Ka Kitab Jingpynpaw: U Їakjakor, Ki Dak Jingkheiῆ Bad Ka Por Ba Ngi Im

Kane ka dawa ia ka jingstad. Uno uno uba shemphang u lah ban batai ia ka jingmut jong u dak jingkheiῆ jong u mradkhlaw…” (Ka Jingpynpaw 13:18)

Ha kane ka juk neo-liberal, ka juk kaba ban beiῆ ia ki para briew bad kaba lah shilliang ha ka kamai kajih bad ka їoh ka kot, marwei shimet nga bang ban pule bad puson ia ka kitab Jingpynpaw. Ka Jingpynpaw ka dei ka kitab kaba dap da ki dur pharshi kum u dak jingkheiῆ 666, u Їakjakor bad u mradkhlaw kiba sngewtieng ban pyrkhat. 

 Ka don kawei ka kot jong ka Arundhati Roy kaba kyrteng, The Shape of the Beast ne ka Dur jong u Їakjakor/Mradkhlaw. Hoid, kane kam dei ka komentari ne jingkynthoh halor ka kitab Jingpynpaw, hynrei ka kdew ia ka jinglong jong ka juk neo liberal kaba ngi im mynta.

Ka Jingpynpaw ka dei ka kitab jong ki jingthoh pharshi bad la pyndonkam da ki dur bad ki dak bapher. Ki dur ne ki dak pharshi ki lah ban long ki dak jingkheiῆ, ki mradkhlaw ne kino kino ki jingthaw kiba don sawdong sawkun bad wat kiba don ha sahit bneng ruh kumjuh. Lyngba ki jingkren ne ki dur pharshi ki briew ki pynpaw ia ki jingsngew jong ki, bad khamtam ha ka juk ne ka hima ba ka don ka jingsynshar donbor bad jingsynshar lahduh kaba thombor, kaba pynїap bad pynkbum jubor, ki nongshong shnong haba ki sngewsheptieng ban kren ne їeng pyrshah ia ki nongsynshar donbor ki shu dro ne kren pharshi. Nalor ki jingkren ne ki dur pharshi ki don sa ki jingphohsniew ne jingithuhpaw. Їa ki dur ne jingkren pharshi ha ka kitab Jingpynpaw ngim dei ban shim ia ki kumba ki sawa, hynrei tang kum ka lad ka lynti ban sngewthuh shai kdar ia ka jingmut ba ki kwah ban ai bad ban pynshai.

Kum u khynnah Sunday School nga shait salia ia ka kitab Jingpynpaw bad sheptieng ban pule shaphang u Їakjakor, ki mradkhlaw bad u dak jingkheiῆ 666. Hadien ba nga la san ngan sa sngewthuh ba ki khana shaphang u Їakjakor, ki mradkhlaw bad u dak jingkheiῆ kiba don ha ka kitab Jingpynpaw ki dei tang ki dur pharshi kiba shat phalang ia ka jinglong jingman ka imlang sahlang bad ka synshar khadar ha ka por jong ka Hima Rom hyndai. U Їakjakor, u mradkhlaw bad u dak jingkheiῆ ki їathuh bad shat phalang ia ka jinglong ba runar jong ki Patsha ka Hima Rom hyndai kiba la pawnam ha ki kam pyntriem, ki kam pynїap dusmon ia ki briew, ki kam їaumsnam bad ka jingban beiῆ ia ki nongshong shnong kaba la palat liam. 

U Patsha Caligula um salia ban pynryngkang par bad pynїap ia ki briew khlem daw. Um pyrwa ban tuh, ban lute, ban pynheh ia ki khajana bad ban pynsyrwa kai ia ka spah jong ka Hima ha ki kam awria bad kam sngewbha jong u. Ka jingrunar u Domishian ka long palat liam ban ia u Nero. Une u Patsha um ju khieῆ snep iano iano, u suba ia baroh bad u mut sniew ia baroh. Um ju sngew ei ei ban pynphlei snam bad ban pynїap briew.

Caligula

Ha ki lynnong 12 bad 13 jong ka Jingpynpaw ngi pule shaphang u їakjakor, u dak jingkheiῆ bad u mradkhlaw. Ňiuma, kine ki dei ki dur pharshi kiba kdew ia ka jinglong ka synshar khadar ha kato ka juk. Ka bor bad ki nongrim jong ka bor kim lah ban treikam khlem ki Patsha ne ki nongsynshar. Katkum ka Jingpynpaw, u Їoannis u kdew ia u Їakjakor kum ka tyllong jong ka bor kaba bunsien ki briew ki pyndonkam bakla bad ia u Mradkhlaw uba i triem kum u nongpyntreikam ia kata ka bor ban khῆiot bad ban beiῆ ia ki briew. Ki nongthoh komentari ki batai ba U Їoannis lyngba ki dur pharshi u їeng bad kdew pyrshah ia ka bor bad ka jingsniew jong ki Patsha kiba ban beiῆ bad kiba pynphlei ia ka snam jong ki briew kiba lui lui.

Shisien pule ia ka kitab Jingpynpaw ngin sngew baїong bad sheptieng shisha ia u Їakjakor, u mradkhlaw bad u dak jingkheiῆ. Ha kajuh ka por pat nga kwah ban kdew ba ha kane ka juk kaba ngi im mynta ki don shibun ki dak jingkheiῆ bad ki їakjakor kiba pyntieng, pynsyeir bad pynsuhjer ia ka jingim. Kumta ngi dei ban їenglang kawei kum ki nongshong shnong bad їakhun pyrshah ia ki.

Ki dak jingkheiῆ kiba pynsuhjer bad pynsheptieng ia ka jingim jong ki briew ha kane ka juk ki long:

  1. Ki dak jingkheiῆ kiba kdew ia ka jingkiew dor ki marbam mardih man la ka por.
  2. Ki dak jingkheiῆ kiba kdew ia ka jingkiew dor ka bai kali bad ka bai leit bai wan kaba man la ka sngi.
  3. Ki dak jingkheiῆ kiba kdew ia ka jingrem dor ka bai dawai, ka bai doctor bad ka bai sumar pang ha ki hospital.
  4. Ki dak jingkheiῆ kiba kdew ia ka jingrem dor ka bai wai їing bad bai wai dukan.
  5. Ki dak jingkheiῆ kiba pyni ba ki nongtrei nongbylla ki trei kum ki mraw 12 kynta haduh 18 kynta ha ka shi sngi kaba long pyrshah ia ka aiῆ briew bad ka aiῆ blei.
  6. Ki dak jingkheiῆ kiba kdew ba ka bai bylla bad ka tulop ba ki nongtrei nongbylla ki їoh ki long kiba poh dor bad duna shaba palat.
  7. Ki dak jingkheiῆ kiba kdew ba 75% ne hynῆiew phewsan ngut na ka shispah ki trai Jylla ha Meghalaya kim don shuh ka khyndew lajong ba ki longtrai bad ba ki lah ban rep ban riang, ban shna їing shong bad ban ai pateng ha ki khun ki kti.
  8. Ki dak jingkheiῆ kiba kdew ia ka jingkiew ka jingdon ki samla bad ki nongshong shnong ki bym donkam donjam. Ka jingkyrduh kam ha ka Jylla ka long kaba jur khamtam eh ha kine ki ar snem hadien ka jingwan lynshop ka khlam covid19. Haduh u bnai April 2020 ka jingdon ki nongshong shnong ki bym donkam donjam ha Meghalaya ka long 10% lane shiphew na ka shispah ngut bad une u dei u dak jingkheiῆ uba heh.
  9. Ki dak jingkheiῆ kiba kdew ba ka Jylla Meghalaya ka dei ka Jylla kaba bun ki briew kiba duk bad kyrduh. Kumba 55% lane sanphew san ngut na ka shispah ki nongshong shnong ha ki shnong kyndong ki im ha ka jingduk bad jingkyrduh.
  10. Ki dak jingkheiῆ kiba kdew ia ka jingbun ki khyllung kiba khlad noh tang mar iakha ne hadien katto katne bnai bad ki dak jingkheiῆ kiba kdew ia ka jingkhlad khlem dei por jong ki kynthei ha ka por ba ki pun bad kha khun. Ha Meghalaya na man la ka shi hajar (1000) ngut ki khyllung kiba dang kha, kumba laiphew saw (34) ngut ki khlad noh tang mar iakha ne tang hadien katto katne bnai. Bad tang ha ka snem 2020 kumba hynriew phew (61) ngut ki kynthei ki khlad noh ha ka por ba ki kha khun.
  11. Katkum ka jingїathuh hapoh ka Їingthaw Dorbar Thaw Aiῆ ka Jylla ba haduh ka snem 2017 ka jingdon ki khynnah kiba la pep skul ka la jan kot shi lak ngut.
  12. Ki kam pynmynsaw bad jingleh be ijot ia ki kynthei ka nang jur ha ka Jylla bad tang ha ka snem 2020 kumba lai spah sanphew (350) ngut ki kynthei ki shah thombor bad shah shoh. Kine ki dei tang kiba la ai ka jingujor ha ki bor jong ka aiῆ bad ym lah ban їoh jingkheiῆ satia ia kiwei pat ki bym nud ban ujor ia ki nongleh kam sniew.

Kitei bad kiwei ki dak jingkheiῆ jong kane ka juk ki dei ban pynduh thiah ia ngi ki nongshong shnong bad ngi dei ban їawanlang bad їakhun pyrshah ia ki.

U Їakjakor, u  Mradkhlaw bad u Dak jingkheiῆ ki lah ban wan paw ha ki dur kiba pher. Ki lah ban wan paw ha ka dur jong ki nongsynshar leh donbor (dicator) ne ki lehnoh (terrorist), ki lah ruh ban wan paw ha ki dur jong ki briew kiba shongshit niam ne ki riewshongshit jaitbynriew kiba kwah ban їalehthma ne їaumsnam ha ka kyrteng jong ka niam bad jaitbynriew. Ki lah ruh ban paw ha ka dur jong ki nongkhaїi, ki company bad ki mahajon kiba khῆoit beiῆ bad pyntrei mraw ia ki nongtrei-nongbylla; kiba knieh jubor ia ki khlaw, ki jaka rep bad kiba pynjot ia mariang. Ki lah ruh ban wan paw ha ka dur ki nongpynїap briew bad ki riewbehnong.

Hapdeng ka jingsheptieng bad ka jingshah pynshitom kaba shyrkhei U Їoannis u shlur ban kdew bad їeng pyrshah ia ka Bor, ki nongrim jong ka bor bad ia ki Patsha jong ka Hima Rom. U kren pharshi, u їohipaw bad u phohsniew bad lyngba jong ki u ai jingtngen, ai mynsiem, ai jingkyrmen bad u pynshlur ia ki briew. Namar ha pyrshah jong ka bor kaba leh donbor bad kaba pynshitom beiῆ, ka don kawei pat ka bor kaba sngewlem, kaba їatiplem lem, kaba pynkup bor ia ki riewpaidbah bad ia ki rangli ki juki. Kata ka dei ka bor jong ka jinglaitluid, ka hok bad ka jingshisha.

Ka kitab Jingpynpaw ka kren ruh shaphang ka Bneng bathymmai bad ka Pyrthei bathymmai-. “Nangta nga la їohi ia ka bneng bathymmai bad ia ka pyrthei bathymmai…u Blei un ῆiad noh ia ki ummat baroh na ka khmat jong ki; bad ka jingїap kan ym long shuh, lymne ka jingsngewsih, lymne ka jingїam, lymne ka jingpang, kan ym longshuh…kin ym thngan shuh, lymne sliang shuh, lymne ka sngi kan ym shoh ha ki, lymne kano kano ka jingshit”. (Jingpynpaw 21:1-4) Kane kein ka pyrthei ka bathymmai kaba dang lah ban long; kaba u Їoannis u la phohsniew, u la їohipaw bad u la angnud ban pynurlong. 

Amen

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15,748 other subscribers

Kyrsoibor Pyrtuh is a pastor interested in intersection between theology and social power

Be First to Comment

    Leave a Reply