Ka Jingieit Jong Ki Briew Kiba Bun Ka La Man Khriat

Ha ka Gospel U Mathaїos la їathuh ba ki sngi bad ki їa kin wan ha kaba ki briew, “…kin їashetkylla iwei ia iwei pat bad kin isih iwei ia iwei pat. Haduh katta kan long ka jingsaphriang jong ka jingsniew ba ka jingieit jong ki briew kiba bun kan man khriat” (Mathaios 24:10-12). Kane ka bynta ka hap ha ka thup jingkren bad jingthoh apocalyptic bad kane ka rukom kren ne thoh apocalyptic ka kynrei bha hapdeng ki Jiw. Ka kitab u Daniel ka dei kawei na ki jingthoh apocalyptic kaba paw ha ka Kitab Barim. Katkum ki nongthoh komentari, kane ka bynta ka dei kawei na ki jingkren kiba jrong jong u Jisu bad ha kane ka jingkren u Jisu u їathuhlypa shaphang ki sngi ki ban wan ha kaba ki nongbud bad kiba ngeit ha u kin shah ia ki jingeh bad shah pynshitom. Kaba ar, ka jingbymman kan їeng rasong bad ki briew kiba hok kin sngew jem rngiew, kin sheptieng bad her syrngiew bad kin sdang ban khih khuslai bad artatien ia la ka jingngeit. Kaba lai, ka jingsheptieng, ka jingkhuslai bad jingartatien kin ktah jur ia ka jingim jong ki briew bad kan pynpjah ia ka jingieit jong ki ia u Blei bad ia la ki para briew. Ki briew kiba im hapdeng ka jingtieng bad jingartatien man ka por kin pynkut nia ba kam myntoi shuh, kim trei kam shuh, kim їakhih bad kim їakhun shuh ha ka jingim bad ki shu shong kli kti. Kaei kaba u Jisu u la kren ar hajar snem mynshuwa ka urlong mynta ruh bad ngi mad ia ka mynta.

Ka khlam covid19 ka la pynpaw pen ryngkew ia ki ar tylli ki jinglong; kawei ka mynsiem їarap bad ka jingїakyrshan lang iwei ia wei bad kaba ar ka khlam ka la sei madan ruh ia ka jinglong ba shapoh jong ki briew kaba dap da ka jingshun bad jingisih ia la ki para briew. Hoid, ki don shibun ki briew kiba don ia ka mynsiem їarap bad kiba kloi ban kner ia ki kti ban kyrshan ia la ki para briew ha kane ka khlam bad ym lah ruh ban len ia ka jingtrei shitom jong ki katto katne ki Dorbar shnong, ki Seng trei mon sngewbha, ki Balang bad kumta ter ter.

Ha kawei pat ka liang, kane ka khlam ka la pynpaw shai ba ka dang tam hi ka jingshun, ka jingisih bad ka jingῆiew beiῆ ia la ki para briew. Ha ki snem jong ka khlam bad jingkhangdam (2020-2021) ki la don ki jingjia kiba nga sakhi ia ka jingeh dohnud jong ki briew bad ym dei ba nga bishar, hynrei ngan ym lah ban klet ia kawei ka jingjia ba uwei u “rangbah khlieh nongsynshar” u kyntait ban pdiang ia ka shithi jingkyrpad jong ki nongdiemadan bad ia kawei ka jingїalang kaba la pynbeit kyrpang ban їakren bad pyrkhat ia ka kamai jakpoh jong ki nongtrei-nongbylla sngi kiba la duh kamai da ki bnai namar ka khlam bad ka jingkhangdam. Ha kata ka jingїalang nga їohi ia kaei kaba mih napoh ka dohnud jong ki katto katne ngut ki kynrem ki lyndan kiba kynteit bad kynhied pynban ia la ki para briew kiba la jem khnap lypa bad kiba la kyiuh baroh shi rynїeng namar ka apot ba ki mad ha ka por khlam. Ym tang katta, kita ki kynrem ki lyndan ki kynnoh, ki kynthoh, ki pyneh ryndang bad pyrshang ban thom bad pyndonkam ia ka bor ka iktiar ban khanglad ia ka kamai jakpoh jong ki para briew, wat la ki tip thikna ba kin sa їap thngan lada kim їohlad ban kamai. Lada dei ha kiwei pat ki por ba phngaiῆ ka pyrthei lehse dang lah ban pdiang ne nguid lada ki beiῆ, ki khoh ne ki kynnoh ne ki kynthoh, dang lah ruh ban pdiang lada ki kynteit ne ki kynhied, hynrei ngam lah satia ban sngewthuh ia ka jinglong jong ki briew ba ki eh dohnud wat ha ka por khlam ruh. Ngam lah ban peiphang satia ba ha ka por ba ki briew ki shem lanot bad ki їap thngan, ngi dang don por ban shun, ban isih, ban ῆiewbeiῆ bad khῆoit beiῆ ia la ki para briew.

Hato kaei kaba u Jisu u la kren bad їathuhlypa ar hajar snem mynshuwa ka jia biang mynta? Hato ngi im mynta ha kane ka khlam covid19 ban sakhi ia kane ka jinglong jong ki briew? Kine ki jingjia ne jingїohi ki pynmih shibun ki jingpyrkhat. La kata ka Gospel jong ka Jingieit kaba ngi ngeit lane kata ka jingphla ba ngi ngeit bad bud ia u Jisu Khrist ka long kaba shisha ne ka shu long tang na sla bad tang ka rongphong? La kata ka tynrai tipbriew tipblei kaba ngi la їohpateng ka dei tang ka puriskam ne ka dei ka nongrim ba shisha? 

Patung pateng bad thohmut thohmat hangne hangtai ka jingieit ka paw bad ki don ki riewshimet kiba don ka jingieit ba shisha ia la ki para briew, kiba sngewlem bad don ka jingiatiplem na ka bynta kiwei bad ki pynpaw ruh ia kata ka jingieit da ki kam. Hynrei kaba sngewkhia ka long ba ka mynsiem sngewlem bad jingїatiplem kyllum kam don shuh ha ka imlang sahlang ne ka Jaidbynreiw. Ha kiwei pat ki kyntien ka mynsiem їatiplem kyllum (collective conscience) ha ka imlang sahlang bad Jaidbynriew ka la stait bad їap stai. Ngim salia lada kiwei ki їapthngan, ki shah lehbeiῆ ne shah kyrdem ha kiba khraw bor. Ngim kheiῆ snep ia kiwei bad ngim salia lada kiwei ki duk, ki shem jynjar bad shem lanot. Ngim salia lada ki pang ki jhia ne ki kordit tang ba la biang bad aram la ka met, ka їing ka sem bad ki khun ki kti ka la biang. Ngim salia wat la kita kiba shem jynjar ki dei ki kur ki kha la jong, namar ngi la nang ban pynksan nia ba kim dei ki kur jan, hynrei ki dei tang ki kur jngai.

Katkum ka Gospel u Mathaїos 24:10-12, u Jisu u kren shaphang ka jingpjah jong ka jingieit ia u Blei bad ia la ki para briew. Ka Baibl ka hikai ia ngi ia ka jingieit kaba khlem kyndon; kynmaw ba u Blei u ieit ia ngi ki khun bynriew khlem kyndon bad u hukum ne khmih lynti na ngi ruh ba ngin ieit ia U bad ia la ki para briew khlem kyndon. Katkum I Phadar Sngi, “ka jingieit ka dei ka dur ka dar ba shisha bad ba nylla jong u Jisu bad jong u Blei, bad kito kiba ngeit bad bud ia u Jisu ki don ia kane ka jingieit. Lada weng noh ia ka jingieit khlem kyndon, ki Khristan kim long ei ei shuh, ka jingim bad ka jingngeit jong ki kam don jingmut”.

U Jisu u kren shaphang ka jingpjah jong kane ka jingieit khlem kyndon. I Phadar Sngi I ban shuh shuh “haba kam don shuh kane ka jingieit ia u Blei bad ia la ki para briew, ym don Balang shuh hi; ka lah don sa tang ka seng bhalang aїu re, kaba tang ka nam khlem ka kam”. Lyngba kane ka jingїathuhlypa u Jisu u maham ia ngi ba ngin ym ngat ha kane ka shrip bad ba ka jingieit kam dei ban man pjah bad U ban jur ba ka mynsiem їatiplem kyllum kam dei ban їap noh.

Kito napdeng ki briew kiba la mad ia ka jingshah shun bad jingshah isih, ki tip shai ba kiba jop ha ka jingїaleh ki dei ki briew kiba ῆiewkor bad jied ia ka jingieit ban ia ka jingisih bad jingshun.” (Rev William J Barber)

Amen.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15,748 other subscribers

Kyrsoibor Pyrtuh is a pastor interested in intersection between theology and social power

Be First to Comment

    Leave a Reply