Ka “Kenosis”– Ka Jingshakri Da Kaba Pynthylli Їalade

Kawei na ki khubor bad jinghikai kaba khraw kaba u Jisu Khrist u la ai sha ka pyrthei ka long kane ba “u la wan sha ka pyrthei ban shakri, ym ban їoh ia ka jingshakri”. U Karl Barth, u theologian uba khraw, u la ai nam ia u Jisu kum “u briew na ka bynta kiwei” lane u briew uba im na ka bynta kiwei pat.

Ha ka saiῆpyrkhat jong u Jisu ka kyntien shakri ka long kaba їar bad ka ksam shaduh shabar ka jylli jong ka jaitbynriew Jiw. U Jisu um shym la wan ban shakri bad shah shitom tang na ka bynta ki Jiw, hynrei ka jingshakri jong u ka kynjoh sha lyndet ki kynroh ka jaitbynriew Jiw bad u la shakri, u la im bad їap ruh na ka bynta ki nongsamaria, ki nongkhrong, ki riewkynthei, kiba pang ῆiangthohlieh bad ki riewpaidbah. Їa kane ka saiῆpyrkhat la pynskhem ruh da u Apostol Paul- “kumta ym don jingїapher hadpeng ki Jiw bad ki Jentil, hapdeng ki mraw bad kiba laitluid…phi baroh phi їalong kawei ha u Khrist” (Galatia 3:28). Ka jingshakri kaba u Jisu Khrist u la ai ka long ia baroh bad na ka bynta baroh ki khun bynriew. Ka Baibl ka sakhi ruh ba u Jisu Khrist u pynthylli bad aiti lut їalade na ka bynta kiwei.

Ha ka saiῆpyrkhat u Jisu, ban shakri ka mut ban pynthylli bad aiti lut їalade. Ym lah ban shakri da ka jingmeng, jingkyreit bad jingsarong.  Ha u Jisu ka jingshakri kam dei ban long kaba khwan, kaba khun ranab sha lade, kaba pyrkhat shimet bad kaba rhah. Ha ka shithi sha ki nong Philippi, ka lynnong ba ar, u Apostol Paul u kdew shai ia ka jingmut jong ka jingshakri katkum ka thymmei saiῆpyrkhat u Jisu. (Philippi 2).

U Apostol Paul u kyntu ia ki parabangeit ban don kajuh ka jingmut kumba u Khrist u don (Philippi 2:5). Kumno ngin tip shaphang ka jingmut-jingpyrkhat U Jisu Khrist? Ha kane hi ka shithi u Apostol Paul u pynithuh ia ka pyrkhat-pyrdaiῆ jong u Jisu Khrist kumne- “U don barabor ia ka jinglong U Blei; hynrei um shym pyrkhat…ba u dei ban pynlong mar ryngkat bad u Blei…da ka mon ba laitluid u kheiῆduh noh ia baroh kaba u don, bad u la shim ia ka jinglong u shakri…bad u la wan paw ha ka dur u briew. U long uba sngewrit bad u la їaid ha ka lynti jong ka jingkohnguh baroh shi lynter lynti sha ka jingїap-ka jingїap jong u halor ka diengphna…” (Philippi 2:6-11). Kane ka dei ka jingpynthylli bad jingaiti lut jong u Jisu Khrist їalade, bad ka dei ka tynrai jong ka jinglong-jingim bad ka pyrkhat-pyrdaiῆ jong U. Ha ka ktien Greek ki ong ka “Kenosis” kaba mut ka jingpynthylli їalade bad U Jisu Khrist u pynthylli, u pynlong їalade u bym don ei ei shuh bad u aiti ia la ka jingim na ka bynta kiwei.

U Hak Joon Lee, u theologian ka spah snem ba arphew wei, ha ka article kaba kyrteng, Kingdom and Kenosis: Mind of Christ In Paul’s Ethics, u ong ba kiba bun ki riewstad ki kubur ba ka shithi sha ki nong Philippi 2:6-11, ka dei kawei na ki jingrwai shem mynsiem jong ki nongbud u Jisu Khrist ha ka spah snem ba nyngkong bad kane ka jingrwai ka shat phalang ia ka jingmut jingpyrkhat u Jisu Khrist. Lyngba kane ka jingrwai ngi shemphang ia ka pyrkhat-pyrdaiῆ u Jisu Khrist bad ia kaei kaba la pynlong ia u ban im, ban shah shitom bad ban їap halor ka diengphna, bad kumno baroh shi lynter ka jingim u kheiῆduh bad len їalade na ka bynta kiwei pat.

Katkum u Han Joon Lee, ka phang pdeng jong kane ka jingrwai shem mynsiem ka dei ka jingpynthylli jong u Khrist їalade. Kane ka jingrwai ka pynkha ruh ia kata kaba ki khot ka “kenotic ethic” lane ka nongrim jong ka treikam treijam kaba pynshong dor ne pynshong nia ha ka pyrkhat-pyrdaiῆ u Jisu Khrist, kata ka jingpynthylli bad jingaiti lut їalade na ka bynta kiwei.  Ka “kenotic ethic” ka dei ka pyrkhat-pyrdaiῆ jong u Jisu Khrist kaba kren shaphang ka mynsiem їatiplem kaba pdiang ne sngewthuh lem ia ki jingeh bad jingdonkam jong kiwei. Kaba ai jaka bad kaba kynthup lem ia kiwei.

Ki riewstad Baibl ki ong ba wat la ka shithi sha ki nong Philippi ka long na ka bynta baroh ki riewngeit kiba don ha katei ka nongbah, hynrei ka khubor ha kane ka shithi ka thmu ruh khamtam ia kito kiba don ha ka bor bad kyrdan. U Paul u kyntu jur ia ki ba kin pynpaw ia ka jinglong la kloi ban shakri bad ban ai jaka lem ia kiwei, ym ban kurup bor ne ban pyndonkam ia ka bor, ka iktiar ban myntoi їalade shimet.

Shuh shuh u Han Joon Lee u buh ia kine ki jingkylli, kaei kata ka jingpynthylli (kenosis) u Jisu Khrist їalade? Balei ka long kaba kongsan ia ngi ban puson? bad ka mut aїu khamtam eh ha kane ka juk kaba ngi im?

Ka mut aiu ka “kenosis” ha kane ka juk kaba ieit tang ia ka malade ne kaba khwan ne kaba rhah ne kaba їabeh spah ne kaba їakob bad їaknieh bor? Ki briew ha kane ka juk ki khwan tang sha lade, la ka dei ban їasam mar shiteng, tangba ym bit ban duh, hap їoh beit da kano kano ka lynti ruh. Lehse ha kane ka juk ka “kenosis” ka paw kumba ka dei ka atiar jong ki briew kiba tlot bor ne ki mraw, ki bym nud ne ki bym don bor shuh ban їakob-їasop. Phewse kam long kumta, ka “kenosis” ka kren shai bad їathuh ia ngi ba U Blei u long uba don bor haduh katta katta bad u la pynthylli lut ia ka bor bad ka kyrdan ba u don khnang ban pynkup bor ia kiwei.

Ka “kenosis” ka dei ka atiar bah ban pyndonkam na ka bynta ban kob bad kynthoh pyrshah ia ka jingkhwan bad jingrhah ka synshar-khadar bad ka jinglah shilliang ha ka imlang sahlang. Ka “kenosis”, lane ka jingpynthylli bad jingkheiῆduh їalade ka lah ban їeng bad kob pyrshah ia ka juk “neo-liberal” kaba khwan myntoi, kaba rhah, kaba klun lut naphang lin bad kaba shah ba ka spah bad ka bor kin shong lynnong tang ha ki khyndiat ngut ki briew. U Jisu kum u shakri uba la pynthylli bad kheiῆduh їalade, u їeng pyrshah ia kiba shakri na ka bynta ka jingmyntoi shimet, u їeng pyrshah ia ki shakri kiba rhah, kiba pynriewspah shimet, kiba khun ranab bad kumta ter ter.  Bad u їeng pyrshah ia ki shakri kiba pynhun ia ka mynsiem sarong kopia, kiba pynhun tang ia ka malade kaba kyreit bad kaba meng.

Katkum u Han Joon Lee ka “kenosis” ka hikai ia ngi ban їasam bynta lang ia ka bor, ka spah, ka jingnang jingstad bad khamtam eh ha kane ka juk, ia ka stad saian bad technology na ka bynta ka jingroi bad jingbha jong baroh. Ha kajuh ka por ngi donkam ban tyngkan ban ym pyndonkam bakla ia ka bor bad jinglah ban thombor ia ki para briew bad ia ka mariang. Ka “kenosis” ka long ruh kaba kongsan na ka bynta ban tehsong ia ka longїing longsem, imlang sahlang bad jingїadei para marjan ne para briew. Ngi im ha ka juk ba ki longїing longsem ki pra bad ka imlang sahlang ka dap da ka jingїakynad ne jingїasih bad i kumba kan khyllem. Ka jingїadei para briew ne shi paralok ka la shong nongrim tang ha ka jingїoh jingmyntoi, kaba mut katba u paralok ne ka paralok kiba їadei kam ki dang larkam bad myntoi ia ka jingim ne jingtrei jong nga te ngan ῆiewkor ia ka jingїadei bad lada kim larkam shuh ka jingїadei ruh ka kut noh. Kane ka dei ka nongrim ne ka rul jong ka juk kaba ngi im. Hynrei ka “kenosis” ka hikai ia ngi ban ngin kheiῆduh bad aiti lut їalade na ka bynta kiwei pat bad kane ka dei ka jingshakri kaba hok bad ba janai.

Naduh kaba sdang ka “kenosis” ka la don bad u Blei. U Blei u thaw bad shah ia ki jingthaw baroh ha la ki rong, ki rup ba kin san kin mer laitluid bad baroh ki jingthaw jingpynlong ki їoh jaka, ki їaimlang-sahlang bad san ha ka pneh jong u Blei. Ka jingrwai “kenosis” ne ka jingpynthylli jong u Khrist їalade (Philippi 2:6-11) kam dei ka jingrwai kaba shu pynlung mynsiem, hynrei ka dei kaba donbor bad kaba pynkhie ia ka thma bad jingїaleh ban їoh ia ka bneng hangne ha khyndew.

U Jisu u pynthylli bad aiti lut їalade na ka bynta ban pynbiang ia ki jingdonkam jong kiwei bad ban ai ka jingim ba dap kyrhai. Ka nongrim tynrai jong ka jingshakri ka long ban pynthylli bad kheiῆduh їalade na ka bynta kiwei. Tang ka jingshakri kaba kum kane kaba lah ban ai jingkyrmen.

Amen

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15,734 other subscribers

Kyrsoibor Pyrtuh is a pastor interested in intersection between theology and social power

Be First to Comment

    Leave a Reply