Ki Nongrep-Nongbylla bad Ka Shrip Jingkyrmen Kaba Teh Junom

Ka lamphrang da ka Raiot: Ha I jingthoh iba lyngkot i Bah Steward Khongjee I ktik ia ka jingmut jingpyrkhat jong ki nongpule bad I pashat ruh kattno katne tylli ki symboh kiba ngi dei ban ia pyrkhat lang. Ki jingeh ba ki nongbylla-ki nongrep ki mad ki paw tyngkrein bad ym don pat kiba iohsngew ne pynshah skhor ia ka jingud jingnam jong ki. Pynban la shu pynbieij-pynthamme ia ki shnong kyndong da ki kam pynroi bad kaba kham shyrkhei ka long ba la pynsngap jar ia ka sur jong ki nongrep-nongbylla. Shuh shuh la hikai bad pynbor ruh ia ki nongbylla-nongrep ban pynkohnguh bad mane Blei ia ki heh ki hain. Nuima, lyngba kane ka jingthoh, I bah Khongjee i pan jubab halor ki katto katne ki ishu.

Nongbah Jynrin, West Khasi Hills, waiting for Uranium ecocide
Nongbah Jynrin, West Khasi Hills, waiting for Uranium ecocide

Uei u nongrep bad kiei ki jingeh ba ki iakynduh ha ka jingim jong ki?Nga tharai kane ka dei ka jingkylli bad ka phang pdeng kaba dei ban buh hakhmat eh ha kino kino ki jingiakren ne jingiatai ne ki jingiapyrkhat ne jingpytreikam ia ki kam pynroi (development interventions) ha ki shnongkyndong (Rural Areas/Villages)

Ha kane ka por ba mynta ia ka imlang ka sahlang la phiah ha ki artylli ki bynta kiba iapher kawei na kawei pat (extremes) ki ba ym lah ban ia kynduh lano lano ruh. Ha kawei ka liang ngi don ki nongbylla bad ki nongrep kiba ka jingim jong ki ka long ka bym thikna (no security). Ka lashai ne ka lawei jong ki nongtrei-nongbylla sngi bad ki nongrep ka long ka bymthikna, wat tang ha ka shitaiew shihat ruh ka jingim jong kam long kaba shngain.
Ha kawei pat ngi don ki briew, ba ki nongrep ba duk ba dang duna ki peit sha ki kum ki BLEI ki ban siewspah lem ia ki na ki jingsohsat jong ka jingim. Pynban hapdeng kane ka jingburom jong ki nongrep-nongbylla ia ki heh ki hain, ki shem ba ka long pynban kumba pynapshrip ialade bad ki pateng jong ki. Kumne ka jingim jong ki ka iai tyllun tang ha ki jingkyrmen (mirage of hope) bad ka shrip jong ka jingkyrmen ka long ba katba nangkyrmen katta ka nangteh shi teh ia ki haduh ba kan da syngit syndon khak ia u pdot jong ki hi haduh u pud ba kim long khih shuh.
Ia ki nongrep- nongbylla la hikai ia ki kumne: (i) ba kin kren don akor ia ki heh bad ym ban buh jingkylli eiei ia ki heh ki hain (ii) ba ki dei ban pyni ia ki khmat phuh samrkhie ha khmat jong ki korshondur ne ki Television camera (iii) la hikai ia ki ba kin hun ka dohnud bad bret ia baroh ki jingangnud tang da kaba shu peit iapbieij ia ki riam ki beit, ki jainkup jainphong bad ki kali, ki iing paki-dulan ba remdor jong ki riewspah bad ki riewdonburom (iv) la hikai ba kin kyrmen ba u jhur ba ki ioh na ki khlaw jong ki ha kawei ka sngi un sa pyllait ia ki na ki jingeh (v) la hikai ruh ba kin pynbor ialade ban ngeit ba u jhur u lah ban ai ia ki baroh ki nutrients ba ki donkam na ka bynta ki khun ki kti jongki watla kim ioh PROTEINS eiei ruh em (vi) Ki heh ki hain kin pynpaw bad ong ia ki nongrep “peit ngi long ki briew kiba sngewrit haduh ba ngi da bam da ka jinghun mynsiem jongngi ia ki niut jongphi.Tangba wat khmih lynti eiei kein ba ngin bam sah ia ki namar ngim mlien”Ngi shu ialeh mynleh kumba bang namar ba ngim ju ioh”.

Children's toys
Children’s toys, East Khasi Hills

Ka kam leit phai biang sha ka bam rep ka long kaei kaei ka bym lah ban long bad kynmaw ia kane.Ki khun ki kti jongngi ki donkam ia ki cash crops ban ioh pisa ban thaw iing thaw sem, ban shongskul bad ban ioh sumar pang. Lada leit ai da u phan ha ki SKUL ne HOSPITAL yn ym don ba pdiang. Kynmaw wat shah thok ha ki sein puh.
Lada jyrngam ka State phi tharai phin ioh nam ne ioh burom ne ioh credit ma phi ki nongrep ha ki shnong kyndong? Em ki heh ki hain kin shim ka burom sha lade bad kin thaw credit balance ma ki khnang ba kin dup ioh thaw project shuh shuh ma ki ba kin ioh lute shuh shuh na phi..

NESFAS 3Lada ki phah bam rep sah, ki dei ruh ban ai ka jingkyrshan ba pura ne support system iaphi haduh ba phin da lah ban pynbiang ia baroh ki jingdonkam. Ka NESFAS ka lum 850 (phra spah sanphew) tyngka na ki nongbam ha kawei ka LITTLE CHEF ban pynmih fund na ka bynta ki 41 tylli ki shnong kiba iadon bynta ha ka INTERNATIONAL TERRA MADRE. Namarkata, ka jingkylli ka mih, haduh katno ngut ki nongbam kin wan kat haduh ban lah ban pynmih fund na ka bynta ki nongrep? ne ki mut ban shu siew ne ai tang ban ioh thied shana ki khun jongki? Balei ki da pynlut 80lak (phra phew lak) tyngka tang ban leh ia ka Lazer video ia ka law kyntang ha Mawphlang na ka bynta ki nong America?

Kylli na ki heh ka NESFAS kiba ieid eh ia ki nongrep ba haduh katno tylli ki jait jhur ki tip khnang ba ma ki ruh ki dei ban poi sha khlaw ban leit kheit hi ia ki? U Bah Phrang Roy ne kiwei pat kiba kam ba ki ieid ia ki nongrep ne ia ki bam tynrai (indigenous food) jong ki Trai Ri kim lah ban shu kren khlem da pynlong ialade ka bynta jong ka system kaba ki kam ba ki ieid palat.

Ki politician, ki NGO baroh ki ba iadon bynta ha ki kam pynbieij-pynthamme ia u paudbah ki DEI BAN AI KI JUBAB.

Steward Khongjee in his favourite past time
Steward Khongjee in his favourite past time

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Steward Khongjee Written by:

Steward Khongjee is a school teacher based in Sohra (Cherrapunjee)

Be First to Comment

Leave a Reply