We’re not burom class : TARIK

Ka kynhun tem ‘Tarik’ na Shillong kan pynlaid paidbah ia ka album: Khanatang Parking Lot bad ki Mawbynna Dewbilat ha une u bnai Naiwieng.
Ia kine ki jingrwai la ioh mynsiem ban thaw sur ia ki da kaba sngap ia ki khana ha ki lokal taksi, ki parking lot kiba dum bad ki pata ha ka nongbah Shillong, namar dei ha kine ki jaka ba kakolshor ka kyrsoi ym tang ha ki dulir jong ki skulbah. La pynbeit pynbiang ruh ia kine ki jingrwai da ka rukom dalade lane kata kaba ki ong ka Do It Yourself philosophy lane DIY bad la mix badmaster pat sha Kolkata. La pyn urlong ia kane ka album da ka jingkyrshan jong ka red dur productions, Shillong.
Ka kynhun tem Tarik kan rah ia kine ki jingrwai bad leit tem ruh ha kine ki jaka harum:
B-Flat, Bangalore, 28th Naiwieng
Hauz Khas Social, Delhi, 6th Nohprah
Reels, Guwahati, 11th Nohprah
Savio Hall, Shillong, 30 Nohprah
Bombay, Calcutta bad Nepal (Yn dang pynthikna ia ki jaka)
Ka Tarik ka kynthup ia u Wanphrang Diengdoh, u Valte Chongthu bad ha kane ka khep, yn kyrhsan ruh u Nikolaus Gerold na Germany ha ki ksing ki dhah bad ki drums.
Ka Tarik ka long ka ka kynhun tem na Shillong bad ki jingrwai jong ki ki long kiba la khleh ha kata ka rukom ban pyn pyrkhat bad puson bad kumjuh ruh ban tynjuh ia ki ba don bor bad burom ha ka imlang sahlang. Ki sur ki long kiba ktik ia ka jingmut bad ruh ia ka syngkai. Lehse ngi lah ban ong ba ngi rwai ia ka jingshisha. Ki long ki kynhun tem kiba nyngkong eh kiba bsuh ia kum kitei ki jingkylli ha ka lympung jingrwai na Shillong namar bunsien hi, hangne ha sor, ngi ju  shem tang ia ki kynhun duhalia salonsar.
Ban tip shuh shaphang ka Tarik, jngoh ha  www.facebook.com/tarikshillong | www.reddur.com lane email wanphrangd@gmail.com

 

11792060_1147362541947785_6704027718203220808_oRaiot: Batai u dei uei u kwai ia ki ba na bar shnong?

Wanphrang: Kong phi don kwai? Lada phi pdiang ba u kwai un pynsaw ia ka shyntur, kam lei lei namar u long uba pynsmiej ia ka met.

Valte: Nga pule tip haei kumto, ba ki ong ba u kwai u long uba pyn peitmat.

Raiot: Kumno phi thaw ia ki jingrwai?

W: Ka suk bha lada phi sah ha shnong namar phi shu ai sur ai jingrwai beit kat ia kaba phi iohi.

Raiot: Phi sngew kumno halor ka put ka tem ha Shillong?

W: Nga shem ba ha kine ki sngi, ha Shillong ruh, ki la sdang mih ki kynhun tem kibym kwah pynsnoh ialade bad ki bor synshar watla dang duna ki briew kiba sngewthuh ia kaei kaba ki thmu. Lehse kane ka lah ban long ba ka internet ka la plie lad ia ngi ban iohsngew ia ki sur jingrwai na kylleng ka pyrthei.

Raiot: Kaei ka kyrteng jong ka album jong phi?

W: Ka album ka kyrteng ‘Khanatang parking lot bad ki mawbynna dewbilat’. Da phareng ban shu pynkylla jingmut malu mala ka long ‘Folktales from the parking lot and foreign monoliths’.

Raiot: Lano phin pyllait paidbah?

W: Ngin pyllait paidbah ha une u Naiwieng 2015. Ngin leit tem kylleng ka ri bad ngin pynkut ia kane ka jingshang jong ngi ha Shillong.

Raiot: Phi lah ban batai khyndiat shaphang ki jingrwai bad iano phi thew da kine ki jingrwai?

W: Ka long kumne, ngi ngim tem na bynta kine ki hi-fi ba standard, ba don class, ba don kali heh eiei. Ngi ngim rwai na bynta kine. Kum ban shu ai nuksa, ha ka jingrwai jong ngi kaba kyrteng ‘Kynjat Sla’, ka thew ia ki khynnah samla bapli ba khlem kam kiba shu iaid surok bad la shu myllen por tang da kaba kynjat sla. Ki kyntien ki long ‘Tarak-tak-tak kumba phah i mei na ing’ bad kaba lyngngoh ka long ba watla ki kyntien ki dei da ka Khasi hynrei ki nongsngap watla ki dei ki dkhar ne ki bar ri makna ruh, ki kohnguh la ki khlieh bad teng teng ki rwai ryngkat. Dei kane kein kaba nga sngewtynnad ba kum kine ki jingrwai jongngi kiba lehse kim da dei kita kiba khraw jingmut ki don ruh ka bor ban pynsgew ei ei ha u nongsngap.

Raiot: Ka ‘Hollywood Tailors’ ka dei ka jingrwai ne…?

W: Ha Hollywood Tailors ki kyntien ki ong:

15 tyngka ha pla u don,

U iaid wut sha parking lot

Ka balieh ha song plastik

15 tyngka kaba sotti.

 Te ka dei ka pogo. Jingrwai pogo. Te mynta, haei ki briew kin sngewtynnad ha Shillong kin sngap ia kine ki jait jingrwai, shu kwah leh standard beit.

Raiot: Phi lah ban batai kumno phi record ia ki jingrwai?

W: Ngi record ruh, ngi record beit ha ing. Uba leh sound u wan record beit ha ing namar ngi kwah ban ioh ia kato ka sound napoh kamra phi iohi. Te kato ka sound ba phi ioh na kamra phin nym ioh na studio. Ngi pynbeit ia ki tiar ha kamra, ngi ia thiah beit hajan ki drums ei ei, ka jung sa ka miaw baroh. Te ka mixing pat ngi leh ha Kolkata.

Raiot: Balei sha Kolkata?

W: Baroh ki nongtemn jingrwai iew na Shillong naduh u snem ’80 shaneng, baroh ki leit leh mastering sha Kolkata. Ha jingshisha bun bha ki jingrwai bad ki film ruh ki leit pyndep sha Kolkata.

Raiot: Kaei ka concert Tarik ba phi kynmaw eh na baroh haduh mynta?

W: Ka konsat ba ngi kynmaw eh ka dei ba ngi leit tem sha Kyrdemkhla. Ha kata ka janmiet, ngi la buh ki dur ban pyni ryngkat ha ka por ba ngi tem. Hynrei ki dur pat phewse dei ki dur ba la shna da u nongshna dur film rangbah. Te syndet syndet ki sdang jah ki dur bad hadien ar sngi lai sngi don ba iathuh ia nga ba la phah sangeh noh da u ophisar uba la don hapdeng ki nongsngap ha kata ka janmiet. U la phah ia u gunman jong u ban pynlip ia kita ki dur. Bad ka daw ka long ba la pyni ia arngut ki shynrang katba ki dang ia ieid iwei ia iwei.

Raiot: Balei ki shynrang ha Shillong kim ju ia ieid sieh iwei ia iwei?

W: Haoid ki ia ieid kein, nga la iohi da la ki jong ki khmat bad nga tharai ba ka rukom ia ieid jong ki ruh kan pynleh rain ia ki kot hyndai kiba batai kumno ban ieid.

Raiot: Balei ngan pynlut pisa ban thied ia kane ka album? Da nga shu download tuh long kumno tharai?

W: Da phi download ruh ka biang hi, ngi kmen eh da phi download. Hynrei da phi thied te kumta mo, ioh bai khor malu mala.
V: Mih bai quarter!

Raiot: Batai shaphang ka nongrim jong ki jingrwai?

W: Ki sur te ki long shisha kiba lah ban sngewthuh da ki briew satlak ka pyrthei bad kumjuh ki pynshai halor ki jingsngew jong ki briew kiba shah nion ha kylleng ka pyrthei. Ia ka album, ngi la leh hi dalade baroh khlem da don nongkyrshan nangno nangno ruh. Ngim lehrain ban ong ba ngi la pankylliang bad khrong ban pyndep ia kane ka album. Bad lehse kum kita ki punk, ngi la long shisha kiba hok ialade bad hakhmat ka kam kaba ngi la thmu ban pyndep.

Raiot: Hynrei phi leit tem pat ha jaka standard?

W: Phi iohi mynta ki briew pat ki kylli balei phi leit tem hangne hangtai. L*@#, da nga leit tem hangno hangno makna ruh, nga rwai beit ia ka jingshisha kaba jia ha pyrthei. Lada phi siew ia nga watla nga rwai ia kata ka jingshisha, B**, ngan thut leh aiu?

Raiot: Phi nud ban rwai mynta hangne ha surok

W: Balei ym nud?

U leit iaid sha ki lum jingtep

Hangta un shong un dih haduh da step

Ki lok ki jor sha ri ka Jawpaw

Ki leit beh jingphohsniew rock and roll

Hangne ha sor jong ngi ka sor T*#$ jong ngi

Ym don lawei, ym don jingkyrmen phi iohi

Tang ka thok suda, tang ka shukor suda

Kane kata ka ‘rock city’

Khanatang Parking Lot bad ki Mawbynna Dewbilat
Khanatang Parking Lot bad ki Mawbynna Dewbilat

 

Have your say

comments

Raiot

Subscribe to Raiot via Email

Enter your email address to subscribe to this blog and receive notifications of new posts by email.

Raiot Collective Written by:

We are many, we are one.

Be First to Comment

Leave a Reply

Your email address will not be published. Required fields are marked *