NGI KI NONGDIEMADAN NGI KYNTAIT IA KA JINGAI FORM KA TVC MUNICIPAL

Ka Meghalaya and Greater Shillong Progressive Hawkers and Street Vendors Association, ka Seng jong ki nongdiemadan bad rud lynti lang bad ka TUR ka khot ka wer ia phi ki para nongdiemadan bad ki nongshong shnong ban iasnoh kti lang bad kyrshan ia ka jingiakhih bad jingiakhun jong ngi na ka bynta ban iada bad pynioh ia ki hok ban kamai ja kpoh, ban bylla sngi, ban trei ban ktah bad ban ieng ha la ki jong ki kjat.

Lyngba kane ka jinthoh ngi kyntu ia phi ba phin ym shah pynbieij ha ka bor sorkar halor ka notification ne ka jingpynbna ba la pynmih lyngba ki kotkhubor ha ka 12.12.16 ha kaba ka khot ia ki nongdiemadan ba kin wan shim ia ki phorm na ka ophis Municipal. Ha ka sngi kaba nynkong kata ka 14.12.16 ba sam form, kiba bun ki nongdiemadan ki kyntai bad khlem leit shim form. Ngi dei ban ryntih ha kane ka jingkyntait ia kane ka jingpynbna ka Sorkar halor kine ki nongrim:

  1. Ia ka notification la pynmih da ka Town Vending Committee (TVC) kaba long be-ain namar khlem thaw ia ka kat kum ki kyndon ain jong ka sorkar kmie ha kaba la bthah shai ba 40 na ka shispah ki dkhot jong katei ka committee ki dei ban long ki nongdiemadan. Lah bhah kyrpang kumne namar dei tang ki nongdie madan kiba tip shai halor ki para nongdie madan bad ruh ia ki jingeh bad jingdonkam jong ki nongdiemadan ba ka TVC ka dei ban khmih. 
  2. Ka notification ka kren shai ba ka jingai phorm kam dei ka jingkular ban ai ia ki hok ne license sha ngi ban ioh shong die jingdie ha madan. Te kumta, ka jingma ka ap ia ngi bad ba ki license ban shong die madan kin leit pynban sha ki kato katne ngut ki briew kiba don jingiadei bad ki bor Municipal/TVC bad ka lah ban long ba kita kiba ioh license kim dei kiba im jakpoh na ka jingdiemadan bad kine ki lah ban die ia ki license sha kiwei pat, ha kane ka rukom kan pynkha sa kawei pat ka bamsap kaba shyrkhei bad ka ban nang pynduk shuh shuh ia ngi. Nangta ka notification ka khlem buh por ba lano ka sorkar kan pyndep ia kine ki kam ban khmih ia ki phorm bad ban ai license. Ha u snem 2009 ruh ka municipal ka lah khot ia ki nongdie madan ban thep phorm hynrei bun na kiba thep phorm haduh mynta ruh ki khlem ioh jingtip ei ei na kane ka ophis Municipal la ki la ioh license ne shah kyntait. 
  3. Mano ban khmih ia ki phorm bad halor ki kyndon aiu yn thew ia kine ki phorm bad ban rai ban ai ne ban ym ai license? Ka notification ka khlem pynshai halor kane. Katkum ki kyndon jong ka Ain ka Sorkar kmie ki dkhot ka TVC ki kynthup ia ki nongdie madan bad dei ki nongdie madan hi ki ban peit bad khmih ia ki phorm bad kane kan pynllait na ka jingleh shilliang khmat.
  4. Haba tang ka jingjurip ia ki nongdiemadan ha ki jaka ba ki die ruh khlem pat lah ban leh, te kumno ki bor sorkar kin tip bad pynshisha mano ba shong die jingdie ha madan bad rud lynti bad kino ki jaka ba ki nongdiemadan ki ju shong bad kamai jakpoh?
  5. Ka jingjurip ne survey ia ki jaka ba ngi ju shong die jingdie ruh khlem pat leh. Te kumta ym pat don ka jing kdew hangno long ban die (vending Zone) bad hangno ym long ban die(no vending zone). Kane kan wanrah sa kawei pat ka jingeh bad jingma ia ngi ki nongdiemadan namar lada ki ai license ruh, ki lah ban pynkynriah noh ia ngi sha ki jaka ba kynjah bad bym don iew bad ha kata ka por ngin leh kumno? 
  6. Ka notification ka kdew shai ba ka sorkar kan ai phorm tang ia iwei i briew na kawei ka longiing. Hato ngi mynjur ia kane? Haba ka ain jong ka sorkar kmie ka khlem khang ban don palat iwei i briew na kawei ka longiing ban ioh license ban die jingdie ha madan.
  7. Mynnin ka sngi ka Sorkar Meghalaya ka la ai ka kaiphot (Report) sha ka Iing Shari bad ha kata ka kaiphot la kdew bun kiei kiei kiba long pyrshah ia ka hok ki nongdiemadan bad kita ki long kumne harum:-
  8. (a) Tang kumba 700 ngut ki Nongdie madan ka Sorkar ka thmu ban ai license ha kylleng ka Nongbah Shillong. Te haba kumta kan jia aiu ia kiwei pat ki hajar ngut ki nongdie madan?

(b) Ka kaiphot ka la pynpaw bad ai dak ba ki jaka kum ka Khyndai lad, MTC, Jail Road, G.S Road, Dhanketi, kiba bun ki bynta jong ka Laitumkhrah, Civil Hospital bad kiwei de kum kita ki jaka ba YN YM LAH satia ban die jingdie ha madan. Ia kane ka jingaijingmut la ai khlem kano kano ka jingjurip kaba sani. Lada ia kine ki jaka la khang bad mana ba ym bit ban die jingdie ha madan te shano pat ngin leit? Bad kane ka jingleh ka long pyrshah ia ka Ain ka Sorkar Kmie.

(c) Ha ka kaiphot la kdew tang katto katne ki jaka ba yn shah ban die jingdie ha madan bad kita ki long Mawlai Nonglum, Jaka pynieng kali ha Motphran, katto katne ki jaka shipai, ka Nan Polok bad Lady Hydari Park. Bad ka jingeh ka long ba kiba bun na kine ki jaka ym pat thikna ba la ioh jingbit ne em na kiwei pat ki bor kiba khmih ia kine ki jaka

(d) Ka kaiphot ka ong ba ia ki phorm yn sam paidbah wat sha kito ki bym ju don bynta bad mlien ban shong die jingdie ha madan. Hato kane kam dei ka jingknieh noh ia ka hok jong ngi kiba la ju shong die jingdie ha madan da ki phew snem bad kiba don tang kane kawei ka lad ban kamai jakpoh?

(e) Ha ka kaiphot la kdew ruh ba ka tnat pulit kan bishar bad thew ia ki phorm . Ka jingkylli ka mih mano bad ha kano ka rukom ki bor pyniaid kin bishar bad rai iano yn ai license bad iano yn ym ai? Kine ki rukom treikam ki bym shai kin buh jingeh bad ki long tang ki buit ban knieh ia ka hok longbriew manbriew jong ngi bad ba yn nang khynniat ia ngi sha trai ka riat jong ka jingduk bad jingkyrduh tasam.

Paralok ka por ka dawa ba ngin ieng tylli kawei bad ba ngin ym shah pynbieij. Ka jingiakhun jong ngi ka long ban ioh ia ka jingiada ba pura. Ki jingeh kiba ngi iakynduh ki lah neh da ki phew snem mynta. Bad ngi dei ban iakhun haduh ba ka sorkar kan pynbeit noh phloin ia kiei kiei baroh ym da kaba treikam thurmur bad thohmut thohmat hynrei kat kum ka ain bad ban pynbeit lut na sdang hakut, naduh kaba thaw thymmai ia ka TVC, ban leh ka survey halor ki nongdiemadan bad ki jaka die madan bad ban ai ki license hapoh ka por ba la buh.

Ka jingiakhun ka la neh la slem bad kaba donkam mynta ka long ban nang pynkhlain shuh shuh ia ka jingiakhun. Ha kane ka jingiakhun ngi donkam ruh ban phai dien kumno ngi sdang ia ka jingialeh jong ngi bad ha kane ka rukom kan nang ai bor bad ai mynsiem ia ngi ba ngin iakhun haduh ba ngin da ioh ia ka jingjop bad ban weng shi syndon ia ki jingeh jong ngi.

Ha U June 2016 – Ka TUR ka sdang ia ka jingiakhun halor ban pynkhlain ia ki hok jong ki nongdiemadan haba ka iohi ki jingkyndang ia ki kiba khari khari bad ka jing ym niewkor ia ki hok jong ki.

Ha ka 14 June 2016 – Ka jingiakynduh lang kaba nyngkong jong ki nongdiemadan na baroh kawei ka sor, ha kaba la ia peit bniah bad iatai halor ki ain ba iadei bad ki nongdiemadan bad ha kaba ki nongdiemadan ki rai ban iawanlang hapoh kawei ka shatri haduh ban da ioh syndon ia ka seng ka ba la dep ban register ruh mynta.

Ha ka 24 June 2016 – Ka Seng ka la pynlong ia ka jingiakhih kaba shisngi ha syndah ka Additional secretariat bad ka la iakynduh ia ka Minister Urban Affairs bad ai ruh ka dorkhas (Memorandum) jingdawa sha u Chief Minister lyngba  jong ka.

Ha ki bnai June-July la wad jingtip lyngba ka RTI bad la ioh lum shibun ki jingtip bad ki kot ki sla na ka sorkar kiba iadei bad ki nongdiemadan.

Ha ki bnai June- October – Ki nongdiemadan ki la tip kham bha bad pyndonkam ia ka Stay order jong ka High Court bad ki la iohlad ban die jingdie

Ha Ka 16 August – Ka seng ka ai sa kawei ka shithi sha u Chief Minister kaba kdew halor ka jinglongbeain ka ain ka Sorkar Meghalaya bad ruh ngi la kdew shai halor ki kam beain bad ki jing bamsap halor ki kam kiba iadei bad ki nongdiemadan. Ka Seng ka phah ruh ka shithi sha U minister ka sorkar kmie halor ka jinglong beain ka ain meghalaya bad dawa ban bthah ia ka sorkar meghalaya ban pyntreikam noh ia ka ain ka sorkar kmie.

Ha u bnai November – la mih ka khubor ba ka iingkashari kan plie biang ia ka case ba la mudui da ka Shillong Roadside Hawkers Association shi snem mynshuwa, kata ha U November 2015 . Kane ka seng kaba don tang kumba 80 ngut ki briew kiba die jingdie ha tyngkhap jong ki dukan kiba don ha ka lynti Bijou Cinema ha Khyndai lad, ki la leit mudui ha iiing kashari ha u 2015, ban pan jingiada  tang iaki. Haba ngi pule ki khubor ba ka iing kashari kan khmih biang halor kane ka case, kum ka Seng ngi sheptieng ba kan sa mih ka hukum kaba pyrshah shuh shuh ia ki nongdiemadan. Bad kumta ka Seng ka la thung la u jong u nongiasaid Ain bad iashim bynta lang ha kane ka mukutduma khnang ban ioh lad ban iatai bad iasaid na ka bynta ki hok jong ki nongdie madan ha kylleng ka Nongbah bad ka Jylla.

Ha ka 12 November 2016 – Ka iing kashari ka pynmih ka hukum ban pynkut noh ia ka stay order bad bthah ia ka sorkar ban kyndang ia ki nongdiemadan. Ka seng mynta ka la ujor ia kane ka hukum bad ka jingiasaid ka dang iaid shaphrang bad ha kajuh ka por ka Seng ka dang iai buddien bad iasaid hakhmat ki bor Sorkar ban pyntreikam noh mardor ia ka Ain ka Sorkar Kmie.

Ha ka 15 November – Ka Seng ka phah shithi sha u Chief Secretary ban kyntu ban pyntrei kam noh ia ka ain sorkar kmie. Ngi la ai shithi ruh sha U Urban Minister thymmai U R V Lyngdoh bad kynduh ia u ha ka taiew ba bud.

Ha ka 29 November – Ka seng ka la iakynduh biang ia U Chief Secretary bad ai ia ki jingai jingmut kiba shai kumno ban weng shi syndon ia ki jingeh kiba ki nongdie jingdie ha madan ki iakynduh na ka por sha ka por. Kumno ban leh ka survey. Kino Ki jaka kiba long ban die jingdie bad kumta ter ter

Ha ka 1-3 December – ka Seng ka la pynlong ka jingiakhih ha kaba ki nongdie madan ki la ieng ha la ki jaka ba ki ju die jingdie ryngkat bad ki jingthoh ba ki khot ia ki bor Sorkar ban wan ban jurip ia ki (Survey).

Ha ka 5 December –la pynlong ia ka jingialang thang mombati ha khyndailad bad la buh biang ia ki jingdawa bad ba ka sorkar kan pyntrei kam ia ka ain sorkar kmie.

Ka Seng ka don ha syndah ki nongdie madan bad ka iaikyrshan ia ki para nongdie madan kiba shah kurup ki mar ki mata. Ka synran ia ki sha ki thanat bad iing kashari bad buddien ban ioh biang ia ki mar ba la shah kurup. Hynrei kaba kongsan tam ka long ban ieng skhem halor ki jingdawa. Sa shisien ka Seng ka khot ka wer ia baroh ki nongdie madan ban iengskhem bad ban iakhun ban ioh ia ki jingdawa namar dei tang lada ngi lah ban pynurlong ia ki jingdawa, ngin ioh shisha ia ki hok ba pura bad ba ki jingeh baroh kin duh kin dam shi syndon.

KI JINGDAWA:

  1. Ban pyntreikam ia ka Ain ka Sorkar India ka Street Vendors (Protection of Livelihood and Regulation of Street Vending) Act 2014.
  2. Ban thaw ia ka Town Vending Committee ha kaba sawphew na ka shispah (40%) ki dkhot jong ka Town Vending Committee ki dei ban long napdeng ki nongdie madan bad shiteng na kata ki dei ban long ki kynthei, kaba long katkum ka Ain jong ka Sorkar India.
  3. Ban pynsangeh shi syndon ka jingbeh bad jingkyndang ia ki nongdie madan. Ba dei ban pynlong ka jingjurip (survey) ia ki nongdie madan bad ia ki iew bad ki jaka ba ki nongdie madan ki ju shong die jingdie. Ba ym dei ban khang bad pynbna ia ki Iew kiba la don lypa da ki phew snem bad ki Iew kiba long hi kum ki jaka ba ym lah ban don ki nongdie madan.
  4. Ban pyndep noh ia ka jingjurip bad jingai license bad ban kdew ia ki jaka kiba lah ban die jingdie ha madan.
  5. 5.Ban pynbna paidbah bad pyntreikam hok ia ki pisa bad ki lad jingiarap kiba dei na ka bynta ki nongdie madan ba ka Sorkar India/Sorkar Jylla ka don, kum kaba pynbiang ia ki painkhana, ki kudam, ki jaka ri khyllung bad kiwei kiwei.
  6. 6.Ba dei ban pynphai mardor ia ki mar ki mata jong ki nongdie madan hadien ba kurup ia ki bad dei ban buria ia ki mar ki mata kiba la julor.
  7. 7.Ban ai ka jingshngain bad ka jingiada ia ki nongdie madan, khamtam eh ia ki kynthei kiba kynthup haduh hynniew phew na ka shispah (70%) na ki nongdie jingdie ha madan bad rud lynti.
  8. Ba dei ban pynsangeh mar dor ia ka jingthombor bad jingleh tohmet ia ki nongdie madan bad ban weng noh ia ki ehajar ki bym shongnia ba la mudui pyrshah ia ki nongdie madan.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers

Be First to Comment

Leave a Reply