Ka jingïakren ïasuk hapdeng ka Sorkar India bad ki seng kieng atiar ka thañ shatei lam
mihngi ka Ri India, kum ka NSCN (IM), ULFA bad khamtam bad ka Hynñiewtrep
Liberation Council (HNLC), ka donkam ia ka jingïatai paidbah kaba sani. Ka paw ba
kine ki seng ki la kubur ban ïakren hapoh ki kyndon jong ka Riti Synshar ka Ri India.
Kumta ha ka jingrakhe ia ka Republic Day to ngin ia thir nia halor ka jingïadei ka Ri
Hynñiewtrep bad ka Ri India.
Ka Constitution jong ka Ri India kam dei kaba shu hap kum ka mana na bneng, hynrei
ka dei kaba mih na ki jingïatai nia bad jingpynwandur da ki nongmihkhmat na ki thaiñ, ki
kynhun bad jaitbynriew bapher kiba pynlong ia ka Ri India. Naduh ba la plie ia jingshong
Dorbar ha ka 9 Nohprah 1946, ka Constituent Assembly ka la ïakynduh bad ïashong
dorbar haduh lai snem lynter naduh 1946 haduh 1949. Ki nongmihkhmat ki la ïatai sani,
ki la prat jingmut bad da ka jingstad bad jingshem phang jong ki, ki la pynurlong ia ki
jingangnud jong ki kynhun, ki jaitbynriew bapher bad khamtam eh jong ki rit paid bad ki
trai muluk. Ïa ka Constitution ka Ri India la pdiang ha ka 29 Naiwieng 1949 bud sa ka
jingpynbna ia ka Ri India kum ka Republic ha ka 26 Kylla Lyngkot 1950. Ha ka
Constitution la bsuh ruh ia ki nongrim tynrai jong ka hok, ka jingshisha, ka jingïalong
mar ryngkat, jingïaburom kylliang bad jinglaitluid. Wat la ka long ka Kot aiñ bad ka Kitab
Synshar kaba khraw, kam long pat kaba janai bad ka don hi hangne ki thliew ki syar
bad ki jingduna kiba dang dei ban pyndap. Ha kane ka juk jong ka jingkhie rasong ki
riewshitniam, ki riewshit jaitbynriew kiba kwah ban synshar donbor tang kawei ka niam,
kawei ka kolshor bad kawei ka ktien, ma ngi ki nongshong shnong ngi dei ban
ïengskhem bad ïeng tylli kawei ban ïada ia ka Constitution jong ka Ri bad ia ki nongrim
tynrai jong ka.
Ka Constitution ka Ri India kam dei tang ka Kitab Synshar, hynrei ka dei ka Soskular
kaba la ïateh hapdeng ka Sorkar India bad ki Seng, ki Kynhun bad Jaitbynriew bapher
kiba pynlong ia ka Ri India bakhraw. Hapdeng u Nohprah 1947 bad Lber 1948, haba ki
Khasi State ki la soi ia ka Instrument of Accession, la kular ia ki paid ka Ri Hynñiewtrep
ban pynïoh ia ka hok bad jinglaitluid ban synshar hi da lade ïalade katkum ba la
maitphang ha ka Annexed Agreement. La khmih lynti ba ka Sorkar India kan burom ia
ka Soskular bad pynurlong ia ki kyndon hapoh ka por ba la buh. Phewse, kam shym la
long kumta bad ia ki Khasi State kiba laitluid ha kato ka por la pynrung jubor hapoh ka
Jylla Assam bad katkum ka First Schedule jong ka Constitution la ong, “Ka Jylla Assam
kan kynthup ia ki jaka, kiba shuwa ka jingpyntreikam ia kane ka Constitution, kiba hap
hapoh ka Jylla Assam, ki Khasi State bad ki Tribal area.” U Professor S. K Chaube u
ong ba kane ka dei ka “Act of State” bad ka long pyrshah ia ka mon jong ki Khasi State
ba la pynrung hapoh ka Jylla Assam hadien ba la pyntreikam ia ka Constitution.
Tat haduh 1949, ki Hima Khasi hapoh ka shatri jong ka Federation of Khasi States, ki la
ïakhun ban wanrah ia ka Ri Khasi hapoh kawei ka rukom synshar, wat la ka don ka
jingïaphnieng bad jingïapher jingmut jong ki seng, kum ka Federation of Khasi States
bad ka Khasi-Jaiñtia Federated State National Conference. Ka Khasi-Jaiñtia Federated
State National Conference ka dei ka kynhun kaba kwah ia ka Sixth Schedule bad hapoh
ka jingïalam jong u Rev J.J.M Nichols Roy, uba long ruh u dkhot jong ka Constituent
Assembly na Assam, la pynhiar kyrdan ia ki Khasi State sha ka Sixth Schedule kaba
long ruh pyrshah ia ka rai jong ka Khasi States Constitution Making Durbar kaba la long
ha ki bnai April haduh July 1949.
Kumba la kdew ha ka kot, Ka Ri Hynñiewtrep Shuwa bad Hadien Ka “Independence
Day”, lah ban shem ia ka tynrai jong ka jingïapyrshah naduh ka snem 1948 ha ka por ba
u Rev J.J.M Nichols Roy u la wanrah ia ka jingtyrwa ban bsuh ia ka kyndon ha ka
Article 190 kumne- “Nalor kata wat lada la ong ei ei ha ka Article 225, u Governor ka
Assam u lah da ka jingpynbna paidbah ban hukum ia kano kano ka bynta jong ki Hima
ban pynïaid noh kumba long hi ka bynta jong ka Autonomous District ha Ri Khasi-
Jaiñtia kumba la kdew ha ka Part I jong ka Table kaba la pyndait lang ha ka paragraph
ba 19 jong kata ka Schedule…” Ha kawei ka liang, ka Artilce 225 jong ka Draft
Constitution ka ai bor ia ka Parliament ban thaw aiñ halor ki State ne ka kynhun jong ki
State ne Hima kiba don ha ka Part III jong ka First Schedule, tang katkum ki kyndon
kiba don ha ka Soskular kaba la ïasoi hapdeng ki State ne kynhun jong ki State bad ka
Sorkar India.
Ka Federation of Khasi States ka la ïeng pyrshah ia kane ka jingtyrwa bad mar dor ka la
phah ia ka shithi sha New Delhi ban pyntip ia ka rai jong ka bad ka la kyntu jur ia u Mr
Guha, uba long ha kata ka por u nongmihkhmat jong ki Khasi State ha Constituent
Assembly bad la bthah ia u ba un pyrshah bad buh ha khmat ka Dorbar ia ka rai jong ki
Khasi State. Kham hadien u Professor G.G Swell u la pynshai ia ka rai jong ki Hima
Khasi kumne, “ka jingpyrshah ia ka jingpynrung ia ki Hima Khasi hapoh ka District
Council ka long halor ka nongrim ba kane kan pynhap ia ki Khasi State hapoh ka
jingsynshar ka Sorkar Assam bad ba ki Hima Khasi kin hap noh hapoh ka Jylla Assam.
Ngi pyrkhat ba lada ngi lah ban pynneh shuwa ia ki Khasi State kumba ki long, kan
ïarap bad pynsuk ban ïoh la ka jong ka Jylla. Ka jingpyrshang jong ngi ka la shu bijai ei
wat la ngi don ia ka jingbun paid ha ka Dorbar Thaw Riti jong ki Hima Khasi…kaba
phylla pat ka long ba ïa kane ka Dorbar la shu pynkut kynsan khlem daw.”
Ka jingpynbna kynsan jong ka HNLC ba ka la weng na ka jingïakren ïasuk bad ki Sorkar
ka pynkhie im biang ban plied ia ki kitab history jong ka synshar khadar ha ka Ri
Hynñiewtrep. Ka long kaba shisha ba ngin ym lah ban wanrah ia ka jingïamynjur lang
hapdeng ka Sorkar India, Sorkar Meghalaya bad HNLC lada ngi leh klet ia ka history.
Ñiuma, ki jingtip shaphang ka Seng HNLC, la ka long ka saiñpyrkhar lane ka rukom
treikam jong ka, ki duna than eh. Hynrei ha ka jingjurip kaba la leh kumba ar phew snem mynshuwa la shem ba 40% ki samla wadkam bad 25% ki samla pule ki pynpaw
ba ka Ri Hynñiewtrep ka dei ban laitluid na ka India, katba kiba bun balang pat ki
pynpaw ba dei ban ai ha ki Hima Khasi ia ka hok, ka iktiar bad ka kyrdan hapoh ka
Constitution ka Ri India. Lah ban kdew hangne, “Ha ka snem 1992 ka Khasi Students’
Union ka la pynim ia ka jingdawa ba dei ban pynïoh ia ka hok jong ki Hima Khasi da
kaba pynrung ia ki kyndon hapoh ka Constitution…”
Ka HNLC ruh ka la ïakhun halor kane ka mat bad ka kwah ba ka Ri Hynñiewtrep kan
laitluid na ka Ri India. Ka HNLC ka sngew ba ka jingïakhun da ka thma ka long kaba
kongsan khnang ban ïoh ia ki jingdawa bad jinglaitluid. Kumta ha ka jingïaleh jong ka,
ka la shah kynnoh ruh ba ka la donkti ha kaba pynïap ia ki pulit, ki suba nongsyntiat bad
kiwei kiba lui lui. Kumjuh ruh ka la shah kynnoh ba ka donkti ha kaba lute bad rahbor ia
ki briew. Ha ka snem 2000 ka Ministry of Home Affairs (MHA) jong ka Sorkar India ka la
ñiew be-aiñ ia ka HNLC katkum ki kyndon jong ka Unlawful Activities Prevention Act
(UAPA) 1967. La bteng ia ka jingkheiñ be-aiñ bad sa shisien ha ka snem 2019 ka MHA
ka la ñiew be-aiñ biang ia ka HNLC halor ki nongrim ba ka dei ka seng kaba ïakhun
thma ban laitluid na ka Ri India bad ba ka long ka jingma ia ka Ri bad ba ki kam jong ka
ki ktah ia ka shongsuk shongshngaiñ ka thaiñ baroh kawei. Ki nongïalam bad ki dkhot
jong ka HNLC ki la shah pynngat ha ki kyndon aiñ IPC bad UAPA. Ki la shah khot hajir
ban shah tohkit bad shah tian bishar sha Ïingshari.
Naduh ka snem 2004, ka la don ka jingpyrshang ban wanrah ia ka HNLC sha ka miej
jong ka jingïakren ïasuk. Ki seng, ki kynhun niam, ki riewshimet bad ki Sorkar ki la phah
ktien bad kyntu ia ki nongïalam jong ka HNLC ban wan sha ka jingïakren ïasuk khnang
ban pynkut ia ki kam pyntriem baroh, ban ïamynjur bad pynbeit noh ia ki jingdawa. Ha
kane hi ka snem, ka MHA jong ka Sorkar India ka la phah ktien lyngba U Rev P.B.M
Basaïawmoit sha ka HNLC, hynrei kine ki jingpyrshang ki khlem sei soh ei ei ruh em.
Dei tat haduh ka snem 2022 ba ka HNLC ka la mynjur ban phah ia san ngut ki dkhot
jong ka hapoh ka jingïalam jong u Vice Chairman ban sdang ia ka jingïakren bad ki
Sorkar.
La sngewthuh ba haba ka HNLC ka wan sha ka miej jingïakren ka la ban jur bad dawa
na ka Sorkar ba ka dei ban pyndam noh ia ki jingujor pyrshah ia ki nongïalam bad ki
dkhot jong ka. Ban pynthikna ba ki dkhot bad nongïalam ki ïoh ban rung bad mih laitluid
hapoh ka Ri khlem ki jingteh kyndon ne jingsyier. Lah ban ong ba kine ki dei ki lad kiba
lah ban wanrah ia ka jingshaniah hapdeng ki kynhun kiba ïadon bynta ha ka jingïakren
ïasuk. Lehse, shabar na ka kamra ïakren ïasuk pat ki lah ruh ban don kiba sngew
khohñioh bad ba ka HNLC ruh ka hap ban jubab shibun ki jingkylli halor ka jingshah
kynnoh ba ka thombor, ka pynïap, pynmynsaw bad rahbor ia ki para nongshong shnong
bad khamtam ia kiba lui lui.
Toi, ka Jylla, ka Ri bad imlang sahlang ki donkam mar dor ia ka jingsuk bad ka
jingbishar hok. Ka long ruh kaba kongsan ba ki Sorkar bad ka HNLC kin poi noh sha ka
jingmynjur bad jingpynbeit ia ki jingdawa. Ha kajuh ka por, kum u nongshong shnong
nga kyrpad jur ia ka HNLC ba kan wan phai biang sha ka miej jingïakren ïasuk bad ki
Sorkar. Nga kwah ruh ban buh hakhmat ia kine ki mat- (i) Ba ka HNLC kan ïasam lang
ia ka saiñdur ba ka don na ka bynta ka lawei jong ka Ri Hynñiewtrep bad ban plie lad ia
ka jingïatai paidbah (ii) ban thaw ia ka Kynhun jong ki tymmen ki san khnang ban
thawlad ia ki riewpaidbah kiba la long ki langkñia ha ka jingïaumsnam ba kin tip ia ki
jingshisha baroh bad ba ka HNLC ruh kan ïohlad ban ïasuk bad ki. Lyngba kane ka
Kynhun, ki riewpaidbah kin ïoh ruh ka lad ban pynpaw, ban kylli bad ban pyntngen
ïalade. Kane kan ïarap ruh ia ki ban khylliap noh ia ka kitab jingim kaba kthang jong ki.
(iii) ka paw ruh ba kumba ka HNLC ka la tlot ha kiba bun ki liang bad khamtam ha ka
jingdon ki dkhot. Hynrei ki lah ban mih shibun ki daw ha ki sngi ki ban wan ki ban
pynlong ia ki samla ka Ri ban pynkhie im biang ia ka kam kieng atiar. Ki Sorkar kim dei
ban kheiñ sting ia kane, pynban ki dei ban ïakhun shitom ban poi sha ka jingpynbeit ia
ki jingeh bad jingdawa jong ka HNLC.
Be First to Comment