Ka Khubor Good Friday: Balei U Jisu Khrist U Shah їap?

Ngin plie ia ka khubor Good Friday ha kane ka por da ki kyntien na ka Gospel U Їoannis 11:49-50, “…u Kaїaphas uba la long u rangbah lyngdoh ha kata ka snem, u la ong. “A katno phi long kiba bieit! Hato phim sngewthuh ba ka kham bha ia phi ban shah ba uwei u briew un їap na ka bynta ka jaitbynriew,  ban ia kaba ka jaitbynriew baroh kawei kan jot noh?”- Kane kam dei ka jingkren rhem mynsiem ieit jaitbynriew jong u Kaїaphas ne ba u їaroh ia u Jisu ba u long u riewshlur uba їap na ka bynta kiwei pat. Hynrei kane ka shat phalang ia ka seng pyrkhat kaba la pun hapoh u Kaїaphas bad ha ki dkhot jong ka Dorbar Sanhedrin kiba thrang dik dik ba u Jisu un їap noh bad ban pynkut noh ia ka jingim bad ki kam kiba khraw jong u.

Ka jingkren u Kaїaphas ka long hadien ka jingpynim pat ia u Lazarus. Kat shaba u Jisu u leit ban їalap ia ka khubor babha bad leh ia ki kambah ki paidbah ki dap da ka jingkmen bad jingkyrmen. Hadien ba u Jisu Khrist u la pynim pat ia u Lazarus ka shnong Bethania ka la khynwin da ka surkmen bad ka shnong baroh kawei ka kmen ka risa bad ka shlei da ka jingkyrmen. Katba kiwei pat, ki pharisi, ki sadusi bad ki stad aiῆ kim sngewtynnat ia kaei kaba u Jisu u la leh. Ban kham shai ia ka seng pyrkhat jong ki nongїalam ki Jiw, kata ki pharisi, ki sadusi bad ki stad aiῆ ngan sot na ka komentari I Phadar Sngi kumne- “tang shu їohsngew ia ka khanatang na ki nongbud nongrap jong ki, ka khanatang ba kim lah shuh ban len da lei lei ruh namarba ki la їohi da la ki khmat, ki la їohsngew da la ki skhor bad ktah da la ki kti, ki rangbah lyngdoh, pharisi bad stad aiῆ ki la їalum dorbar ban їaphylliew bad їamir aiu ba dei ban leh. Ha ka dorbar ki la rai ba ym dei shuh ban shah da lei lei ruh ba u Jisu un leh katba mon. Dei ban pakhang noh sbak da ka bor ka iktiar synshar khadar ia ka jingim bad ki kam jong u.”

U Kaїaphas um pyrkhat ei ei na ka bynta ka jaitbynriew Jiw ne na ka bynta ki paidbah, hynrei u pyrkhat tang їalade shimet bad ka jingbit jingbiang ka kynhun Lyngdoh sadusi bad ka Sanhedrin. Kynmaw ki Lyngdoh sadusi ki dei ki nongpynїaid ia ka Dorbar Sanhedrin kaba long ka Dorbar synshar kaba ha khliehduh jong ki Jiw. Kumta ki sadusi ki kwah ban bat ia ka synshar-khadar lynter tait da kaba pynїajan bad pynїadei jingmut bad ki Patsha ka Hima Rome. Ki Lyngdoh sadusi, ki pharisi bad ki stad aiῆ kim ju kwah ban pynthut ne ban don mano re mano ban pynthut ne ban kob ne ban їeng їaleh pyrshah ia ki Patsha, wat la ki runar katno katno ruh. Ha kawei pat ka liang ka khubor babha ba u Jisu u їalap bad ki kambah ba u leh, ki long ka jingma bad jingthut kaba khraw ia ki nongsynshar Jiw bad ia ki Patsha ka Hima Rom.

Ki Patsha ka Hima Rom kiba synshar lahduh ia ka Ri Palestine kim sngewbha ban mih ne ban don mano mano ki ban їeng їaleh pyrshah ia ka jingsynshar donbor jong ki bad na ka liang ki Lyngdoh sadusi, ki pharisi bad ki stad aiῆ ruh kim kwah ban pynthut ia ki Patsha, wat la ki ban beiῆ ia ki briew, namar kan pynduhnong shibun ia ki.

U Kaїaphas, ki Lyngdoh sadusi, ki pharisi bad ki stad aiῆ kim sngewtynnat ia ki kam jong u Jisu bad kumta ki shim ka rai ban pynkut noh shi syndon ia ka jingim jong u. Sa tang ka jingїap hi kaba lah ban pynkut ia ka jingim bad ki kambah u Jisu Khrist. Lah ban ong ba u Kaїaphas bad ka Sanhedrin baroh kawei ki їasylla bad donkti ha kaba pynїap ia u Jisu Khrist.

Ka jingbishar pyrshah ia u Jisu Khrist, lah ban ong ba ka sdang bad kut ha ka Dorbar Sanhedrin namar u Pilat uba long u Lyngskor jong ka Hima Rom ha Palestine um treh ban їadon kti ha kaba rai pynїap ia u Jisu Khrist bad u la kyntait ban shim ka jingkitkhlieh- “…u Pilat…u la shim khyndiat ka um, u la thet ia la ki kti hakhmat u paidbah, bad u la ong, “Ngam don jingkitkhlieh na ka bynta ka jingїap une u briew! Kane ka dei ka jingleh jong phi! U paidbah baroh u la jubab, “Ai ba ka jingkitkhlieh na ka bynta ka jingїap jong u kan hap halor jong ngi bad halor ki khun jong ngi!”(Mathaїos 27:24-25)

Khlem da ῆiewthala ia ka jingngeit bad jingshem mynsiem ba u Jisu Khrist u їap na ka bynta ka pop bad ka jot ka rem jong ka pyrthei, hynrei na ka komentari jong i Phadar Sngi ka paw ba don ar tylli ki daw kiba kongsan kiba їasnoh bad ka jingїap u Jisu Khrist halor ka diengphna. Kawei, u Kaїaphas u kren shai, “ka myntoi ia phi”-kaba mut ba lada u Jisu u їap noh kan long ka jingmyntoi ia ki Lyngdoh sadusi, ki stad aiῆ bad ki pharisi, ym dei ia ki paidbah Israel. Ka jingmyntoi ia ki sadusi ka long ba kin їoh bat lynter tait ia u lakam ka synshar ka khadar da kaba pynїadei bad ki nongsynshar lahduh, kata bad ki Patsha ka Hima Rom. U Kaїaphas u pynpaw ruh ba ka don ka jingma bad jingsyier ba ma u bad kiwei ki sadusi kin duh ia ka bor synshar lada u Jisu u їohmon ban їai їalap ia ka khubor babha bad u їai leh ia ki kambah, namar ki briew baroh kin ngeit ha u.

Ka daw kaba ar, ki pharisi bad ki stad aiῆ pat ki sheptieng bad syier їoh ba na ka daw ka jingkhihwin bad ba ki paidbah ki bud ia u Jisu, ki bor synshar ka Hima Rom ki lah ban weng noh ia ka jinglaitluid ha ka jingїadei bad ka niam. Lada jia kumta ki stad aiῆ bad ki pharisi kin duh kam noh kum ki nonghikai jong ka jaitbynriew Jiw bad kane kan ktah ia ki bad kin duh ia ka jingim ba pahuh pahai bad ka jingdonburom ha ka imlang sahlang da kaba shim kabu ia ka jingshida, jingbieit bad jinglong shi sur jong ki paidbah salonsar.

Kaei ka kam ba u Jisu u leh? Katkum ka Gospel u Markos u Jisu u sdang ia ka mishon jong u mar mar hadien ba u la pynlut saw phew sngi bad saw phew miet ha ka Ri khlaw. Ha Ri khlaw u Jisu marwei u їaksaid bad u wad ia ka jingmut jong ka hok, ka synshar hok, ka bishar hok bad ka jingshisha. U їaksaid ban sngewthuh ia ka jingmut jong ka jinglaitluid bad ka jingim ba dap kyrhai. U їaksaid ban sngewthuh ia ka dor jong ka jingshai bad jingshemphang. Ha kawei ka liang, ka Ri khlaw ka dei ka jaka kaba u Jisu u pynkhreh їalade na ka bynta ki jingїaleh kiba ap ia u.

Tang mar ia mih na ka Ri khlaw u Jisu u sdang ban їalap ia ka khubor babha bad u nam ia ka khubor babha da ka khubor ka Jingieit. Ka jingieit ka kdup bad kynthup ia ka synshar hok, ka bishar hok bad ka jingieit ka nang pynskhem shuh shuh ia ka jingmut jong ka hok bad jingshisha. Ka jingieit ka dawa ban synshar hok bad bishar hok, katba ki Lyngdoh sadusi, ki pharisi, ki stad aiῆ bad kiwei ki bakhraw ki їatrei bad їasylla pynban bad ki Patsha, ki Lyngskor ne ki Lat jong ka Hima Rom ban khῆiot bad ban beiῆ ia ki paidbah, khamtam ia ki rangli ki juki. Kumta u Jisu u im ban їalap ia ka khubor ka Jingieit bad u shah pynїap namar jong ka.

Ki Lyngdoh sadusi, ki pharisi, ki stad aiῆ ki wit ia u Jisu Khrist bad ha ka Dorbar, u Kaїaphas u kren arsap- “ban ia kaba ka jaitbynriew baroh kawei kan jot”. Kane kam dei ka jingkren ieit jaitbynriew, hynrei katkum I Phadar Sngi, “U Kaїaphas u la sngewthuh ba khlem ka jaitbynriew ka bor synshar ka bor khadar jong u shimet bad ki para sadusi kam don nongrim bad kam don daw. Khlem ka jaitbynriew kin synshar їano? Ka jaitbynriew ka dei ka lad ka lynti, ka dei ka tiar ka tar ba ki lah ban pyndonkam khnang ban їoh lad ban synshar ban khadar, ban kamai ia ka Longspah bad bam ia ka Longbriew ki paidbah salonsar”

Balei u Jisu Khrist u їap? U їap namar ba u їeng pyrshah ia ki bor synshar kiba runar bad u їap namar ka khubor jong ka Jingieit bad ka jingim ba dap kyrhai.

Amen

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15,457 other subscribers

Kyrsoibor Pyrtuh is a pastor interested in intersection between theology and social power

Be First to Comment

    Leave a Reply