Shiphew Tylli Ki Shympriah Kti

Kumta U Trai u kylli ia u (Moses), “Aiu me bat ha la ka kti” (Eksodus 4:2)

Ki shiphew tylli ki shympriah kti ki pynlong ia ki artylli ki kti bad ki pung kti. Da kine ki shiphew tylli ki shympriah kti ngi trei ngi ktah bad ngi trud ia ka maw ka dieng ban bam bad kamai na ka umsyep. Da ki shiphew tylli ki shympriah kti ngi їakhun-їaksaid ban bit ban biang ka jingim, ngi pynїar bad pynkhraw ia ka kam ka jam bad ka khaїi-pateng. Da kine ki shiphew tylli ki shympriah kti ngi puh ngi daiῆ bad ngi lur ia ki lyngkha ki hali. Da ki shiphew tylli ki shympriah kti ngi dro, ngi thoh bad pynwandur ia ka mynta bad ka lawei. Da ki shiphew tylli ki shympriah kti ngi khan, ngi duwai, ngi phirat bad ngi tei ia ka jingim, ka imlang sahlang bad ka pyrthei. Da ki shiphew tylli ki shympriah kti ngi bsa, ngi їada bad ngi kner ban kyrshan, ban kyntiew bad їarap lem ia kiwei.

Ka kitab Eksodus ka їathuhkhana shaphang ka jingphet bad jingїaid lynti jong ka kynhun u Moses sha ka jinglaitluid na ki kti kiba runar bad ki kti kiba ban beiῆ jong ki Pharoah ka Ijipt. Ka kitab Eksodus 3 bad 4 ki їathuhkhana shaphang ka jingkhot bad ka jingkut jingmut jong u Moses ban їakhun bad їalam ia ka kynhun jong ki mraw sha ka jinglaitluid sha Ri Kanan. Ki riewstad Baibl ki shem ba kita ki mraw ki kynthup ym tang ia ki Hebru, hynrei kiwei de ki jaitbynriew kiba long mraw ha ki Pharoah ha Ijipt. Kumta ki riewstad ki jer ia kane ka kynhun kum ka kynhun u Moses.

Ka khana shaphang ka jingphet bad jinglaitluid jong ka kynhun u Moses ka long kaba jrong bad ki  don ruh shibun ki jingjia ha kane ka jingїakhun bad jingїaid lynti jong ki haduh ba kin da buhai shnong ha Ri Kanaan. Kynmaw ka Kanaan kam dei ka Ri kaba thylli ne ka bym don ki briew kiba la shong shnong, pynban ha shuwa ka jingbuhai shnong jong ka kynhun u Moses, ki jaitbynriew kiba pher kum ki Kanaan, ki Hit, ki Amor, ki Peris, ki Hib bad ki Jebus ki la don bad shong shnong lypa ha Kanaan. (Eksodus 3:17) Kumno ka kynhun u Moses ka buhai shnong, ka tei bad saiῆdur thymmai ia ka jingim ha Kanaan, naduh ka trei ka ktah, ka kamai kajih, ka synshar-khadar, ka niam ka rukom bad ka kolshor ka dei kawei pat ka khana.

Ki katto katne ki symboh kiba ngi lah ban їoh na ka jingїakhun jong ka kynhun u Moses ha Ri Ijipt:

  1. Ka paw shai kdar ba u Blei u long ha ka liang jong ki mraw kiba shah ban beiῆ-“Nga la їohi haduh katno la pynshitom beiῆ ia ki briew jong nga ha Ijipt; nga la їohsngew ruh ba ki ud ban їohlait na ki nongpyntrei mraw.Nga tip ia ka jingshah shitom jong ki baroh.” (Eksodus 3:7)
  2. Ki mraw kiba shah ban beiῆ ki dei ki jingthaw ba kordor bad ki dei ki briew jong u Blei-“…la pynshitom beiῆ ia ki briew jong nga ha Ijipt” (Eksodus 3:7). “Ki briew jong nga kin shah skhor…” (Eksodus 3:18)
  3. U Blei ym tang ba u sngewlem ne shah skhor ia ki jingud jong ki mraw, hynrei u їashim bynta lang bad ki ha ka jingїakhun ban їoh ia ka jinglaitluid-“bad kumta nga la wan ban pyllait ia ki na ki nong Ijipt bad ban їalam noh ia ki na ka ri Ijipt sha kata ka ri kaba їar bad kaba seisoh…” (Eksodus 3:8)
  4. Ka jingїakhun ban lait na ka jingban beiῆ bad jingleh donbor jong ki Pharoah kam dei ka kam marwei shimet, hynrei ka dei ka jingїaleh jong ki riewpaidbah, ki rangli ki juki bad ki mraw kiba long ki langkῆia bad ki nongshah ban beiῆ ha ki kti jong ki Pharoah kiba runar. “Khie leit lumlang ia ki tymmen ki san…” (Eksodus 3:16).

Nalor kitei ki symboh, ka jingїakren bad jingїapynphai ktien hapdeng u Blei bad u Moses ka long kawei pat ka khana kaba kongsan. Haba u Blei u khot ia u Moses ban shim ia ka jingkit khlieh ban їapur bad їawer ia ki mraw ba ki dei ban їeng lang kawei bad їakhun na ka bynta ka jinglaitluid, ka la don ka jingїatai nia kaba jur hapdeng u Blei bad u Moses. U Moses u pynpaw ba um lah ban shim ia ka jingkitkhlieh namar u ai daw ba um don ei ei bad um nang ei ei, hynrei tang shikyntien u Blei u kylli ia u Moses- “Aiu me bat ha ka kti?” lane kaei kaba don ha ki kti jong me Moses? U Moses u la jubab, “U diengduh” (Eksodus 4:2). Da uta u diengduh bad ki kti jong u Moses, u Blei u la hukum ia u ban їalam bad pyllait luid ia ki mraw.Ngin ym їakren hangne ia ki jingjia kiba bud ryngkhi bad ki kam ne ki jingїaleh jong u Moses ryngkat ki mraw. U Blei u kob ia u Moses bad u peit sha ki kti jong u. Kaei kaba me lah ban leh Moses na ka bynta ki mraw kiba shah ban beiῆ? Haduh katno ki kti bad ki shympriah kti jong me ki long kiba tlot ba me artatien?

Ngi im ha ka juk “neo-liberal”, ka juk kaba rhah spah bad khwan myntoi shimet, ka juk kaba pynlong mraw ia ki briew, ka juk kaba ban beiῆ ia kiba duk ba rangli, ka juk kaba bamsap bad kaba shim im im peit peit ia ka jingim briew, ka juk kaba synshar donbor, kaba khῆoit bad set jubor ia ki sur jong ki nongshong shnong. Ha kane ka juk ngi donkam ban їakhun ban їoh ka jinglaitluid- ka jinglaitluid na ka jingduk, jingthngan, ka jinglaitluid na ki jingpang, ka jinglaitluid na ka jingkyrduh kam bad na ka jingїoh bai bylla poh dor, ka jinglaitluid na ki jingshah ban beiῆ, ka jinglaitluid na ka jinglong mraw bad kumta ter ter.

Ngi lah ban pyrkhat artatien ba ngim don, ngim nang bad ngim tip ei ei. Kajuh ka jingkylli u Blei un kylli ia ngi- Aiu ngi bat ha ki kti jong ngi? Kaei kaba don ha ki kti jong ngi? Ngi don ka bor, ngi don ka jingtip bad jingshemphang kumta ngim dei ban duh mynsiem. Pynban ngi dei ban kyndit bynriew bad їeng noh mynta ban їakhun bad їaleh haduh ban da jop.

Aiu bad kumno ngi pyndonkam ia ki shympriah kti jong ngi? Ngan pynkut da kine ki kyntien

Shiphew tylli ki shympriah kti

Shiphew tylli ki shympriah kti, kim dei ban tuh ban thiem, ki dei ki ban bylla thoh dieng,

Kim dei ki shympriah kti jong ki “corporate”, ki dei jong ki “comrade”,

Kim dei ki shympriah kti jong ki kushonji, ki dei jong jong ki nongbylla sngi.

Kim dei ki shympriah kti ba khun ranab, ban pynїap i’u thab u dab,

Kim dei ki shympriah kti kiba thombor, hynrei kiba ῆiewkor,

Kim dei ki shympriah kti kiba leh khla, hynrei kiba їada,

Kim dei ki shympriah kti ban bam tyngka, ki dei kiba lur lyngkha,

Kim dei ki shympriah kti pynlong mraw, kim dei kiba leh thala;

Kim dei ki shympriah kti ban khlong mawshun, ban pynduh tyllong um,

Kim dei ki shympriah kti ban pynjot khlaw, ki dei ki shympriah kti dung kba-dung khaw.

Kim dei ki shympriah kti puh uranium, ki dei ki shympriah kti sharai blang-sharai masi,

Kim dei ki shympriah kti tei “New Shillong” ne kiba tih dewїong,

Kim dei ki shympriah kti ban siat kuli, ki dei ban ri jingri,

Kim dei ki shympriah kti ban leh be ijot bad leh mulot,

Kim dei ki shynpriah kti jong ki “neta”, ki dei ki jong phi jong nga.

Ki shympriah kti keiῆ jong ki riewpaidbah, ka bor kaba radbah

Kumta ki shympriah kti kin khih kin trei na ka bynta mynta-lawei.

Amen

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Raiot Collective Written by:

We are many, we are one.

Be First to Comment

Leave a Reply