Ka Bneng Hangne Ha Khyndew

“A! Blei Trai Kynrad ai bor ia nga ba ngan ym pyndem ne dem khohsiew hakhmat ki bor kiba runar” (Gitanjali)

U Jisu Khrist u ong, “Haba phi duwai, wat long kum ki riewarsap! …Haba phi duwai, wat pyndonkam bun kyntien ki bym kit jingmut…Kane keiῆ, ka long kumno phi dei ban duwai…ai ba ka Hima jong me kan wan; ai ba ka mon jong me yn leh ha khyndew kumba ka long ha bneng” (Mathaїos 6: 7-10) Kane kam dei tang ka jingduwai lymne tang ka jinghikai kumno ban duwai, hynrei kane ka bynta ka kren bad їathuh shai ia ka jingim, ki kam bad jingїakhun jong u Jisu Khrist na ka bynta ki khun bynriew. Ka dei ka jingїaleh bad jingїakhun ba radbah ban wanrah bad pynurlong ia ka bneng hangne ha khyndew.

Ar hajar snem mynshuwa u Jisu Khrist u la lumpaid ia ki baduk bakyrduh, ki kynthei, ki nongtong dohkha bad ki heh ki haiῆ, kum u Nikodemos, u Sakhaїos. U la lum ia ki nongtrei kiba im sngi ban kamai bad bam tang na ka umsyep. U la lum ia ki nongrep, ki nongbylla sngi bad kiwei ban їakhun na ka bynta ban tei ia ka bneng hangne ha khyndew. Ha kane ka jingїakhun ka bneng bad u Blei ki їashimbynta lang bad u Jisu Khrist u la siew ka dor kaba rem bad shah pynїap halor ka diengphna.

Ka Gospel u Lukas 4:18 ha ki kyntien kiba shai ka їathuh- “…namar ba u la jied ia nga ban wanlam ia ka khubor babha ha kiba duk. U la phah ia nga ban pynbna ka jingpyllaitluid ia ki koidi bad ka jingpynїoh ia ka jingimat ha kiba matlah, ban pyllait ia kiba la shah ban beiῆ”. Ryngkat lang bad ki riewpaidbah u Jisu Khrist u la їakhun ban pynlaitluid ia ki briew na ka jingshah khῆiot beiῆ bad ban pynurlong ia ka bneng hangne ha khyndew.

Ka bneng hangne ha khyndew kam dei tang ka saiῆpyrkhat ne ka jingmutdur ka bym lah ban long, hynrei ka dei kaba lah ban tei bad kaba lah ban jialong. U Jisu Khrist u la treikam bad tei ia bneng hangne ha khyndew. Ki kambah bad ki jinghikai jong u ki shatphalang ia ki nongrim jong ka Hima u Blei. Ha ka jingїalap bad jinghikai paidbah kaba paw nam halor u Lum, u Jisu u kren shai ba ka Hima u Blei ka dei ban kdup bad kynthup nyngkong eh ia kiba duk, kiba tlotbor, kiba їam bad kiba shah ban beiῆ. U T.V Philip ha ka kot, The Kingdom of God Is Like This u ong, “Ha ka pyrthei bad ka imlang-sahlang ba mynta kiba duk kin їai duk sah, kiba tlotbor kin їai shah ban beiῆ. Kiba їam kin їam lynter tait bad yn ym don ba pyntngen ia ki. Kane ka dei ka lynti jong ka pyrthei bad ka jinglong jong ka imlang sahlang kaba mynta”. Bad kane ka pyrthei ka hikai, “Long ba la kyrkhu ia phi kiba riewspah bad phin nang lum spah shuh shuh”. Ha pyrshah jong kane ka pyrthei ka їeng ka jinghikai bad jingїalap u Jisu Khrist halor u Lum kaba ong, “Suk ma phi kiba duk; ka Hima U Blei ka dei ka jong phi! Suk ma phi kiba thngan mynta; yn pyndap ia phi! Suk ma phi kiba їam mynta; phin rkhie” (Lukas 6:20-21)

Ka Gospel ka dei ka jingim bad jingtreikam jong u Jisu Khrist. Haba pyrkhat shaphang ka jingim bad ki kam u Jisu, ka jingkylli ka mih, kaei ka dor jong ka Gospel ha kane ka juk? Ka Gospel kam dei ka jingim kaba khwan myntoi, kam dei kaba khun ranab, kam dei ka phuh ka phieng, kam dei ka rongphong bad kam dei ka kam kamai spah. Haba shu kren kyllum ka Gospel ka dei ka khubor babha bad ka jingthmu jong ka ka long ban pynїoh ha ki khunbynriew ia ka jingim ba dap kyrhai (Їoannis 10:10) bad ia ka bneng hangne ha pyrthei. 

Bunsien haba ngi pyrkhat shaphang ka Bneng, ngi mutdur bad їohi ia ka jingkmen bad jingsuk. Hoid, ka bneng ka dei ban long kumta bad kata hi ka dei ban long ka dur jong ka. Lehse don kiba pyrkhat ba ka bneng ka dei ka jaka kaba jia bad dap tang da ki kambah baphylla. Ha kawei pat ka liang hangne ha pyrthei bad khamtam eh ha kane ka juk “neo-liberal”, ka juk kaba lah shilliang, kaba khwan  myntoi shimet bad rhah spah, ki kambah ki jia bad ki briew ki mad ia ki ha kiwei pat ki rukom. Ha kane ka juk ki briew kiba bit ba biang ka kamai bad kiba lah ban pynlang ia ka kamai, kiba don sbai, kiba don bor ne kiba don iktiar haba ki pang ki jhia, ki kotbor bad ki lah ban їoh ka jingpynkhiah namar ba ki don ka lad ka lynti bad ka bor ban їoh ki lad jingsumar pang kiba biang bad ha ki Hospital kiba bha tam. Ha kajuh ka por pat, ki don ki briew la ha sor ne nongkyndong, ki bym kot bor, ki bym khraw ka kamai, ki rangli ki juki, ki nongtrei-nongbylla sngi kiba kamai mynstep bad bam mynmiet, ki bym lah ban pynlang ia ka kamai, haba ki pang kim lah ban їoh ka jingpynkhiah namar kim kotbor bad kim don pisa ban shah sumar bad na ka bynta jong ki ym don kambah bad bneng ka jngai haduh katta katta.

Ka Bible ha ka kitab Jingpynpaw ka kren shaphang ka Bneng bathymmai bad ka Khyndew bathymmai bad ha kajuh ka por ruh ka kren shaphang u Khrist Lamler bad une u Khrist Lamler um sngewtynnad bad um sngewbha ban їakren shaphang ka bha ka miat jong ka longbriew manbriew namar ba u dei uba runar, uba khwan, uba thombor, uba rhah spah, uba rhah burom, uba rhah kyrdan bad uba kwah ban pynїaid bad teh mraw ia ki khunbynriew.

U Jisu Khrist ha ka jingtreikam jong u ban tei ia ka Hima u Blei ne ka Bneng hangne ha khyndew, u la їakhun bad їaleh ia ka thma kaba jur pyrshah ia ki runar bad ki Khrist lamler. U la їeng pyrshah ia ki riewleh jubor bad ki riewkhwan kiba paw ha ki dur bapher bapher. Don kiba paw ha ki dur jong ki stad aiῆ, ki heh sorkar ne ki nongsynshar jong ka Hima Rom. Kiwei pat ki dei kiba bat bad pynїaid ia ka їew ka hat, ka khaїi-pateng bad kiba khῆiot beiῆ ia ki briew khamtam eh ia ki kup shilliang ki sem shilliang. Don ruh kiba paw ha ka dur jong ki riewniam kiba leh mynleh kum ki blei (Godmen). Kiba bud bad bat pyrkhing ia ki hukum, pynban ka dohnud jong ki ka dap tang da ka jingisih bad jingibeiῆ ia kiwei.

Ka jingїakhun kaba u Jisu Khrist u la sdang ka dang im bad bteng haduh mynta. Ka Gospel ka dei ka jinghikai, ka dei ka jingїaksaid ha ka jingim bad ka dei ka jingїaleh ban їoh ia ka bneng ha ka khyndew. Ka dei ka jingїaid lynti bad jingїakhun ban їoh ia ka jingim ba dap kyrhai. Katno ngut na ngi kiba kloi ban їashim bynta ha kane ka jingїakhun bad kiba їohsngew ia ka jingud jong kito kiba shah khῆiot beiῆ, kiba їohsngew ia ka jingїam jong ki nongrep, kiba їohsngew ia ka jinglynῆiar jong ki nongtrei їing briew, ki nongtrei kynta, ki nongbylla sngi bad kiba їohi ia ka jinglynga ki samla ki bym thikna ka kam ka jam bad ka kamai kajih? Ka por ka dei mynta ban їawanlang baroh, ban їatai bad їakhun na ka bynta ban pynurlong ia ka bneng hangne ha khyndew.

Lyngba kane nga kyrpad ruh ia ki nongpule ba їeid ban pynlut shipor arpor man la ka sngi ban duwai bad kynmaw ia kito ki ngat ha ka jingpang covid19 bad ruh na ka bynta kito kiba la duh noh ia ki baїeid bathoiῆ jong ki ha ka jingpang covid19.

To u Blei un ai bor bad pyntngen ia ngi baroh.

Amen