Tang Ban Їatip – U Briew Uba Ki Khot U Dr Elias

Kane ka dei ka jingpynkylla khasi ia ka jingthoh, A Man Called Dr Elias, ba la thoh da I Bah Maurice G. Lyngdoh kaba la mih ha ka snem 1996. I nongthoh i la ai jingbit ban pynkylla ktien bad ban pynmih ia ka

Uba i-don burom, uba don ka maiῆ ka muh, ka dei ka dur jong uwei u rangbah uba baroh ki ithuh khmat bad shait їohi barabor ha ki thaiῆ Mawkhar jong ka Nongbah Shillong ha ki snem 1932 haduh 1948. U dei u briew uba lieh ka sniehdoh bad uba pdeng ka rynїeng, uba jrong tmaiῆ bad u ju sngewtynnad ban phong pynsyiad da ki shinakut bad patlun jrong kiba syiad. Um ju pep ban deng tai, kup tupia bad rah ia u diengduh haba u їaid ha surok. Ki nongshong shnong jong ka shnong Mawkhar bad ki shnong ba marjan ki burom bha ia u bad u ju їarap ia ki briew da kaba sumar bad ai dawai ei. U dei u doctor uba sumar bad ai dawai homeopathy. U briew u bym ju bunktien bad haba u kren u da nang ban jied ia ki kyntien bad kren da thew.

La kha ia u ha ka Nongbah Calcutta bad u dei na ka jait brahmin bad na ka longїing kaba bit ba biang. Ynda u la kham san, ka jingdawa ba u dei ban kamai noh ka la jur bha khamtam eh hadien ka jingkhlad jong u kpa. Kumta u la trei shitom bad seng ia ka kharkhana shon kot ha ka Nongbah Calcutta. Phewse tang hadien khyndiat por ki jingeh ki la ban ia ka jingim jong u bad u la їakhun bad їaksaid tyngeh ban jop ia kita ki jingeh. Ka dei ka por kaba eh bad ka jingwan tur kyrthep jong ki bor kiba na bar Ri ka la nang jur bad nang ban khia shuh shuh ia ki briew bad ki trai ri kylleng ka dewbah India. Ha kajuh ka por pat ki jinghikai jong ki riewkhraw, kum u Raja Ram Mohun Roy ki la suh thied bha bad pynkhlaiῆ ia ka jingtip bad pynskhem ia ka jingmut jingpyrkhat jong ki briew. Ki jinghikai kiba kordor jong ki riewkhraw kiba їadei bad ka jingїaryngkat briew ha ka imlang sahlang, nangta ka їoh ka kot bad ka pule puthi ki la saiῆdur bad sei ia ki samla kiba proh, kiba shlur bad kiba skhem jingmut ban їeng bad iakhun pyrshah ia ki bor kiba na bar Ri, kata ka bor jong ka Sorkar Bilat.

Kum u trai shnong jong ka Ri Bengal u la їatyngkhuh bunsien bad ki phareng. U la їalam khmat ruh ia ki jingїakhih kiba pher ban їeng pyrshah ia ka Sorkar Bilat. Bunsien kine ki jingїakhih bad jingїakhun ki shah thom da ka bor bad shah khῆoit jubor. Ka Sorkar Bilat ka thwet bad ka kput ia kito kiba їashim bynta ha ki jingїakhih bad kane ka pynlong ia kiba bun ban pyndem bad randien noh. Hynrei ma u marwei um shym pyndem satia bad u bteng ia ka jingїaleh. U ngeit ha ka jinglaitluid bad ba ka Ri ka dei ban ioh ia ka jinglaitluid. U ngeit ha ki nongrim bad ki jinghikai jong u Mahatma Gandhi. Lymda ka don ka jingїakhih paidbah kaba jur katkum ki hok, ka Ri kan ym lah ban їoh ia ka jinglaitluid bad yn ym lah ban pynurlong ia ki jingangnud jong ki para ri. U dei u dkhot jong ka seng Indian National Congress bad kum u nongbud jong u Gandhi u ngeit ha ka jingsynshar paidbah bad ki Їingdorbar thaw aiῆ. Um pdiang ba ki Bengali ki dei kiba poh hakhmat ki phareng bad u ju ong ia ki phareng ba ki dei ban nang ban burom bad pynїadei bad ki trai ri nong India bad ym dei ban shu ibeiῆ ia ki.  

Ka jingleh tohmet bad jingpynїap beiῆ jong ki phareng ia ki trai ri ha kylleng ka dewbah India ka la pynmong, pynbitar bad pynkylla ehrang ia u. Um lah shah ban їohi ba ki phareng ki pynshitom beiῆ ia ki para nong India. U sakhi ia ka jingsynshar donbor jong ka Sorkar Bilat kaba la pyndonkam ia ki shipai, ki pulit ban thombor bad khnoit beiῆ ia ki briew. Da ka bor jong ki shipai, ki pyrton ka Sorkar Bilat ka khῆoit bad pynduh jait ia ki jingїakhih paidbah kiba bun bad kane ka la wanrah ia ka jingmynsaw, ka jingїap bad jingduh ei da ki lak ngut ki mynsiem briew. Ka Sorkar Bilat ka thom da ka bor, ka bom ka tied bad pynshitom beiῆ ia ki nongїalam bad ki paidbah ha ki jingїakhih.

Kane ka jingthombor jong ka Sorkar Bilat ka la ktah jur ia ka mynsiem bad jingmut jingpyrkhat jong u bad u la rai kut ban aiti ia la ka jong ka jingim na ka bynta ka jinglaitluid. Kumta u la lum ia ki samla bad sa shisien u la їalam na khmat ia ka kynhun ki ehrang ban їeng bad їakhun da kaba tyngeh pyrshah ia ka Sorkar Bilat. Ka la jia ba ha ka por ba u Viceroy ka Ri India u leit jngoh ia ka Nongbah Calcutta ka la don ka jingbthei bomb ha ka surok ba dei ban їaid u Viceroy. Ki Pulit ki la pynlong ia ka jingtohkit kaba jur bad u la shah pharep ba u don kti ha ka jingpynbthei bomb. Kumta ki Pulit ki la thwet bad kthong ban kem ia u bad ia ki paralok jong u. Kane ka la pynlong ia u ban phet rieh na kawei ka jaka sha kawei pat bad ban phet syndon bak na ka Nongbah Calcutta, tangba shano un leit um tip, u la shuh phet la ka phet ruma tang ban lait na ka kti jong ki pulit bad ka Sorkar Bilat. Khatduh u la poi ha Ri Khasi bad u la pynithuh ialade kum u nonghikai niam Khristan. U la sah nyngkong ha Dawki bad shipor u la sah ruh ha Sohra bad hadien kata u la kynriah noh sha Nongbah Shillong. U la don ka jingїa-ithuh ithaw bad ki missionary bad u la jop ia ki dohnud jong ki da ka jingdon akor, jingdonburom bad jinglong babha jong u. Nalor kata u pyni ruh ia ka jinglong khristan kaba shisha, ka jingieit jong Jisu Khrist bad ka jingrhem mynsiem ban shakri ia u Blei bad ia la ki para briew. U la їoh ia ka jingshaniah jong ki missionary bad ki la ai jaka sah ia u hapoh ka Salem House (ka Salem House ka dei ka jaka shong ki khynnah hostel jong ka Mawkhar Christian High School mynta) kaba don ha Mission Compound. Kumta u shong u sah bad u trei u ktah ha kane ka jaka tat haduh ka sngi kaba u shu jah rngai kynsan na ka Nongbah Shillong ha ka snem 1948.

Ha ki snem ba u im ha Shillong u la їashim bynta shitrhem ha ki jingїaseng bad ki kam jong ka Balang. U don ruh ka jingtip kaba bniah bad janai halor ka ktien U Blei ne ka Baibl. U la plie ia ka jaka ai dawai ha Salem House bad hangne u sumar bad ai ia ki dawai homeopathy ia ki briew kiba wan sumar ha u. U don ruh ka sap kaba pyrpang ban їakren bad pynїadei bad ki jaitbriew bapher bapher.

Haba ka Ri India ka їoh ia ka jinglaitluid ha ka snem 1947, kyndit kynsan u la shu jah rngai na Salem House bad ym don ba tip mynno u mih bad shano u leit bad kane ka la jia ha kaba sdang jong ka snem 1948. Dei haduh ka snem 1962 ka la mih ka khubor ha ki kot khubor ha ka Nongbah Calcutta ba u la khlad noh. Ka khubor ka long shaphang ka jingkhlad jong u khlawait bad u nongїaleh jinglaitluid bad la ῆiewtang ia u kum u riewїakhun bad la ai burom pura ha ka por ba leit onthang ia u. Hoid u la dei shisha u riewshlur uba la nud ban їakhun pyrshah ia ka Sorkar Bilat bad u long uba shalak ban phetrieh bad lait na ki tyrsim jong ka Sorkar Bilat da kaba buhrieh їalade haduh khatsnem kynthih khlem don ba tip mano mano ruh. Ki la long ki snem kiba khim bad shitom bha ia u, hynrei haba la kylli ia u kumno ki bor ka Sorkar Bilat kim shem ia u, u la jubab ba um tip bad ka long kaba phylla. Shisien u pynpaw ruh ba u ngeit ha ka nongrim ban burom ia ki jait jingngeit baroh bad u ong ba ki jaitniam baroh ki long kiba khraw bad kiba kordor kumta u ῆiewburom ia kawei pa kawei ka jaitniam. Haba la kylli ia u, hato ka don mo ka por ba u sngewbtai bad sngewngiah ba u la hap ban phetrieh bad buhrieh їalade da ki phew tylli ki snem? u la jubab em, “kam don ka jingiaid lynti kaba jlan ia u briew uba thmu bad trei na ka bynta ka jingbha, uba їaishah bad don ka jingshaniah ha u Blei”.

Ka kyrteng kaba shisha jong u ka dei u B. N Banerjee bad ba la khot sin ia u, u Dr Elias. Um dei u Khristan, hynrei ka jingtip jong u shaphang ka jingngeit khristan ka long kham palat ban ia uno uno u Khristan. Ka jingangnud jong u ban їoh ia ka synshar khadar kaba laitluid na ka kti jong ki phareng ryngkat bad ka jingrhem mynsiem ha ka jingngeit bad jinghikai niam ki la pynlong bad pynwandur ia ka lynti їaid jong u.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Raiot Collective Written by:

We are many, we are one.

Be First to Comment

Leave a Reply