Sur Phylla

Sur Phylla

 Ha trai u wei u dieng,
Hapdeng u phlang jyrngam
Katno nga sngew ka phieng
Ban sngap ka sur ba tmang.

Ka sim kaba phyla
Ka sur ba pynsngewbha
Ba sangsot ruh kumjuh
Ban pyrkhat ngam lah shuh.

Katno ka iam pangnud
I kong, ba sngewsahnud
Ia la nusib ka tim
Ba mad hala jingim.

Mynstep ka iam synnia ka ud
Katno ka jingpangnud
Balei kumne, maipap ka ong
“Shano te kong ngan bud”.

Ko sur ba sngewphylla
Pha rong pha rah ia nga
Sha kawei ka pyrthei
Ban ngam shapoh ki thwei.

Bunsien ummat ki jaw
Ia phi ba nga kynmaw
Kum kiwei pat ki por
Jingim jong ki nangtlor.

Mariang ba itynnad
Ka sur ba sngewtynnad
Kumno ngan len iaki
Shaphrang ki lam lynti.

Pyrthei thymmai nga shem,
H’u Phlang jyrngam nga dem
Ban klet kito ki snem;
Jingsuk kumno ban shem.

U Bnai

 Ka sngi ka la sep
Khrik ka bneng ka la shai
U `lurshai, u mangkara
Kiwei de ki nongpahara.

Hynrei napdeng ki lyoh byrngut
U tai u bnai u peit kynjai
Ia la jingshai u pynthiah thai
Ha pneh mariang ha la ka rngai.

U `lurphira ki beh buddien
I`u bnai ba jngi ha suin
Kumta ban wad ia step khlem thait
Ha ban da lap ki iai ban shait.

U jamiyiang la u ha khlaw
Ka tang besli ha trep ba hun
Ban lam ki por ki ba la jah
U mih u bnai kumta un jah.