Ha Kane Ka KHLAM, Hato Phi Ioh Pisa Na Ka Sorkar? Wad Ia La Ka Kyrteng Hangne!

Paralok,

Lyngba ka RTI ba wad ka seng TUR, ngi la ioh ia ka list kaba don ia ki kyrteng jong ki nongtrei-nongbylla sngi kiba ka Sorkar ka kam ba ka lah dep ai ia ka song jingiarap bad jingkyrshan pisa kaba long Rs 2100 (ia ki nongdie madan, nong trei iing briew, nongbylla sngi) bad Rs.5000 ( ia ki labour ne nongbylla mistri shna iing ba lah register bad ka Labour Dept naduh mynshuwa) na ka bynta ki bnai ba don ka jingkhang dam ha ka sien ba nyngkong  ka jinglynshop ka khlam Covid19 ha ka snem 2020.

Ngi la ioh ban iakren lyngba ka phone bad ki katto katne ngut ki nongtrei-nongbylla sngi kiba dei hok ban ioh ia katei ka jingkyrshan pisa na ka Sorkar. Hynrei kaba sngewsih ka long ba kiba bun na ki ki ong ba ki khlem ioh ia kata song jingiarap pisa. Don pat kiba ioh tang Rs. 700 ym ia kata ka Rs 2100 bad kumta ter ter.

Kine harum ki dei ki kyrteng jong ki nongtrei-nongbylla sngi kiba paw ha ki kot RTI bad ngi pyllait paidbah ia kine ki kyrteng khnang ba phin lah ban peit bad wad ia la ki jong ki kyrteng.  Lada phi shem ba ka kyrteng  jong phi ka don ne paw ,hynrei phi khlem ioh satia ia kata ka pisa ne phi ioh tang shiteng na  kaba lah kular, ngi don hok ban dawa na ka sorkar ban pyllait ia ka pisa jong phi. 

Lada phi dei ki nongtrei -nongbylla sngi  bad phi lah apply hynrei phi khlem mih kyrteng bad khlem ioh jingiarap ia kata ruh ngin buddien. 

Phi lah ban Phone bad whatsapp sha ngi ha une u nombor 9863097754 lada phi shem ba:-

1. Ka kyrteng jong phi ka don hynrei phi khlem ioh satia ia ka pisa.
   
2. Lada ka kyrteng jong phi ka don hynrei phi ioh tang Rs 1400 ne Rs 700 ne duna ia ka Rs 5000
   
3. Lada phi dei ki nongtrei- nongbylla sngi bad phi lah apply ia katei ka song jingiarap pisa hynrei ka kyrteng jong phi ka khlem mih bad phi khlem ioh jingiarap ei ei.

Ha kane ka por ba lah wan lynshop biang ka khlam ha ka wat ba ar, ngi ki nongtrei nongbylla sngi ngi dei ban ieng tylli bad dawa na ka Sorkar ba ka dei ban kyrshan pisa ia ngi. Kane ka dei ka hok jong nga jong phi ki nongtrei nongbylla sngi. Ka dei ka hok jong ngi ban ioh ka bam ka dih, ka bai iing bai sem, ka koit ka khiah bad ka pule puthi ia ki khun ki kti. Ngi don ka hok ban im ka jingim ba pura.

List Of Beneficiaries Who Got Rs. 2100 under Social Security for Labour Chief Minister’s Relief Against Wage Loss Scheme

List Of Beneficiaries Who Got Rs. 5000 under Meghalaya Building And Other Construction Workers Welfare Board.