Ki Kam Ban Pynurlong Ha South Shillong : Angela Rangad

Lah phra bnai mynta nga la wan rung sha ki їing jong phi ban pynithuh їalade bad ban pynpaw ia ka jingthmu jong nga ban їakhun ia ka election MLA 2023. Nga їeng kum ka kyrtong shimet na ka KAM Meghalaya. Ym kum kiwei ki kyrtong kiba їaid kynhun, nga la їaid jar jar bad ki paralok kiba ngeit ia ki kam bad nongrim jong nga. Nga la їakren bad phi bad phylliew jingmut halor ki jinglong jingman ka dong ne kyntoit ba phi sah bad kiei kiba lah ban leh ban nang pynbha bad kyntiew ia ka shnong bad ka Jylla.

Ki jingїakynduh ba markhmat bad phi ki la hikai ia nga halor ki jingїakren-їaphylliew jingmut bad phi bad ki jingai jingmut kiba phi la phah lyngba ki survey form ngi la їoh buit, їohbor shuh bad lah ban thaw ia ki Plan bad Kam kiba ngin pynurlong ha ka Constituency khnang ba kan lah ban long ka Model Constituency kaban ialam ia ka Jylla hi baroh kawei. Nga tyrwa ruh ia ki policy bad ki Aiῆ ban pyntreikam hapoh ka Jylla khnang ban lah ban rat diengkhong ia ka bamsap bad ban pynim pat ia ka synshar khadar kaba  beit, ba hok bad ba ai jingkheiῆ.

Ka South Shillong Constituency ka dei ka shnong ba don ki jaitbynriew bapher, kiba im, kiba trei ba ktah ha ki jait kam bapher bapher bad ki longiingba iapher ki jingioh jingem. Kane ka mut ba ki jingangnud bad jingdonkam jong ki nongshong shnong ruh ka їapher bad ki bun rukom. Ka dei ka kam bah kam san ban trei bad ai ka jingshakri ha ka rukom kaba beit, kaba shai bad ka bym shah liang khnang ban wan rah ia ka jingsuk bad ka jingroi jong ki shnong ki thaw khlem ka jingїashah liang.

Nga ngeit ba ka MLA ka mihkhmat ia baroh ki nongshong shnong, ym dei tang ia kito kiba vote ia ka. Kum ka MLA nga ngeit

Ba ka roi ka par ka dei ka hok jong baroh khlem da thew ia ka jait ka kynja ne ka niam ne ka longkynthei longshynrang. Ka roi ka par kam dei ka kam leh bha jong u ne ka MLA ne jong ka Sorkar.

Ha ka synshar paidbah baroh ngi don hok ban їashim bynta ha kaba їatai bad rai halor ki policy bad ka jingpyntreikam ia ki scheme baroh.

Kum ki nongshong shnong ngi doh ka hok ban tip halor ka jingtreikam, jinglut-jingsep jong ki nongmihkhmat bad ka jingpynlut pynsep ha ki scheme bad kam pynroi hapoh ka constituency. Ngi dei ban kylli bad dawa khlem ka jingsheptieng.

Baroh ki don ka hok ban im ha ka jingsuk jingshngain bad ban kamai kajih laitluid

BAN PYNTREIKAM HOK ЇA KA MLA SCHEME KHLEM KA JINGIASHAH LIANG

Ki MLA ki їoh haduh 2.5 klur tyngka ha ka shi snem bad 20 lak tyngka na ka bynta ban pynroi bad kyrshan ia ki jingdonkam hapoh ka constituency. Їa kane ka mang tyngka lah ban phiah kumne harum:

Ka Special Urban Works Programmes 
Ka Intensive Arts and Culture Development Programme Ka Intensive Sports & Youth Development Programmes 
Ka Discretionary Grant

Ngi dei ban tip bad kynmaw ba kane ka mang tyngka ka dei ka jong phi ki nongshong shnong bad ka MLA ka dei tang ban thawlad bad khmih ban pyntyllun ia ki kam ha ka rukom kaba beit bad ba shai. Ki kyndon jong ka MLA scheme ruh ki kren shai kdar ba ka jingpyntreikam ia ka MLA scheme ka dei da ka jingїashim bynta bad їa rai lang jong ki paidbah, ym lyngba ki contractor. Ka jingthmu ba kongsan hi ka dei ka jingїadon bynta lang ki nongshong shnong, ym da kumwei pat. Ngi tip ruh ba baroh shi katta ym shym la pyntreikam ia ka MLA scheme katkum ki kyndon ba la buh bad kam shym la long ha ka rukom kaba beit bad ba shai.

 Kumno ngan pyndonkam ia ka MLA scheme?

Ngan pynlong nyngkong da ka jingjurip bniah (survey) kaba thikna bad ban sngewthuh ia ki jingdonkam jong ka constituency

Ngan thaw ia ki Local Development Council (LDC) bad Social Audit Council (SAC)

Ngan ym pyntreikam ia ka MLA scheme khlem ka jingmynjur jong ki paidbah lyngba ki Dorbar ba ngin pynlong lang shi sien shi snem ban mynjur ia ka mang tyngka.

Ngan pyntreikam ia ka social audit bad pynlong ka jingjurip bniah halor ka jingpyntreikam bad ka jingthew jingwoh ia ki scheme da ki LDC bad SAC

Ki Kam Ban Pynurlong Ha South Shillong 

KA TREIKAM KABA BEIT, SHAI, BA AI JINGKHEIῆ BAD KABA LAIT NA KA BAMSAP

Ka Jaka ai jingtip bad jingiarap halor ki Hok

Ngan thaw ia ka tnat treikam kaba kyrpang hapoh ka ophis jong ka MLA ka ban peit ia ki hok jong ki paidbah, ban buddien bad pynurlong ia ki.

Ngan buh ruh ia ki jingtip kiba shai bad ba ki paidbah ki suk ban sngewthuh halor ki scheme, ki hok tynrai ba ki dei ban їoh bad kiwei.

Ki Kor Website/App na bynta ka South Shillong

Ngin pyndonkam da ki kor Website & Mobile Application ha South Shillong Constituency na ka bynta ban pynsuk ia ki paidbah ban tip ia ki jingtreikam bad buddien ia ki kam jong ka MLA bad ruh ban tip ia ki scheme bad kiwei ki jingmyntoi ba lah ban їoh na ka ophis jong ka MLA. Lyngba ki kor ki bor lah ruh ban phah ia ki jingujor. khamtam ka jingpyndonkam ia ka pisa paidbah bad ia ki scheme bapher

Ka Social Audit: Ka Pisa Jong Ki Paidbah, dei ban ioh jingkhein

Ki nongshong shnong ki don ka hok bad ka bor ban audit ia ka MLA scheme. La ka scheme ka poi ne em sha kiba dei ban їoh jingmyntoi bad kim dei ban shah pyndik haba ki wad jingtip bad buh jingkylli.

Ka pisa sorkar ka dei ka pisa paidbah bad ka sorkar ka dei tang kaba pynїaid ia ka pisa na ka bynta ki nongshong shnong. Kumta ka dei ka hok bad kamram jong ki nongshong shnong ban audit ia ka jingtreikam bad jingpyndonkam ia ka pisa paidbah lyngba ka MLA scheme.

KA TREIKAM TREIJAM BAD KA JINGPYNЇOH IA KI HOK KI NONGSHONG SHNONG KA SOUTH SHILLONG

Ka Ophis jong ka MLA kan ai ka jingshakri kaba hok ban pynїoh ia ki hok kum ka reshon card, ki pension ne bai bam tymmen, bai skul, ki lisen bad kiwei ha ka rukom kaba suk, kaba stet bad khlem ka jingpynbam pisa.

Ngan thaw ruh ia ka kynhun jong ki Doctor, ki nurse bad ki nongtrei ka koit ka khiah khnang ban pynїoh ia ka koit ka khiah bad ka sumar pang ha ki tyngkong їing. Ngan thaw ia ka kynhun ki ban trei bad ai jingkyrshan  ia ki tymmen ki kro, ia kiba duna dkhot met bad ia ki longїing kiba donkam ia ka jingїarap.

Ka jingkyrshan kan long ha ka dur ban їarap ban pyndap ia ki form na ka bynta ban їoh ia ki scheme, ki kam  bad ki jingmyntoi bapher. Ban pynbiang ia ki jingai jingtip bad ban їarap ha ka jingleit ujor bad ban buddien ia ki kam ki jam bad ki hok ba ki nongshong shnong ki dei ban їoh.

Ki riewtymmen, kiba duna dkhot met bad ki nongbylla sngi ki mad jingeh ban їoh ia kk hok bad jingdonkam jong ki namar ba ki shah pyndik ha ki nongtreikam sorkar. Don pat kiba shaniah ha kiba ha їing ban leh ia ki kam na ka bynta jong ki bad kim don por namar ba ki beh bylla kylleng. Kiba kum kine ki nongshong shnong ki donkam ia ka jingiarap bad jingkyrshan

Ki Jingїalang Paidbah Ban Їatai bad buh Jingkylli ia ka MLA Ha Man la ki shnong

Ngin pynlong ki jingїalang man la ka por bad ha man la ki shnong khnang ba ki briew kin suk ban їakynduh, ban pynpaw bad їakren ia ki jingeh ba ki їakynduh. Ban ai kaiphot halor ki Kam ba la thmu ban pynurlong hapoh ka Constituency, ban pyntip paidbah katno la pyndonkam ia ka MLA fund bad ban їatai ia kiwei de ki jingeh.

Every major locality will have an MLA office

Shuwa ka election ki candidate ki leit rung man ka thliew їing. Haiden ka election pat ki MLA kim ju kwah ban kynduh ia ki nongshong shnong. Ki paidbah kim dei ban leit mane ia ka MLA ha ki їing jong ki ban їoh ia ki hok jong ki, hynrei ka dei ka kamram jong ki MLA ban wan sha ki shnong ban їakynduh bad sngap ia ki jingeh jong ki briew. Ym tang ban sngap hynrei ban їakren-їatai bad thaw ki lad ki lynti ban weng ia ki jinhgeh jong ki nongshong shnong.CAL SELF GOVERNANCE

KI BOR SYNSHAR SHNONG

Ban їamir bad їatreilang bad ki bor synshar shnong, ki seng kynthei, seng samla, kiwei de ki seng ne kynhun bad ki nongshong shnong ka South Shillong

Ki nongshong shnong jong ka South Shillong ki don ka hok ban їatai bad rai ia kino kino ki kam pynroi bad ka mang tyngka kaba wan lyngba ka MLA. Ka dei ka kamram jong ka MLA ban plielad ia ki kynthei, ki samla bad ki kynhun bapher ban їashim bynta lang ha kaba saiῆdur bad pyntreikam ia ki kam pynroi. 

Ban burom bad ῆiewkor ia ki Dorbar Shnong bad ki seng ba pynїaid ia ki shnong ki thaw. Kum ka MLA ngan ym tuklar ha ki kam jied nongkitkam bad jingpynїaid shnong, ne ha ki kam jong ki seng kynthei, seng samla.

Ki shnong kiba hap hapoh ka cantonment board ki dei ban їoh ia ki scheme bad ki kam pynroi ba la mang kyrpang da ka Sorkar Pdeng.

Ka kamram jong ka MLA ka long ban plie lad ia ki kynthei, ki samla bad ki kynhun bapher ban їashim bynta ha kaba thaw ia ki kam pynroi bad ka mang tyngka.

KA JINGSHONG SUK SHONG SHNGAIῆ HA SOUTH SHILLONG

Ban ai jingkyrshan naduh ka bai iingshari haduh ka jingpynshngaiῆ ia kiba ngat ha ki jingshah shoh shah dat dusmon
Da ka jingїatreilang bad ka Meghalaya Legal Services Authority ka MLA kan kyrshan ia ki lanot kiba shah shoh shah dat, kiba shah bat bor bad shah thombor. Ka jingїarap kan long ruh ia ki nongtrei nongbylla sngi kiba shah pyndik ha ki jaka shong bad ki jaka ba ki trei.

Ban thaw ia ka Mobile South Shillong Red Alert App ka ban їasnoh bad ka thanat Pulit ha South Shillong khnang ban ai jingshngaiῆ ia ki nongshong shnong.

Ban buh CCTV ha ki jaka paidbah

Ban pynbiang ia ka jingshai bor ding ha ki lynti syngkien

Ban pynbiang ia ka jingshai bor ding ha ki lynti syngkien

Yn pynlong ia ka jingjurip bniah halor ka shong suk shong shngaiῆ ar sien ha ka shi snem ha South Shillong 

Ngi sngewthuh shai ba ki nongshong shnong baroh ki don ka hok ban їoh ka jingїarap ha ka liang ka aiῆ bad ki dei ban їoh ka jingbishar hok bad ban їoh jingїada na ka jingshah thombor. Kumta ka ophis jong ka MLA kan thaw ka lad ba kyrpang ban ai jingїarap bad jingkyrshan ia ki nongshong shnong kiba shah thombor, ki kynthei kiba shah shoh bad kiba shah bat bor ba kin ioh ia ka jingbishar hok.

KUM KA MLA NGAN LEH KI KAM AIU HA KI 100 SNGI KIBA NYNGKONG

Ban thaw ia ka kynhun jurip kaba laitluid ka ban leh ia ka sorjamin halor ka um bam um dih, ki skul, ka їoh ka kot bad ki jingdonkam jong ki nongshong shnong, Hapoh ar bnai kane ka kynhun kan pynkhreh ia ka kaiphot bad yn sam sha ki paidbah. Nangta yn pynlong ruh ia ki jingїatai halor ka kaiphot,ban buh bad mynjur ia ka mang tyngka.

Ban sdang ia ka jingїakren їatai paidbah halor ka mang tyngka na ka bynta ki kam pynroi bad ruh ban kdew ia ki kam pynroi hapoh constituency lyngba ki Dorbar paidbah.

People’s Rights, Facilitation, and Grievance Centre : Ban thaw ia ka tnat treikam hapoh ka ophis jong ka MLA ka ban peit bad pdiang ia ki jingujor halor ka jingshah khῆoit beiῆ bad jingshah knieh ki hok.

Ban їarap ia ki nongshong shnong ha kaba ujor sha ki bor bad buddien haduh ban da pynїoh biang ia ki hok jong ki.

Ban pynlong ia ka jingthep kyrteng bad buddien ban ioh ia ki hok ha ki scheme kum ka MHIS, ration, pension, scholarship bad kumta ter ter.

Ban sdang ia ka rukom trei ba shai ba ai jingtip- ai jingkhein da kaba shna kyrpang ia ka Portal na bynta ka South Shillong ha kaba kin ioh lut ki jingtip kynthup ia ki jinglut jingsep bad jingdon pisa.

Ban lum jingtip shaphang ki central scheme baroh bad ai jingtip sha ki paidbah.

Ban khmih haei ban pynlong ia ki jaka ai jinghikai kot ia ki khynnah skul/kolej (Community Learning Center)

Ban thaw ia ki council paidbah ban audit bad khmih kyrpang ba ki jingshna jingtei ha constituency kin long kiba bit ba biang bad bym don ka bamsap.

Ban pynshai paidbah ia ka mang tyngka na bynta ka South Shillong kaba la shna lang bad ki paidbah hi. 

KA PULE PUTHI HA SOUTH SHILLONG

Community Learning Centers Ban thaw ia ka jaka ai jinghikai kot bad jinghikai skul ha South Shillong  

  • Ban kyntiew ia ka rukom hikai na ka bynta ki khynnah kiba pule class 1 haduh 8
  • Ban ai jingkyrshan kyrpang ia kiba їaleh ia ki eksamin ban їoh rung sha ki kyrdan pule ba kham shalor.
  • Ban ai jinghikai kot ia ki khynnah ba shong class 8 haudh 12
  • Ban hikai bad kyrshan ia ki khynnah kiba la pep skul hynei kiba kwah ban pyndep ia ka jingpule lyngba ka National Institute of Open Schooling (NIOS) 
  • Ban thaw ka lad ba ki samla pule kin їoh ka jinghikai online na ki skulbah ba paw nam jong ka pyrthei
  • Ban thaw ki lad ba ki khynnah skul hapoh ka South Shillong Constituency kin їoh ban leit mihkhmat sha ki prokram bapher , kum ka sport, ka rwai ka siaw, ka jingpyni ia ka kolshor bad kiwei sha  bar ka Jylla bad ka Ri.

Community Essential School Supplies & Resource Bank

Ban kyrshan Їa ka Bai Kot bad Thaw ia ki jaka kynshew ia ki kot pule bad kiwei. Ki kot thoh, kot pule bad ki jaiῆ uniform.m Ki kot pule ki khynnah rit bad kiwei ki lad thymmai ba ki khynnah ki lah ban pyndonkam ha kaba pule kot. Ki kot їarap ia ki samla kiba kwah ban їakhun ia ki eksamin wad kam. Ki tiar jingїaleh kai pynep jabieng

Ban Kyrshan bad thaw ia ki prokram kiba tei bad pynkhlaiῆ ia ka bor pyrkhat

Ban kyrshan ban kyntiew ia ki tnat pule katkum ka juk saian bad technology ka spah snem ba 21

Ka Jylla Meghalaya ka don ha ka kyrdan ba sha trai duh ha ka liang ka pule puthi bad kane ka ktah nyngkong eh ia ki khynnah skul kiba wan na ka longїing kaba duk. Ka jingduna pynlong ruh ia ki khynnah ban sangeh leit skul shiteng por bad 50% na ki khynnah ki la sangeh leit skul. Ka jingduna ka paw ruh ba ym don ki lad junghikai ba ki khynnah ki lah ban sei madan ia ki sap tynrai ba ki don bad ym don lad ia ki ban kylli jingkylli ne kynthoh ia kaei kaba ki pule kaba long kaba kongsan ia ki khynnah ban tei ia ka lawei.

KI SAMLA BAD KA ЇOHKAM ЇOHJAM HA SOUTH SHILLONG

Entrepreneurship, Skill Upgradation, and Career Support Hub : Ban thaw ki lad sengkam, pynkiew ia ki sap bad ki jaka hikai bad kyrshan ia ka sengkam sengjam.

Yn buh ia ka jaka ai jinghikai ban kyntiew ia ka sap ka buit treikam ki samla bad ban tip ia ki kam ki jam kiba mih ha kylleng bad ruh ban kyntiew ia ka sengkam khnang ba yn lah ban pynmih shuh shuh ki kam na ka bynta ki samla. Ban pynleit jingmut ban plei lad ia ki samla ha ka їohkam їohjam ha ki kam sorkar bad ki bym dei Sorkar. 

Ka Їew Ai Kam

Ban Pynlong Ia Ka Jingїalang na ka bynta ki samla wad kam bad ban ai jinghikai ia ki ktien jong ki Ri bapher

Ka paw shai kdar ba ki їew ai kam ki dei ki lad kiba lah ban kdew lynti bad wat ban plielad ia ki samla ban їoh kam kylleng ka pyrthei

Ban pyntreikam ia ka MGNREGS, kaba mut ki longїing kiba duk bad kyrduh ki dei ban їoh bylla 100 sngi ha ka shi snem.

Ki jingїalang na ka bynta ki samla wad kam ka plie lad ba ki samla kin tip ia ki lad їohkam їohjam. Ka jingai jinghikai ia ki samla wadkam ia ki jait ktien bapbher kan nang plie lad shuh shuh ia ki ban їoh kam ha ki kylleng ki Ri ka pyrthei bad ha ki jait kam ba bun jait. 

KA HOK KI KYNTHEI

Ka jingkyrshan ba pura ia ki kynthei lyngba U Helpline number, ki jingiasyllok, bad jingai jingkyrshan ban iakhun ha iing shari, Helpline Counselling bad ter ter.

Ban kyrshan ia ki kynthei kiba їakynduh jingeh ban їoh ia ka bai bam da kaba їarap ujor bad pynsngew ia ki jingeh jong ki hakhmat ka tnat Women Commission

Ban thaw bad kyrshan ia ki jaka ri khyllung ki ban pynїaid da ki seng kynthei bad ki jaka ri khyllung kin long na ka bynta baroh ki longiїng ka Constituency 

Ban kyrshan ia ki Urban Self Help group bad ban plielad ia ki kynthei ban їoh bai seng kam bad ban ai bor ia ki ban kamai lailuid 

Katkum ka jingwadbniah ka NFHS, 25% ki longkmie ki iakynduh ia ki jingshah shoh shah thombor ha la iing. 95% ruh na ki kynthei kim lah ban siew ne buh ia ki nongsumar khun/khyllung ha їing bad kane ka khanglad ia ki kynthei ban leit trei leit bylla bad kumta kim lah ban їashim bynta haba noh synniang sha ka їoh ka kot.

KI JINGDONKAM BA KONGSAN BA MAN LA KA SNGI JONG KI NONGSHONG SHNONG

Ba kawei ka longїing kan їoh 500 litar ka um man la ka sngi.

Ban don ka ka jingpynlang umslap ha man la ki shnong bad ban khmih ban pynїaid da ki Shnong 

Ban thaw ki paiῆkhana ba khuid ha ki shnong ki thaw bad ki jaka їew.

Ban thawki kudam buh tiar, buh mar bad ki jaka buh ia ki mar їew na ka bynta ki nongide bad nongkhaїi kiba rit

Ban kyntiew bad kham pynbha ia ki Anganwadi Center bad ai jingkyrshan ia ki nongtrei ha kine ki center.

Ban pynbha ia ka rukom lum nuit bad ban thaw lad ban shna sboh na ki nuit ha ka rukom ban plie lad ban ioh kam ioh jam.

Ki surok, ki lynti syngkien bad ki nala kiba bha

Ki shnong jong ngi ki dei ban їoh ia ki surok, ki lynti ki syngkien bad ki nala kiba bha, Ka ophis jong ka MLA lyngba ka Social Audit Council, ki seng samla bad ki kynhun bapher kin buddien bad jurip halor kane ka phang bad ban pynthikna ba ki surok, lynti bad nala ki long kiba bha

Ban pynbun ia ki kali kamai hapoh ka constituency  bad ia ki School Bus kiba jem dor ban pynsuk ia ki paidbah

Ka jingduna ki kali paidbah kiba jem dor ka la ktah ia ka kamai kajih namar kumba 30% na ka jingїoh kamai ki nongshong shnong la hap ban pynlut ha ka bai kali. Kane ka long ka bym lah ban pdiang bad ngin trei ryngkat bad ka tnat Transport ba kan pynїaid thikna ia ki kali paidbah

San Tylli Ki Jingkut Jingmut

Ka ohpis jong nga kan hap hapoh ka Aiῆ RTI 2005 bad da lade hi ngan ai jingtip paidbah ia ki kam pynroi, ka mang tyngka bad ki jingpynlut.

Ngan shim ka tulop ha ka dor ba їoh lem ki nongtrei nongbylla sngi lane kata ka minimum wage tat haduh ba ka Sorkar kan thaw ia ka Welfare Board na ka bynta ki nongtrei їing briew, ki nongniah Rappido/Swiggy/kiba trei ha ki courier bad nongtrei kiba pynbit pynbiang ia ki rynsan tamasa bad rong birria.

Ka kyrteng jong nga kam dei ban paw ha kino kino ki maw nongrim ne tablet hapoh ka Constituency. Ňiuma, yn thoh tang ia ka kyrteng jong ki kam pynroi bad jingpynlut.

Ma nga bad ka їing jong nga ngin phah sumar ha ki Hospital sorkar na ka bynta ki jingpang.

Nga nym pyndonkam kali lait saw

KA KOIT KA KHIAH BAD KA BHA KA MIAT KI LONGЇING LONGSEM

Ban thaw ia ka kynhun ki nongshong shnong ban pynїaid ia ki Aganwadi Center, bad Jingsam bam ha ki Skul. Dei ban peit bniah ba kin sam da ki jingbam kiba tei kum ka pylleng, ki soh bad ki jingbam tynrai kiba tei ia ka met jong ki khyllung bad ki khynnah. Kymjuh ruh ia ki kmie kiba ar met bad kiba ai buiῆ khun.

Ka koit ka khiah ha ka Jylla ka long kaba kordit. 50 % ki kynthei bad ki samla kynthei ki pang duna snam. Ki khun rit kim san ka rynrїeng bad ki їoh ka jingpang at top.. Kumta ngi dei ban kyrshan bad sam bam thikna ia ki khynnah ha ki shnong bad ki jingbam tynrai ki long kiba tei bad kin kyntiew ruh ia ka їoh ka kot, da kaba kiba pynbiang ia kine ki dei ki nongshong shnong hi.

Shisien shi snem yn pynlong ia ka jingai jingsumar ha man la ki skul hapoh ka Constituency.

Ki khynnah ki donkam ban їoh ki lad ban tohkit halor ka koit ka khiah bad jinglong jingman ka met ka phad jong ki. Kane kan їarap bad plie lad ban hikai ia ki kumno ba kin sumar bad phikir ia la ka met ka phad. Dei ban ai jingsumar ei ruh ia kito kiba donkam. Katkum ka report jong ka India Child well-being 2021 Ka koit ka khiah jong ki khynnah ha Meghalaya ka long kaba duna tam. Lyngba ka health camp kaba shisien shi snem lah ban ai jinghikai halor ka koit ka khiah, ka leh khuid leh suba bad kiwei de.

Ki nongshong shnong hapoh Constituency ki dei ban їoh ki dawai ba donkam ha ka constituency   

KA KYRNI DIH DROK BAD KI KAM BE AIῆ

South Shillong Drug Education & Prevention Network

Ban ai jinghikai bad ki lad jingїada

Ka lad ban pynduh pyndam ia ka jingkyrni dih drok bad ki kam be aiῆ  ka dei tang da ka jingїatreilang jong baroh bad ruh ban bei tyngka kyrpang halor ban thaw ki lad ban ai jingїada, jinghikai bad jingsumar ia kiba ngat ha kane ka jingkyrni.

Ngin thaw ia ka South Shillong Education & Prevention Network bad kane ka network kan thung ia ki nongtrei kiba la tbit ban їakhun pyrshah ia ka jingkyrni dih drok, ban thaw ki lad ban pynїoh jingsumar ia kiba kyrni bad ban їatreilang bad ki bor shnong bad ki bor jong ka aiῆ. Ban їarap ruh ia ki riewshimet ba kin lah ban їathuh lada ki suba ba ki don ki kam khaїi ne jingdih drok hapoh shnong. Nangta ban їarap ia kiba kyrni da kaba ai jinghikai bad jingїasyllok na ki briew kiba lah pyntbit ia lade ha kane ka kam bad ban pynlong ruh ki jingїalang hapoh shnong ban khot ban wer ia baroh ban їeng pyrshah ia ka jingsniew jong ka jingdih drok.

South Shillong Addiction Treatment & Rehabilitation Center 

Ka jingkyrni dih drok ka dei ka jingpang kaba lah ban pynkoit bad u ne ka kiba kyrni ki lah ban koit bad lait na kane ka shrip lada ki їoh ki lad jinghikai, jingїasyllok bad jingsumar na ki briew kiba biang katkum ka jingstad bad jingpule halor kane. Kumta ka ophis jong MLA kan trei janai halor kane ka bynta bad kan ai ka jingkyrshan ba pura ia ki longїing bad ki riewshimet kiba ngat ha kane ka apot.

KA JINGSHNGAIῆ KA JINGIM 

Man ka longїing ba dei ban їoh ka bam lyngba ki dukan reshon kat kum ka hok ka jong ki lyngba ka National Food Security Act (NFSA), ki dei ban їoh ia ki card reshon.

Ban pynїoh ia ka MHIS card ha man la ki longїing.

Ban pynthikna ba baroh ki nongbylla misteri kin thep kyrteng ha ka Meghalaya Building and other Construction Workers Welfare (BoCW) Board khnang ba kin їoh ia ki lad jingїarap kiba bun jait kiba la buh kyrpang na ka bynta jong ki

Ka ophis jong MLA kan trei ryngkat bad ka tnat labor ban pynrung kyrteng ia baroh ki nongbylla sngi ha ka thup jong ka BoCW.

Ban pynthikna ba baroh ki nongtrei nongbylla sngi kum ki nongtrei їing briew, nongniah taxi, bus, nongdie madan ki їoh ka lad ban thep kyrteng bad kynshew pisa ha ki insurance khnang ba ki lah ban ioh jingїarap ha ka por ba jia ki jingmynsaw.

KA SPORTS HA SOUTH SHILLONG

Ngin thaw ka fund kaba kyrpang na ka bynta ban kyntiew bad kyrshan ia ki samla kiba don sap ha ki kam їaleh Sports. Kane ka fund kan kyrshan ia ka bai leit ban wan jong ki haba ki leit mihkhmat sha bar ka Jylla bad ruh ban kilan met bad pynbiang ia ki jingdonkam. Ngin pynim ruh ia ki Sports Club ha man la ki shnong.

Ki don shibun ki samla donsap kiba duh lad ban leit їakhun bad leit shah hikai shabar Jylla namar ba kim lah ban kyrshan wat tang ka bai lynti. Ki don ruh ki bym їoh jingїarap ha ka por ba ki mynsaw. Ngi kut jingmut ban thaw ki lad ban kyntiew ia ki nongїaleh sport. Ki sports club ne association kiba don ha ki shnong ki dei u klongsnam kiba kyntiew ia ka sports ha ka Jylla. Hynrei na ka daw ka jingbym ioh ka jingkyrshan kaba thikna ki sports club ki troin bad ki iap lut.

Ngin pynlong ia ki jingїakop їaleh Sport ha kylleng ki skul kiba don hapoh ka Constituency khnang ban lah ban pynkhreh ia ki samla bad ki khynnah ban їakhun ha ki tournament bad ban ai jinghikai ia ki katkum kane ka juk. Kan don ruh ka jingїaleh sport kutsnem hapoh ka Constituency.

Ka ophis jong ka MLA kan thaw ia ki jaka ai jinghikai bad lyngba kine yn lah ban jied ia ki samla bad ki khynnah kiba donsap bad ban kyrshan ia ki. 

Ban don ka Sports festival ha constituency man la ka snem.

Ka South Shillong constituency kan long ka nuksa bad lamkhmat kumno ban kyntiew ia ka kam їaleh sport bad ia ki nongїaleh sport bad ai ki jinghikai kiba paka lyngba ki nonghikai, ki nongїaleh sport kiba tbit jong ka Jylla bad na sha bar ruh kumjuh

BAN PYNIM IA KA HISTORY, CULTURE & KI KAM JNGOH PYRTHEI

Ban pynim ia ki jaka їaid kjat bad ki jaka don nam ban pynїaid da ki samla shnong.

Ban pynshlur bad kyrshan ia ki longїing hapoh ka South Shillong ban pynneh ia ki їing barim bad pynkylla їing shong basa ia ki nongjngoh kai pyrthei.

Ban pynlong thikna ia ki rynsan ka put ka tem bad ki sawangka ha ki community hall bad ki jaka їew ha baroh ka Constituency.

Ban pynlong ia ki rongbiria ha man la ki shnong bad ban pynkut da ka rongbiria kut snem jong ka Constituency.

Ka histori jong ka nongbah Shillong ka don ha ka shnong Laban bad ki briew kiba wan jngoh kai ki dei ban tip da kaba ngi pynithuh ia ki jaka don nam bad ki jaka їaid kjat bad ban iarisa ia ka jingdon bunjait ki kolshor bad rukom im.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Angela G. Rangad Written by:

Angela G. Rangad is a Democratic Rights activist from Meghalaya. She is an independent MLA candidate from South Shillong and is a memeber of KAM Meghalaya

Be First to Comment

Leave a Reply