Ka Kynthoh Halor Ka Kynhun Nongrwai TARIK

Ka 30 Nohprah 2015 kan dei ka janmiet ka ban sah jingkynmaw ba ka Kynhun Nongrwai TARIK ka la pyllait paidbah ia ka thup jingrwai jong ka kaba la ai kyrteng “Khanatang Parking Lot bad ki Mawbynna Dew Bilat” ha Savio Hall, Laitumkhrah Shillong. Ka jingpyllait paidbah ia ka thup jingrwai ha Shillong ka long hadien ba ka Kynhun ka la iaid kylleng ki Sorbah, kum sha Benguluru, Delhi, Gurgoan bad Guwahati. Une u nongthoh um dei uba tip ia ki jnit ki jnat jong ka tem ka put ne ka rwai ka siaw, tangba haba don ba tied ia ka ksing ka dhah ne haba ki kti ba jem jong no re ki tied ia ki ksai jingtem ar ksai ne lai ne saw ne hynriew ne phra ksai, ym lah khlem da kyrdem kjat ne haba dei ba dei ban khyrwait syngkai katba ka rta u budlum ka dang biang. Kumta ym don ka dohnud maw ka ban ym um lin ha ki sur jingrwai bad ki sur jingtem kiba pynkmen bad pynkyndeh ia ka mynsiem. Nalor nangta, “shi lain ka poitri ne jingrwai lah ban pynmih shi volume ka histori”, ong I babu Soso Tham. Lehse ioh don ruh kiba sngew khohnioh ba ka tem ka put ne ka kam ki duhalia ka dei tang ka rong ka taw, ka tamasa ne ka rong biria, hynrei I Bah R.S Lyngdoh pat I ong, “…ka jingim bun kam khlem ka rongbiria ka pynlyngkot ia ka rta…ka biria, ka phawar, ka risa ka kynhoi bad ka shad ka kmen ka pynthanda ia ka jingim ba lwait bad ba thait.”

Khlem da bunktien shuh to ngin phai mynta sha ki katto katne ki jingkynthoh:

Ha ka jingpyllait paidbah ia ka thup jingrwai ha Shillong, ka Kynhun nongrwai TARIK ka la pynlong da ka concert bad ha katei ka concert la nang pynshlei shuh shuh ia ka rynsan da ka jingiasynran lang jong kiwei pat ki nongrwai, kita ki long Gwyneth Alicia, Crypto Graphik Street Poets, Blue Temptations bad Institute of Traditional Music and Dance, Nongrim Hills.

Gwyneth Mawlong
Gwyneth Mawlong

Ym lah ruh khlem da kynthoh ia ki katto katne ki jingrwai ba kine kiwei pat ki nongrwai ki la ai ha katei ka concert, kum ka Syrngiew ba la thaw bad rwai da I Gweneth, ka jingrwai kaba kren shaphang ka jingieit kaba ia mynta ki briew ki lah ban ong ba ka long kaba pher ne kynsha, kumta ym lah ban pdiang ia ka ha ka imlang sahlang. Hato ka jingieit ka pher kumno? Hato lah ban ong ba ka jingieit ka dei kaba kynsha? Ka jingieit te ka dei hi ka jingieit bad kam don da kawei pat, ka jingieit ka kup ia ka juh ka rong bad ka kren da ka juh ka sur. Ka kynhun nongrwai Rap, kaba la tip kum ka Cryptographik Street Poets (CSP) ka la ai la ki jong ki jingrwai. Shi sien sngap ka long kaba shitom ban ioh kem ia ki kyntien ba ki khlei, pynban kane ka kynhun lyngba ki jingrwai Rap ka sei madan ia ka sain pyrkhat ne ka rukom sngewthuh kaba iasnoh bad ka Synshar-Khadar, ka Imlang-sahlang bad kumta ter ter bad lyngba ki jingrwai Rap ki siat pharshi bad kren shaphang ki jingeh jingshitom bad ki ishu ba pher bapher kiba ktah ia ka jingim.

Cryptographic Street Poets
Cryptographic Street Poets

 

Ym ju kham shem koit ba ha ka jingpyllait paidbah ia ka thup jingrwai, ka Kynhun Nongrwai TARIK kam shym la khot iano iano ruh napdeng ki kynrem ki lyndan, ki kynthem ki kynjai ne ki riewpaw khmut paw khmat ne ki reiwdonburom ban long kum u/ka/ki kongsan ( Chief Guest).Pynban ka pynkyndit ban iohi ba ha ka jingkhang ban rung sha ka jaka ba ki tem ki put ka don ka jingthoh kaba ong , “ No Branding, No Logo, No Khlieh shrieh, No VIPS”. Kaei ka jingmut jong kine ki kyntien? Kaei kaba ka kynhun Nongrwai ka thmu? Ka pynpyrkhat namar ha kane ka juk ban phuh ban phieng ka rongbiria, ka tamasa ngi donkam ia ki nongbei tyngka, kiba ha kajuh ka por pat ki don ka hok, ka bor ban pynkbum ia ka shyntur jong ngi bad ngin ym lah ban kren ne rwai ne sei madan ia kaei kaba ngi ngeit ne pyrkhat, wat lada ngi don ka sap. Ka sap ne ka pyrkhat ba ngi don ka shah tyllep ha ka phuh ka phieng bad shah niad rong ym tang ka shynrong hynrei wat ka jabieng kaba don hapoh ka shynrong .

No Khlieh Shrieh, No V.I.P.s
No Khlieh Shrieh, No V.I.P.s

Ha kane ka concert bad jingpyllait paidbah jong ka kynhun nongrwai TARIK, lah ban ong ba ka dei ka concert kaba duna briew tam. Ki briew kiba wan sha kane ka concert ki don tang da ki phew ngut bad lah ban niew ha ki shympriah kti. Kiba wan sha ka concert lah ban ong, ba kiba bun ki dei ki paralok bad nongai mynsiem jong ka kynhun nongrwai. Kaei ka daw mo? Hato kan dei ba ki briew kim pat ju iohsngew shaphang kane ka kynhun ne kim pat ju iohsngew ia ki jingrwai jong ki? Ka kynhun nongrwai TARIK ka rwai ki jingrwai ba ka thaw hi bad ka rwai ruh ia ki jingrwai jong kiwei pat, tangba kam rwai ia ki jingrwai jong ki nongrwai ba iatip paidbah ne ba ialah lyndet kumba ka ju long ha kiwei pat ki concert. Ki jingrwai ba ka Tarik ka rwai ki shat phalang ia ka jinglong ha ka imlang sahlang, ka synshar, ka khaii-pateng bad kumta ter ter. Kumta ha ka concert jong ka TARIK ka don ka jingiaphnieng ne jingiatan tyllai hapdeng ka politics bad ka popular.

Ka shong ha ki nongsngap ban pynshai shynna (interpret) ia ka kyrteng jong ka thup jingrwai jong ka TARIK, “ Khanatang parking lot bad ki Mawbynna Dewbilat”. Imat ka kynhun TARIK ka ieng ban rwai na ka phang jong ki riewmadan (margins) bad ka jingpyrsad mynsiem ka wan na kiba im ha trai duh jong ka pyrnon jong ka imlang-sahlang, na kiba shong die wai dong ne nongdie jhur die soh ha madan ne na kiba khem umja na u maw ne ka nar bad kiwei kiba kum kita. Ha kane ka jylli jong ka imlang-sahlang ym don burom ban da rapjot, wat ka iing shong iingsah ruh kaba pei thliew bad ki para marjan ki iohi bad iohsngew lut aiu ngi iakren ne leh. Ka lah ban long ba kawei na ki jingrwai kaba kyrteng “Burom Class” ka thew sha ka imlang sahlang kaba phiah kyrdan, kaba leh mynleh, kaba arsap, kaba lah shilliang bad leh shilliang khmat. Katba ki Mawbynna Dewbilat pat kin kren aiu? Ngi im ha ka juk bam, ym ka juk buh. Ngi bam ngi klun lutkhait mynta, ngim buh shuh na ka bynta ki pateng ne ki longdien kiban sa wan. Ngi die duh ia ka khyndew ka shyiap, ngi pynkhyllem ia ki lum ki khlaw ki btap, ngi khlong lut khoit ia ki marpoh khyndew bad ngi shlan ban leh ia kane ha ka nongrim ban im, ban kiew bad ban roi ka Ri. Ka kyrteng Ri ne Jaidbynriew ki dei ki kyntien kiba ngi pyndonkam bakla shaba palat. Ngi arsap namar ngim lah ban pdiang ba ngim lah ban im marwei bad kum ka Ri ngi hap ban ia kyrshut met, ia lymbub bad iakhublei kti bad kiwei pat. Na kiba bun kiwei pat ki Jaidbynriew kiba ka Ri ka iadei kam ne ialymbub ne iakhublei kti, don kiba ngi tang shu saham ki la tieng bad ia kum kita ngi kyrdem bad don pat kiba ngi salam bad ia kum kita ngi nguh ngi dem la kumba ha khmat ki Blei. Ki kyntien kiba don ha ka jingrwai kaba kyrteng “New Green Thing” kiba ong “ peit ialade ha it bad ong, la thait la jlep ka leit wad kam, ha khyndai lad la bun ba bam ki kruin, katba dang shongshit ka tamasa, paki dulan ryngkew basa sha beh ki Blei ban shong kaia.” Ki lei thymmai ka roi ka par ki khein dewthala ia ki ryngkew ki basa bad kim khein briew ia ka Jaidbynriew ne ia ki para briew, ki thom naphang tang ban lum spah bad ban roi ban par. Une u dei u Blei thymmai ba ka Jaidbynriew ka salam, ka nguh ka dem, ka phai khmat , ka phirat bad ka duwai.

Album Launch gig, Savio Hall, Shillong
Album Launch gig, Savio Hall, Shillong

Ki kyntien jingrwai jong ka kynhun TARIK ym tang ba ki long kiba khor, hynrei ki nep ruh kum ka tari kaba la shut janai. Ha kawei pat ka jingrwai kaba kyrteng Moral Police”, ka jingrwai kaba kynthoh ia ki bor kiba kham halor, la ka long ki bor pulit ne sorkar ne seng ne seng niam ne wat ki kmie ki kpa ne kiba la san, kiba pyrshang ban pyniaid ne ban batai ia ka jingim jong kiba kham rit ne ki khun bad pyrshang ban pynbor ha kiba rit kumno ban im. Kaei kaba ki bit ban pule bad kaei kaba kim bit ban pule, kaei kaba ki bit ban peit bad kaei pat kaba kim bit ban peit, kaei kaba ki bit ban phong ban kup bad kaei pat kaba kim bit ban phong ne ban riam ban beit.

Dang shen ka la don ka jingiatai lyngba ki jingthoh , la ka Shillong ka dei shisha ne em ka nongbah ba paw nam ha ka pyrthei ha ka liang ka put ka tem bad ka rwai ka siaw (Shillong as Rock Capital). Ha kaba iadei bad ki jingrwai phareng, da ka burom ia ki nongrwai , ki nongtem bad ki nongput, ha Shillong phin shem ba uwei ne kawei ka briew ki lah ban tem ne rwai ia ki jingrwai kiba laiphew skit bad ia ki jingrwai jong ki nongrwai ba pawnam jong ka pyrthei. Hato ka Shillong ka ioh ia ka nam kum ka Rock Capital tang namar kane ka daw? kam don jingmut ei ei ruh em ban ioh ia kane ka nam lymda ka Shillong ka lah ban thaw ne pynmih ne sei madan ia la ki jong ki jingrwai bad sur jingrwai. Hapdeng shibun ki jingeh bad ki jingduna ka kynhun Nongrwai TARIK ka pyrshang ban sei madan la ki jong ki jingrwai ne ki sur jingrwai kiba don ruh ha ki ia ka sain pyrkhat.

Album Launch gig, Savio Hall, Shillong
Album Launch gig, Savio Hall, Shillong

Kawei na ki jingiakhun kaba khraw kaba ka kynhun nongrwai TARIK ka iakynduh bad kan sa nang iakynduh ka long kumno ban pynsaphriang ia ka sain pyrkhat kaba don ha ki jingrwai bad sur jingrwai jong ka. Kan nang kham eh shuh shuh ia ka Tarik namar ba ka ngeit ha ka kyrshan hi. Ym lah khlem da iaroh ia kane ka kynhun kaba la trud ia ka maw ka dieng ban lah ban pynmih bad pyllait paidbah ia kane ka thup jingrwai.

Katba nang iaid ki por nga ngeit ba ka TARIK kan nang pynbha bad iai saindur thymmai ia ki jingrwai bad ki sur jingrwai. Ha akher ka sngi ki jingrwai bad ki sur jingrwai jong ka kin pynkhih pyrthei bad kin pynbthei ia ka thma jong ki paidbah kiba ieng ban iakhun, ban iada bad dawa ia la ki jong ki hok-la ka long ka hok ban iohkam iohjam, ka hok ban ioh ia ka jingkoit jingkhiah bad ban ioh ka jingim ba pura bad ba dap kyrhai.

Snem Thymmai ba khiah krat, ba bit ba biang ki kam ki jam,ka kamai kajih.

Album Launch gig, Savio Hall, Shillong
Album Launch gig, Savio Hall, Shillong

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Kyrsoibor Pyrtuh Written by:

Kyrsoibor Pyrtuh is a pastor interested in intersection between theology and social power

Be First to Comment

Leave a Reply