Author: Rev. Kyrsoibor Pyrtuh

Kyrsoibor Pyrtuh is a pastor interested in intersection between theology and social power

September 5, 2021 /

Lada ki samla ki pule ia ka kaiphot, kaba dang shu mih shen, jong ka Niti Ayog halor ki thong jong ki kam pynroi lane kita ki “Sustainable Development Goals” kiba dei ban pynurlong ha ki Jylla ka thaiῆ shatei lam mihngi, kin shem ba ka lawei ka long kaba duh jingkyrmen. Ka Niti Ayog ka dei ka tnat jong ka Sorkar India kaba la tip mynshuwa kum ka Planning Comission. Ka dei ka tnat pyrkhat kam kaba ha khlieh duh bad ka kamram jong ka ka long ban thaw bad saiῆdur ia ki kam pynroi ha ka Ri. Ki dkhot jong ka ki kynthup ia ki stad ki jhad bad ki proh jabieng, naduh ki stad saian, ki stad kot “economist”, ki riewstad ka їoh ka kot, ka khaїi-pateng bad kumta ter ter.

August 29, 2021 /

Kine ki kyntien na ka Baibl (Mathaїos 5:17-20) la ju pyndonkam ia ki ban pynksan ne pynїeng ia ka thymmei ne ka mynnor. Hoid ka mynnor ka dei ka thymmei, kumta ka mynta bad ka lawei kin ym lah ban їeng khlem ma ka. Tangba kam mut pat ba kiei kiei kiba la long ne leh ha ka mynnor ki dei ki aiῆ ne ki hukum kiba ym lah shuh ban pynkhih ne ban kynthoh ne wat ban pynkylla na ka bynta ka jingbha bad jingїaid shaphrang jong ka jingim briew. Ha kajuh ka por kam long ruh kaba dei ban kheiῆ dewthala ne kheiῆ synrum ia ka tynrai bad ki jinghikai kiba la їohpdiang pateng bad lada don ei ei da kumwei ka long ban pule, ban bishar bniah bad thew ia ki.

August 22, 2021 /

Ym shym la don tang kawei ka jingїathuhkhana shaphang ka jingthaw ia ka pyrthei-mariang. Ha ka Baibl ruh ki don artylli ki jingїathuhkhana kiba їapher kawei na kawei pat (Jenesis 1 bad 2). Ki nongthoh komentari ki ong ba kine ki jingїathuhkhana ki dei kiba la lumthup na ki tyllong bapher bapher, kumta ki don ki jingїapher naduh ka rukom thoh ia ki jingїathuhkhana, ki kyntien ba la pyndonkam bad ki sker.

August 15, 2021 /

“Balei ba ka hok bad jingshisha ki kylla kthang, ba ym lah ban shah ia ki jingїapher-jingїaprat jingmut, ia ki nia bad nongrim kiba їapher, ba ka hok ka don sha jngai? Ka hok bad ka jingshisha ki long kiba kthang ia kito kiba don ha ka bor bad burom, ka jingїapher- jingїaprat jingmut kam long kaba sngewtynnat ia katto katne ki riewheh riewhaiῆ kiba bat ia u lakam synshar bad ka jingbishar hok ka jngai bah na kiba duk, kiba tlotbor bad kiba shah їehnoh beiῆ. Ňiuma, ngi dei ban їai kren ia ka jingshisha, ngi dei ban pynneh ia ka jingїapher bad jingїaprat jingmut, ngi dei ban pynpoi ia ka hok bad ka bishar hok ha ki tyngkong їing jong kiba tlotbor bad kiba duk. Ngan ym sngap jar da lei lei ruh em.”

August 8, 2021 /

Ha ka Gospel U Mathaїos la їathuh ba ki sngi bad ki їa kin wan ha kaba ki briew, “…kin їashetkylla iwei ia iwei pat bad kin isih iwei ia iwei pat. Haduh katta kan long ka jingsaphriang jong ka jingsniew ba ka jingieit jong ki briew kiba bun kan man khriat” (Mathaios 24:10-12).

July 25, 2021 /

Ki don bun ki jinghikai ba ngi lah ban їoh na ka Ryntieh bad ki Khnam. U Paulo Coelho u nongthoh kot ba donnam u ῆiew ia kita ki jinghikai ba ki dei ka lynti jong ka Ryntieh bad u Khnam ha ka kot jong u, The Archer. Ka Ryntieh bad ki Khnam ki dei ruh ka bynta jong ka kolshor bad dei-riti jong ka jaidbynriew Hynῆiewtrep. Ha ka Lynnong ba 14 jong ka kot, Pynїeng La ka Rasong, I Bah R.T Rymbai I pynpaw shynna ia ka dor bad ka bynta jong ka Ryntieh bad ki Khnam ha ka jingim jong ki khun Hynῆiewtrep.

July 18, 2021 /

Ki don ki jingpynksan nia ba kam don jingmut ban їakren shaphang ka jinglaitluid bad jingpynkup bor ia ki kynthei ha ka Jaidbynriew bad ka Jylla kaba shim jait na ka kmie. Ki pynksan jur halor ka nongrim ba ki kynthei ki dei ki nongїohpateng, ki nongkhmih bad nongpynїaid ia ka spah-ka nongtymmen jong ka kur bad ka їing. Dei halor kane ba ki kynnoh katba mon ia ki kynthei bad tang pher wiak ki tei pop ha ki kynthei. Naduh ka poikha-poiman haduh ka pait їing pait sem ki pynkit ha ki kynthei.

June 23, 2021 /

Ki nongdiemadan wat la ki long ka kynhun kaba don ha trai duh jong ka pyrnon, pynban ki long ka kynhun kaba laitluid tam bad ki bun kiwei pat ki para nongshong shnong kiba kwah ban їoh lem ia ka kajuh ka jinglaitluid ban long kynrad bad long shakri hi da lade їalade. Kum kane ka jinglaitluid mano bym kwah? Ha kajuh ka por pat ka jingim ki nongdiemadan ka dap da ka jingїakhun lynter, khamtam ha kane ka Nongbah bad ka Jylla Meghalaya ha kaba ka aiῆjong ka Sorkar India kam pat shym la treikam satia bad kane ka buh ia ka jingim bad ka kamai kajih jong ki nongdiemadan ha ka jingeh bakhraw. Hynrei ym tang ia ki nongdiemadan, ki paidbah nongshong shnong ruh ki shem jingeh namar katba ym pat pyntreikam pura ia ka aiῆ kan long kaba kaba shitom ban wanrah ia ka jingkylluid bad ka jingitynnad jong ka Sor Shillong.

May 23, 2021 /

Nalor ka jingsar ka khlam covid19, ka jingїakynad bad jingїaumsnam hapdeng ka Ri Israel bad ki nongshong shnong ka Ri Palestine ka la nang pynsuhjer ia ka pyrthei. Kane ka jingїakynad ka la pynkha ia ka jingїatai nia haduh kine ki Lum Khasi. Ha ki rynsan ka social media la sakhi ia ki dur ryngkat ki jingthoh “I stand With Israel”, katba kiwei pat ki kynthoh jur ba ka Ri Israel ka leh donbor palat pud bad leh ki kam runar kiba shyrkhei da kaba ka ther bomb dusmon ia ki Nongbah bad ki Shnong kiba don ha Palestine bad da ki spah ngut ki briew, khamtam ki khyllung kiba lui lui ki la їap.

May 16, 2021 /

Ha ka wat kaba ar, ka khlam Covid19 ka la pynngiew bad pynher syrngiew shisha. Ka mynsiem ka pang ban їohi ba ki briew ki їam paitdohnud bad mareh na kawei ka hospital sha kawei pat ban wad jingїarap na ka bynta kiba ieid bathoiῆ jong ki bad ban їohi ia ki met їap kiba ap pali ban їoh ia ka jinglehniam ba khatduh. La palat shi snem la їakhun pyrshah ia ka khlam covid19 bad ka khlam ka la pynpaw pen ryngkew ia ki jingduna kiba bun, khamtam eh ha ka liang ka sumar pang bad ka jingkoit jingkhiah (Health care) ha ka Ri bad Jylla. Ňiuma, hapoh ka Jylla ki Dorbar Shnong, wat la hapdeng shibun ki jingduna bad jingbym don ei ei na ka liang jong ki, pynban ki la long ka borbah kaba la kyrshan ia ka Sorkar Jylla bad lymda dei na ka jingshimkhia bad jingtrei shitom jong ki, ka Jylla bad ka Nongbah ki lah khyllem naduh mynno.

May 9, 2021 /

Kawei na ki khubor bad jinghikai kaba khraw kaba u Jisu Khrist u la ai sha ka pyrthei ka long kane ba “u la wan sha ka pyrthei ban shakri, ym ban їoh ia ka jingshakri”. U Karl Barth, u theologian uba khraw, u la ai nam ia u Jisu kum “u briew na ka bynta kiwei” lane u briew uba im na ka bynta kiwei pat.

April 18, 2021 /

Ka jingshah sahnarphna bad ka jingmihpat u Jisu Khrist ki dei ki jingjia History kiba kordor ha ka pyrthei bad U Frank Macchia u kam kynti ba ka Jingmihpat u Jisu Khrist ka pynmynta ia ka jingkyrmen kaba mynhynnin. U Markos (16:12-13) bad u Lukas (24:13-35) ki їathuhkhana shaphang ka jingpynpaw jong u Jisu Khrist їalade hadien ba u la mihpat ha ki arngut ki synran, uwei na ki uba kyrteng u Kleopas, ha ka lynti sha ka shnong Emmaus.

April 11, 2021 /

Ha ka sngi ba u Jisu u rung khatduh sha Jerusalem, ka Nongbah ka la khynwin bad ki paidbah babun, khamtam eh ki Jiw, ki la mutdur bad ngeit ba ka їa jong u Messaia ka la poi shisha bad une u nongpyllait im un jop thiaw ia ki nongshun da ka waitlam bad ka thma.

April 4, 2021 /

Ka jingrwai bad jingshad Jerusalema ka mih na ka khyndew jong ka Ri South Africa, ka dei ka jingrwai bad jingduwai jong u/ka nongrwai ba u Blei un ialam ia u/ka sha ka nongbah jong ka jingsuk. Katkum ka kotkhubor Vanguard, ka jingrwai Jerusalema ka ai mynsiem bad ai jingkyrmen khamtam eh ia ki nong Palestine ne ki Arab jong ka Palestine bad ha ka video kaba la ring ha ka kyntoit shnong kaba kyrteng ka Babal Majlies kaba don ha East Jerusalem, ki samla ki їashad ha ka sur jong kane jingrwai ryngkat ka rukom shad tynrai jong ki. Kaei kaba shon bad ktah eh ia ki nong Palestine ne Arab jong ka Palestine ka dei ki kyntien bad ka jingmut kiba don ha kane ka jingrwai. Ka jingrwai ka dei ka jingduwai ba u Blei un ai pat ia ka Nongbah jong ka jingsuk. Ha kajuh ka por ka dei ruh ka jingduwai ban ioh ka jingїada, ka jingїalam lynti bad ka jingkmen.

April 2, 2021 /

Ngin plie ia ka khubor Good Friday ha kane ka por da ki kyntien na ka Gospel U Їoannis 11:49-50, “…u Kaїaphas uba la long u rangbah lyngdoh ha kata ka snem, u la ong. “A katno phi long kiba bieit! Hato phim sngewthuh ba ka kham bha ia phi ban shah ba uwei u briew un їap na ka bynta ka jaitbynriew,  ban ia kaba ka jaitbynriew baroh kawei kan jot noh?”- Kane kam dei ka jingkren rhem mynsiem ieit jaitbynriew jong u Kaїaphas ne ba u їaroh ia u Jisu ba u long u riewshlur uba їap na ka bynta kiwei pat. Hynrei kane ka shat phalang ia ka seng pyrkhat kaba la pun hapoh u Kaїaphas bad ha ki dkhot jong ka Dorbar Sanhedrin kiba thrang dik dik ba u Jisu un їap noh bad ban pynkut noh ia ka jingim bad ki kam kiba khraw jong u.

March 21, 2021 /

Ka arphew saw tarik u Lber ka dei ka sngi kaba kyrpang kaba la tip kum ka International Day for the Right to Truthbad ka dei ruh ka lyngkhuh sngi їap jong u Bishop Oscar Romero. Kumta ngan pynkut ia kane ka puson da ki kyntien jong u Bishop Romero kiba ong-

“Їa U Blei ngi lah ban shem ha ki jaka bad ki khep ba don ka jingsynshar bad jingbishar hok bad ngi lah ruh ban їashem ia U ha ka lynti ka jingshisha”

March 14, 2021 /

Ka aїom Lent ka dei ka por kaba ngi puson jylliew shaphang ka jingshah pynїap U Trai Jisu na ka daw ba u їeng pyrshah ia ka jingrunar jong ka pyrthei. Hoid, ka pyrthei-mariang kaba u Blei u la thaw ka long kaba bha, hynrei ka dap ruh da ki jingrunar bad ki pop kiba shyrkhei- kum ka tuh ka thiem bad ka bamsap, ka thok ka shukor, ka pynїap bad shohnoh briew. Ki briew ki khwan myntoi bad khamtam eh kiba don ha ka bor ne kyrdan (ym baroh), kim salia wat ban pynjot ne shim ia ka mynsiem briew tang ban biang la ka met. Ki khunbynriew ki їabeh sa tang ia ka spah ka thapbalieh bad ha ka jingїabeh spah ngi pynjot pathar ia ka mariang, ngi knieh jubor ia ka khyndew na ki trai ri bad ki nongrep, ngi pynkylla duk bad pynkylla phetwir ia ki million ngut ki para briew. Ngi thombor, ngi byrngem, ngi kyrdem ia kiba tlot bad ba lui lui.  Nalor kine sa kiwei pat ki kam runar kiba jyllei, ka batbor, ka jinglehtohmet bad jingsloit ia ka longrynїeng ki kynthei bad ia ki khynnah, shynrang bad kynthei. Kine ki jia ha kane ka Jylla, ka Ri bad kylleng ka pyrthei.

March 7, 2021 /

Katkum ka Baibl ki khun Israel ki ju kam ba ki dei ka Jaitbynriew kaba la jied kyrpang bad kumta ki mutdur bad kwah ban pynneh ia ka jingkhuid jong ka snam bad ki la pyrshang ban ym pynjaboh ne pynjngut ia ka da kaba khanglad ia ka jingshong kha khleh. Ym tang katta, ka la don ruh ka khep ba ki pyrshang da ka bor ban pynkhuid ia ka snam da kaba kyntait ne pynїap ia ki bym dei ki Jiw ne ki shiteng Jiw.

February 28, 2021 /

Ka kyntien “politic” hangne kam thew ia ki “party” їaleh elekshon ne kam mut tang ka jingїaleh elekshon, wat la kane ka long kaba kongsan ha ka synshar paidbah. Kam mut ruh ka jingїaleh “politic” ban їakhem umkhi ne kyllan umphniang ia ki pung kti jongno re lymne ka “politic” jyllud khohwah. Hynrei ka thong ka long ban ngam ha ka thwei jong ka spah snem ba nyngkong bad ban їathir-їatai bad sei madan ia ki nongrim ba ka Balang ne ka Kynhun Bathymmai ka їeng ha katei ka juk. Katba ka kyntien “economic” ka thew ia ka їoh ka kot bad ka kamai kajih.

February 21, 2021 /

Ka jingpyntreikam U Nero ia ka aiῆ ban shon shap da ki dak jingkheiῆ ia ki nongshong shnong ka їasyriem bad ka “panopticon” jong u Jeremy Bentham u stad pyrkhat ka spah snem ba khatphra. Ka kyntien “panopticon” ka wan na ka ktien “Panoptes” ki Grik hyndai.

February 14, 2021 /

Ka sngi lehkmen valentine ka snem 2021 ka hap ha ka Sngi U Blei. Ha kawei ka liang, ka long kaba sngewtynnat bad sngewdon jingmut namar ba ka Baibl ka hikai ba U Blei u long ka jingieit bad ka jingieit ka dei ka jinglong tynrai jong U. Ka jinghikai shongtynrai jong ki Balang Khristan ruh ka snoh rdin ha ki artylli ki hukum kiba khraw- ban ieit ia u Blei bad ban ieit ia u para marjan bad ki parabriew. Kawei ka hukum kam lah ban їeng khlem kawei pat bad kawei kam don jingmut khlem kawei pat.

January 31, 2021 /

Ngi lyngngoh ruh ba ka Sorkar India haduh mynta kam kren shai halor ka Inner Line Permit (ILP) kaba ïadei bad ka Jylla. Wat ka Sorkar Jylla ruh imat kam shai, ki seng saiñ hima ruh ki bym thikna bad kiba khih jingmut kumba khih u khah kat shaba beh ka lyer. Ka jingdawa ia ka ILP la ka long kaba dang myntoi ne kam myntoi shuh ka long kawei pat ka mat ban ïatai, hynrei ka dei ruh ka ishu kaba la pynkhie ia ka jingïakynad bad jingïaumsnam bad haba khie ka jingïashoh-ïadat ka wanrah ia ka jingshongsyier, ka jingsheptieng bad jingduh bakhraw ha baroh ki liang.

January 24, 2021 /

Ka Chimamanda Ngozi Adichie, ka nongthoh kot ba paw nam ka kynthoh tyngeh halor ka jingma ban ngeit bad ïathuh tang kawei ka khana (The Danger of a Single Story). Kumta ha ka imlang sahlang ki mih ki jingïakynad bad jingïaumsnam lada kawei ka kynhun ka thom da ka bor halor kiwei lane ka kheiñ dewthala ia ka dei riti ne kolshor jong kiwei pat. Ha ka synshar khadar ruh ka mih ka jingeh bad lah ban khie ki thma lada kawei ka kynhun ne bor synshar ka pyntian ne pynngeit ne thep jubor ia ka saiñ pyrkhat jong ka halor kiwei pat. Lyngba ki por ka pyrthei ka la sakhi bad mad ia ki Syiem, ki Kaisar bad ki Patsha ba runar, ka la mad ruh ia ki nongsynshar leh jubor ne “Dictator”. Wat mynta ruh ha ka juk synshar paidbah kaba ngi dang pyrkhat ba ka dei ka aïom kaba pangad bad ba shngaiñ, phewse kam shym la long kumta. Ha kiba bun ki khep ki nongsynshar kiba la jied da ki paidbah ki tan bad kurup lut pynban ia ka bor sha lade bad ki bat ne ïasambynta ia ka bor tang hapdeng jong ki ne kata kaba ki khot mynta ka “elected autocracy”.

January 3, 2021 /

Ka Kitab Eksodus bad ki khana kiba don ha ka kim dei shuh kiba dang thymmai, la ïai ïathuh-ïai pynshai shynna ia ki na kawei ka por sha kawei pat bad yn sa nang ïai pule bad ïai ïathuhkhana ha ki juk ki ban sa wan. Ka Kitab Eksodus ka don ka khubor kaba khlaiῆ bad khraw ym tang ia ka jingim briew shimet, hynrei khamtam eh ia ki kynhun jaitbynriew ne ki kynhun briew kiba ïaid lyngba ka lawar ding jong ka jingshah khῆoit beiῆ. Ka kitab Eksodus ka long ka nongmuna ia ki jaitbynriew ne ki kynhun briew kiba ïeng ban ïakhun pyrshah ia ka jingthombor, jingleh shilliang bad jingleh bymhok jong kiba donbor. Kiba bun ki jaitbynriew ne ki kynhun briew ha ka pyrthei ki la pyndonkam ia ka khubor bad ki khana jong ka kitab Exodus na ka bynta ban ïakhun bad ïaleh ban ioh ka jinglaitluid.

December 27, 2020 /

Ki sngi ki iaid! mynta ngi la poi sha kaba kut jong une u snem Ar Hajar Arphew. Une u snem u la pynlynga bad pynsheptieng shi katdei ia ka jingim namar ka jingpang khlam Covid19 kaba la pynjulor ia ka kamai kajih bad ia ka jingim. Hapdeng ka jingjulor, ki aiom ki leit bad ki aiom ki wan, kumjuh ruh u snem u leit bad u snem u wan. Ha une u snem ki la don shibun na ki ba ieit ba thoiῆ bad ki paralok kiba la nang leit noh sha ka jingjah thait ba junom. Ngi kynmaw ieit ia ki bad duwai na ka bynta kito kiba la duhnoh ia la ki jong.

December 25, 2020 /

“Miet ba khuid! Miet ba jar jar!
Dum ka phet, ka shai phar;”

Sa shisien pat ka aiom Khristmas ka la poi bad ka snem Ar Hajar Arphew ka long ka Khristmas ka ban sah jingkynmaw. Kumba khyndai bnai mynshuwa kyndit kynsan ka khlam jingpang Covid19 ka la lynsher ia ka pyrthei baroh kawei bad da ki million ngut ki briew ki la duh ei ia ka jingim. Ka jingduh kam dei tang ka jingïap jong ki briew, hynrei ka jingduh ka long ruh ia kiba dang im. Ka ïaid ka ïeng, ka trei ka ktah bad ka kamai kajih ka la sangeh tden shipor bad ka jingktah na ka jingkhang dam ka dang pur haduh mynta. Ka jingktah kam long tang mynta, hynrei ki phew snem ki ban sa wan ruh kin long ki por kiba eh bad shitom. Ka ioh ka kot bad ka kamai kajih ka la julor bad ka jingim kam thikna shuh.

December 20, 2020 /

Ka Khatphra tarik u Nohprah Ar Hajar Arphew ka dei ka lyngkhuh sngi ïap kaba phra phew jong u babu Soso Tham. Ngi kynmaw burom bad ῆiewkor ia u synῆiang ba une u riewkhraw u la noh. Ha ka jingpynshai halor ka kot Ki Sngi Ba Rim U Hynῆiewtrep, u babu Soso Tham u kynthoh kumne,
“…sa tang katno, ia ngi kiba tang shi troh, lada ngim kyndit bynriew kan sa tyllep ka umsaw bad ngin sa long nong-Gibeon ban thoh dieng bad tong um iano re…”

December 13, 2020 /

Shi taiew mynshuwa ngi la ioh ia ka Baibl Sunday bad lada dang don ei ei ban bynrap ka long ba ka Baibl ka dei ruh ka kotbah kaba kren shaphang ka jingim hangne ha pyrthei. Ka kren shaphang kiei kiei kiba ngi lah ban iohi bad ban tba, wat la ki don ki khep ba ka kren sha ngi ha ki dur pharshi.

November 22, 2020 /

Saw phew sngi ha ri khlaw u Jisu u shem ba ka jingim ba kynja doh kam dei tang ma ka bynta jong ka longbriew manbriew bad ka longiing longsem. Ha ka juh ka por ka spah kam dei tang ma ka, ka nongrim ban pynieng ia ka imlang sahlang bad ia ka iit ka hima. Hato ngin pynshong nongrim ia ka jingim, ia ka iit ka hima bad ia ka imlang sahlang tang ha ka spah? ne tang ha u kpu? ne ngin pynshong nongrim ruh ia ka jingim, ia ka iit hima bad ka imlang sahlang ha “ka ktien baroh kaba mih noh na ka shyntur u Blei” . Ka jingshngain jong ka Ri kam shong tang ha ki tup ki man, ki tiar thma bad ki bor shipai. Ka roi ka par jong ka Ri kam mut tang ki “shopping mall” ne ki kali “Audi” ne “Rubicon” ne ki kamra ophis kiba siang da ki maw marbel bad ki dieng sal kiba phyrnai bad ba remdor. Hynrei ka roi ka par ka dei ka jingim kaba suk, ba tngen bad ka dei ka jingkoit jingkhiah jong baroh ki nongshong shnong. Ka dei ka jingim kaba ki khun ki kti ki ioh ban shong skul, ban nang ban stad bad ki samla ki ioh ka kamai kajih ba biang. Ka roi ka par ka dei ka jingsei soh ka rep ka riang bad ka dei ruh ka synshar hok bad ka bishar hok.

November 15, 2020 /

Kane ka dei ka jingduwai u Nehemaiah. Ka jingduwai kaba lyngkot ki kyntien, tangba ka long ka jingduwai kaba jylliew bad kit jingmut shibun. Kane ka jingduwai kam dei kaba loi loi ne kaba jia shabar na ka jylli ka imlang sahlang. Kane ka jingduwai ka iasnoh bad kawei jingjia histori, kumta ka donkam ban pule bad puson ia ka hapoh ka jylli jong kane ka jingjia histori.

November 8, 2020 /

Ha ki spah bad hajar snem ba la leit noh ka histori ka iathuh khana shaphang ki thma niam bad ki jingiaumsnam. Ha kane ka juk ruh ki thma niam bad jingiakynad jaidbynriew ki jur, ki jyllei bad barabor ki ritpaid, ki thab ki dap bad ki phetwir ki dei ki sohpdung bad ki langknia ha kano kano ka jingiakynad bad jingiaunsnam. Kaba kham sniew ha kane ka juk bad spah snem ba arphew wei ka long ba ki briew ki shah peit bein kum ki nonglehkam sniew ne shah niew kum ki nongpop tang namar ba ki duk bad kine ruh ki long ki langknia ha ki jingiaumsnam. Mynta kumne ka pyrthei ka sakhi ia ka jingiapait kaba khraw ha ka Ri America ha kane ka elekshon 2020. Ha kiwei pat ki Ri ki lehnoh Muslim kum ki ISIS, Taliban bad Boko Haram ki pyndonkam da ka wait, u sum bad ki ktang suloi ban tei ia ki “Islamic State”. Niuma, ym dei ba pyniasyriem ia ka Ri India bad kine, hynrei ym lah ban len ba ka seng sain hima BJP ka ioh ka jingkyrshan na ki kynhun heh paid ka niam Hindu bad kine ki kynhun heh paid Hindu, khamtam eh ki kynhun shitniam ki pynpaw ia ka dur bad jinglong tynrai jong ki ba kim sngewbha ba kiwei pat ki kynhun niam bad jaidbynriew ki bym dei na kajuh ka tyllong ban shong ban sah ne ban long ki nongshong shnong ha India. Kumjuh ruh ha America ki kynhun “KKK” bad “White Evangelical Christians” ki dei ki nongkyrshan ba radbah jong ka seng sain hima Republican bad ki ju kheinpoh ia kiwei pat ki jaidbynriew.

November 1, 2020 /

“…Balei ba phi sheptieng…?”- ki kyntien ba u Jisu u kren ha ki synran kiba shong ha ka lieng kynda kaba la jan ngam jyllop ha ka duriaw na ka daw jong ka eriong bad jingat phyllung kaba jur. Kane ka jingjia kam don jingiadei ei ei ruh em bad ngi, hynrei ka pynkynmaw ia ngi ba ngi dei ban jop ia ka jingsheptieng. Ym lah ban len ba ka jingsheptieng ka tyllep bad pynjem khnap ia ka jingim bad kumta ka khubor ka long ban jop ia ka jingsheptieng.

October 25, 2020 /

Ha ka jingmut tynrai ka kyntien Hima ka iasnoh bad thew ia ka synshar-ka bishar, ka sainpyrthei, ka khaii-ka pateng, ka kamai-kajih bad ka ioh ka kot. Katkum ka histori, u khun bynriew u la tyllun bad san na ka synshar syiem sha ka synshar paidbah. Ki don ruh ki thymmei pyrkhat kiba pynksan ba ki Syiem ki dei ki nongmihkhmat jong u Blei nongbuh nongthaw bad ki dang don ki iing longsyiem kiba dang sah khyrdong haduh mynta, wat la kim don shuh ka bor synshar kumba ki don ha ki por hyndai.Niuma,  ki paidbah nongshong shnong ha kine ki Ri ki dang ai hi khyndiat khynsoit ka bor ka sor ia ki, kumba ka long ha Ri Bilat bad ha ka Bri u Hynniewtrep ha kaba ki iing longsyiem ki dang ia don bynta hi ha kaba korbar ia ka iit- ka hima. Ka histori ka iathuh ruh ba na kawei ka spah snem sha kawei pat la mih ki nongsynshar kiba runar, ki nongsynshar kiba klun lut ka bor synshar ha lade bad kiba khnoit bein ia ki briew bad kiba nud ruh ban pyniap ia kito kiba ieng pyrshah ia ki.

October 18, 2020 /

Lehse ki nongsngap bad nongpule ki lah ban lyngngoh ia u dak jingkylli uba don ha ba kut ki kyntien “Ka Jingim bymjukut”. Hato u nongkren u artatien mo ia ka jingim bymjukut? Em kam dei kumta, pynban u dak jingkylli u pynpaw ia ka jingiaksaid kaba jur ban sngewthuh ia ka jingjylliew jong kane ka sobjek bad kumno ban pynmynta ia ka jingim bymjukut.

October 11, 2020 /

Ka Babel ka dei ka khanatang kaba la rim tam kaba ngi lah ban shem bad pule ha ka kitab Jenesis 11. Ka dei ka khana lyngkot kaba don khyndai tylli ki dkhot bad ka dei kawei na ki khanatang kaba bud ryngkhi ia kiwei pat kiba shem ha ka kitab Jenesis kiba kynthup naduh ka jingthaw -jingpynlong ia ka pyrthei ter ter haduh ka khana shaphang ka jingshlei um ha ka por u Noah