U Aadhaar, YM DONKAM

Hadien bun ki jingiakren, ki jingiatai, ki jingpynshai na bun ki liang halor une u Aadhaar ngi hap ban peit bniah pat lada ki briew ki la shai ne em halor ka jingdonkam (ne em) jong une u  nombor.

Ka jubab ia kane ka sah ha kaba dum kum ba la long baroh shi katta. Watla bun ki briew ki la ioh jingpynshai, ki bun ruh ki ba dang sah um dum.

Nga la thoh mynshuwa halor u Aadhaar ban pyrshang batai: udei uei uta u Aadhaar? Balei ka sorkar ka pynbor ia ki briew ban rung hapoh uta u Aadhaar? Bad balei ki dei ban ong ‘EM’ ia uta U Aadhaar? Ia kane phi lah ban shem na kane ka link harum khnang ba phin ioh pule katto katne halor utei u nombor Aadhaar:-

U AADHAAR U JONG ‘KI’ www.raiot.in/u-aadhaar-u-jong-ki/

Mynta pat nga kwah ban kren katto kane halor ka jingkwah jong ka sorkar ban pynrung kyrteng bad ka jingpyrshah na ka liang ki paidbah.

Haka 30 tarik u Lber, mynta ka snem, ka Meghalaya People’s Committee on Aadhaar (MPCA) ha ka jingialang ba la long ha ka Khasi National Durbar Hall ha Mawkhar, ka la pdiang ia ka rai ban pyrshah ia ka jingthmu ban thep kyrteng ia ki briew jong ka jylla hapoh une u aadhaar. Ki nongkren ha kato ka sngi ki la sei la ki nia ba kumno ka jingthmu jong ka sorkar ban pynrung kyrteng ka long pyrshah ia ka hukum jong ka Supreme Court bad ba ka dei tang ka jingkwah ban peitbniah, ban jurip, bad ban lorni ia ki jingdon jingem jong ki paid ka jylla. Ha kane ka jingiathir la don ruh ki briew na ka nongbah Delhi. Ka Usha Ramanathan ka la pynshai kham bniah ia ki jingduna bad ki jingma ba ap ia ngi lyngba u Aadhaar.

Kane ka Committee ka la iaid ruh kylleng kylleng ka jylla ban ai jingpynshai halor kane ka ishu bad bun ki briew ki lah ioh jingpynshai ba bniah na kitei ki nongialam.

[perfectpullquote align=”full” cite=”” link=”” color=”” class=”” size=””]Kumban shu pynkynmaw ia baroh, ba ka Iingbishar ba ha khlieh duh – kata ka Supreme Court – ka lah bthah  bad ai ia ka hukum ba U Aadhaar ym shim long uba donkam bad ki briew hi ki lah ban jied ban leh ne ynnai leh. Ka la bthah ruh ba ki sorkar jylla bapher bapher ba ki dei ban pyntip ia kata ka hukum sha ki paidbah, kumjuh ruh ba kim dei ban pynthame ia ki briew da kaba ong ba u long uba donkam lane pyniasnoh jubor ia u Aadhaar bad ki scheme jingmyntoi jong ki paidbah ………… HYNREI ka jingshisha pat ka long da kumwei![/perfectpullquote]

Hadien ba katei ka committee ka lah leh ia kiba donkam, ngi lah iohi ba na ka liang ka Sorkar Jylla ka lah nang pynjur pynban ka jingiaid pynrung kyrteng ia ki briew bad ka khlem da sngap hi ruh ia ka hukum jong ka iing bishar, ka Supreme Court.

Ngi iohsngew pynban ba ka sorkar ka la nang theh pisa puk puk ban pynsngew paidbah ia ka jingdonkam uta u Aadhaar. Ngi lah ban sakhi ia kane da kaba sngap ia ki jingpynbna lyngba ki Radio hynrei khlem da iohsngew pat ia ka jingpynbna ba uta u Aadhaar u long kat hala ka mon jong u ne ka briew.

Kaba sngewsih ruh ka long ba mynta ka la don ruh ka jingpynsngew halor ka jingdonkam uta u Aadhaar lyngba ki programme bapher bapher sha nongkyndong. Ka buh jingeh ba lada ki briew ki buh jingkylli shaphang u Aadhaar ha kine ki jait programme, kita ki nongpynshai kim pat long kiba tbit ban pynshai ruh ia ka hukum jong ka iing bishar, ka Supreme Court. Kane ka ialam bakla pynban ia ki paid nongshongshnong jong ka jylla Meghalaya.

Shuh shuh, mynta ngi la iohi ba ka sorkar ka lah sdang pynbor ban pynrung kyrteng hapoh u Aadhaar da kaba iaid kyllain lyngba ki khynnah skul bad babun hi ki la shah pynthame ba u long uba donkam bad la rung kyrteng hangta.

Ka Sorkar ka shim kabu da kaba pynrung kyrteng lypa ia ki khynnah bad ba bun hi na nongkyndong ki la thep kyrteng iala ki khun hapoh u Aadhaar namar ba ki sheptieng ioh ka kthah ia ka lawei jong ki lada ym don uta u Aadhaar.

Ngi iohi ruh ba ki phah da ki SMS ia ki briew khamtam ia kito kiba la shong pension ba kylli lada ki don aadhaar ne em. Watla ki khlem da phah ban rung kyrteng hynrei kane ka dei kawei na kita ki rukom buit ‘psychology’ ban pynthame ia ki briew ban pynrung kyrteng ia lade hapoh uta u Aadhaar.

Kitei ki daw haneng ki pynpaw shai ba ka sorkar hi ka kloi ban pynthame ia la ki paid jylla bad ka jingiakhun hi hapdeng kita kiba kwah ia ka hok ki paidbah bad ka sorkar ka la long ka jingiakhun kaba noh shiliang.

Ngi hap ban long kiba buittuh kum u bsein haba iadei ba kane ka kam, bad ngi dei ban buh bun ki jingkylli hakhmat ka sorkar haba ka thmu ban pynrung jubor ia ki briew hapoh une u nombor.

Ngi lah ju iohsngew bunjait ki rukom pynthame ba ki briew ka sorkar ki ju ong haba iadei bad ka jingdonkam ia u Aadhaar bad kumban shu ai nuksa, ki ju mlien ban ong ba lynba u Aadhaar kan duna ka bamsap hynrei kane ka long tang ka khana hamsaia kaba ka sorkar ka ialeh ban pynthame ia u paidbah. Ka jingshisha ka long ba lyngba une u nombor Aadhaar, lah ban buhrieh shuh shuh ia ki kam bamsap.

Baroh ki jingkular na ka liang ka sorkar halor ka jingbha u nombor Aadhaar, ki long tang ki jingpynthame ki bym shong nongrim haei haei ruh. Ki Nongshongshnong ka jylla Meghalaya hi baroh kawei ki dei ban tip ba ia une u nombor, ym donkam. Bad ia ki Hok ki jongphi, Ym don ba lah ban knieh.

Ha kaba pynkut, nga kyrpad ia baroh ba kin long ki briew kiba wat jingtip bniah halor kano kano ka kam, kano kano ka scheme, kano kano ka jingtyrwa ha shwa ban pdiang ia ka.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Roney Lyndem Written by:

Roney Lyndem works as counsellor and is a Union activist with Thma U Rangli Juki (TUR)

One Comment

  1. Alvsumer
    January 7, 2018
    Reply

    Nga kyrshan ba ia kane ka kam shon Aadhaar ha jylla Meghalaya dei ban ym pynbor iano iano, namar wat u Chief Minister ruh ym treh ban shon Aadhaar. The kumno kein la ailad pat ban pyniaid shaphrang ia kane ka kam. NGA TE DALEI2 NGAN NYM SHON AADHAAR.

Leave a Reply