei ban pynkloi ha kaba pyllait ia ki song jingiarap ia ki nongrep kiba ngat ha ka khim khait.

Ki Ain Na ka Bynta Ki Nongtrei-Nongbylla:

  1. Dei ban iada bad pynneh ia baroh ki Ain kiba iadei bad ki Nongtrei-nongbylla.
  2. Ka Sorkar Jylla ka dei ban pynlong ia ka jingialang kaba shi sien shi snem na ka bynta ki nongtrei-nongbylla. Baroh ki seng jong ki nongtrei nongbylla ki dei ban iashim bynta bad kino kino ki jingpynkylla ia ki Ain jong ki Nongtrei Nongbylla dei ban iatai bad iasiad shuwa ha kane ka jingialang.
  3. Dei ban thaw bad buh ia ka ophis jong ka Central Labour Commission ha Nongbah Shillong khnang ban pynsuk ia ki Nongtrei kiba treikam ha ki tnat treikam ka Sorkar pdeng.
  4. Dei ban don ki telephone number ba ki nongtrei ki lah ban phone bad ujor ha kano kano ka por ba ki shem jingeh khnang ba ki lah ban ioh ki jingiarap
  5. Ki Labour Board ne ki kynhun treikam kiba peit na ka bynta ka bha ka miat jong ki nongtrei-nongbylla ki dei ban don ki nongmihkhmat na ki baroh ki Seng jong ki Nongtrei-Nongbylla.
  6. Dei ban ai jingithuh ia ki Seng jong ki Nongtrei-Nongbylla ha ka por kaba biang.

 

 

 

 

Have your say

comments

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 14,054 other subscribers

Be First to Comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.