Ka Lynti Sha Emmaus Ka Pynmynta Їa Ka Jingkyrmen Ba Mynhynnin

Ka jingshah sahnarphna bad ka jingmihpat u Jisu Khrist ki dei ki jingjia History kiba kordor ha ka pyrthei bad U Frank Macchia u kam kynti ba ka Jingmihpat u Jisu Khrist ka pynmynta ia ka jingkyrmen kaba mynhynnin. U Markos (16:12-13) bad u Lukas (24:13-35) ki їathuhkhana shaphang ka jingpynpaw jong u Jisu Khrist їalade hadien ba u la mihpat ha ki arngut ki synran, uwei na ki uba kyrteng u Kleopas, ha ka lynti sha ka shnong Emmaus.

Ki sngi bad ki taїew kiba hashuwa bad hadien ka jingїap bad jingmihpat u Jisu Khrist ki long ki sngi kiba khynwin bha ha Jerusalem bad Palestine baroh kawei. Ka khubor ba u Jisu u la mihpat kam dei ka khubor kaba sngewtynnat ia ki Lyngdoh sadusi, ki pharisi, ki stad aiῆ, ki Lyngskor bad ki Patsha ka Hima Rom. Ha kajuh ka por ka dei ruh ka khana kaba ym sngewlah ngeit bad wat ki synran bad ki riewpaitbah kiba la ῆiew ia u Jisu kum u nongїalam bad nongpynim jong ki, kim shym la pdiang ia kane ka khubor ha kaba nyngkong. Na ka liang ki nongsynshar ki pynbna ba ka dei ka khubor lamler bad ki kynnoh, ki kynthoh pyrshah ba ki synran ki la tuh bad buhrieh ia ka met u Jisu. Ym tang katta ki la kynnoh ruh ba ki nongbud u Jisu ki la thmu lypa ia kane khnang ban nang pynkhynwin bad pynmih shuh shuh ka jingkulmar. Ki riewpaitbah kiba shi sur shi dur ki la kulmar jingmut halor kane khubor bad katno tam ki synran kiba la shu im hapdeng ka jingtieng bad jingsyier naduh ki sngi ba la kem bad pynїap ia u Jisu.

Supper at Emmaus by Caravaggio, 1601

Hapdeng ka jingkhynwin kaba jur ki synran bad kiba bun ki riewpaitbah ki la duh jingkyrmen bad ki la kheiῆ ba ka jingїaidlynti jong ki bad u Jisu ban їalap ia ka khubor babha, ka khubor jong ka Jingieit ka la kut. Ka jingїakhun jong ki ryngkat bad u Jisu ban pynїoh ia ka Hima u Blei bad ia ka synshar hok ka bishar hok ha ka pyrthei ka la pulom bad wai noh namar ba u nongpynim, u nongpynlait im bad u nongїalam jong ki u la shah pynїap halor ka diengphna. Ka rukom ba ki pynshitom bad pynїap ia u Jisu ruh ka long kaba shyrkhei bad ka dei ka khubor kaba ki nongsynshar lehdonbor ki ai sha ki paitbah ba uno uno ne kano kano kiba їeng bad їaleh pyrshah ia ki bor synshar ne nongsynshar kin ngat ha kajuh ka apot.

Hadien ba la sahnarphna bad pynїap ia u Jisu, kata ka jingpyrkhat bad ka jingngeit ba u Jisu u dei u nongїathuhlypa ba la phah da u Blei bad uba la wan sha ka pyrthei (Ri Palestine) ban pyllaitluid ia ki Israel ka la sah tang ka khanatang jong ka mynnor. Ka jingkyrmen ba u Jisu u dei u Messaiah uba la wan ban pynim bad pynlait im ia ki briew ka la long noh tang ka jingangnud bad jingkyrmen jong ki por bad ki sngi kiba la leit noh. Ki arngut ki synran kiba їaidlynti ban leit phai sha la shnong, sha Emmaus ki la pynpaw kumta ha u Jisu- “Bad ngi la kyrmen ba un dei ma u uta u ban sa wan ban pyllaitluid ia ki Israel”. Ki kyntien, “…ngi la kyrmen” ka dei ha ka “past tense” bad ki kdew shai ia ka mynhynnin, ka por kaba la leit noh, ym ia ka mynta bad ym ia ka lashai. Ki Israel bad ki nongshong shnong ka Jeruslaem bad Palestine ki la buh ka jingkyrmen ha u Jisu bad ha ki kam jong u. Ki la angnud ryngkat bad U, ki la kyrmen ha ka jingїakhun ba u Jisu u la їalamkhmat. Phewse kita baroh ki la pulom, ki la kut bad wai noh ha ka sngi ba la sahnarphna bad pynїap ia U.

U Frank Macchia ha ka khubor Easter 2021, kaba la mih ruh ha ka rynsan Face Book jong ka “World Wide Pentecostal Theology”, u їathuhkhana shaphang ka jingїashem jong u Jisu bad ki arngut ki synran kumne- “Ha ka sngi Easter kaba nyngkong, kumba ar hajar snem mynshuwa, u Kleopas ryngkat bad u paralok jong u ki la їaid lynti da ka kjat ban leit phai sha Emmaus kaba jngai khatar kilomitar na Jerusalem.  Kine arngut kim dei napdeng ki khatar ngut ki synran jong u Jisu, hynrei ki dei kiwei na kito ki spah ne hajar ngut ki riewpaitbah kiba la ngeit bad buh ka jingkyrmen ha u Jisu. Ki dei napdeng ki riewpaitbah kiba la peit sha u Jisu da ka jingkyrmen kaba khraw bad ki la khmih lynti ba un pyllaitluid bad pynim ia ki. Ka mynsiem bad jingmut jingpyrkhat jong ki ka khia haduh katta katta, ki la shaїong hi ngit bad kulmar jingmut shikatdei namar ba ka jingkyrmen bad ka jingangnud jong ki baroh ki la wai noh. Katba ka Nongbah Jerusalem ka thnem bad khynwin da ka khubor ba u Jisu Khrist u la mihpat, kine ki arngut pat kim pynleit jingmut shaphang kata. Kaei kaba ki tip ka long ba u Messaiah, u nongїathuhlypa jong u Blei, u nongpyllaitluid, u nongpynim bad u nongїalam ki Israel u la shah kem, shah pynrem, shah bynthiew ha ki paitbah bad shah pynїap halor ka diengphna. Katba u patsha Tiberius, u Lyngskor Pilat, u Kaїaphas, kiwei ki lyngdoh sadusi, ki stad aiῆ, ki pharisi ki dang їaibteng ban pynїaid ia ka Hima bad ka Dorbar Sanhedrin. Ki їaibat ia u lakam synshar, katba u Jisu pat u la shah pynїap kum u riewrunar bad mynta la tep ia u. Ka paw kumba ka jingrunar ka la jop bad kata ka jingkyrmen ka la shah thang kum ka kot jot bad ka la kylla dpei. Kumta ban shu pynhun bad pyntngen mynsiem їalade kine arngut ki shu їakren sah para ma ki ia kiei kiei kiba la lah jia bad ia kaei kaba ki la lah kyrmen. Ki pynpaw bad їakren bynniaw para ma ki ba ῆiuma ki kam kiba u Jisu u la leh ki la long kiba khraw, kiba don jingmut bad kiba myntoi, wat la um shym la lah ban pynurlong pura.”

U Kleopas bad u paralok ki la kheiῆ duh ba ka jingkyrmen jong ki ka la long tang ha ka mynhynin bad kiei kiei baroh ki la kut bad wai noh, hynrei katba ki dang їaid lynti bad їakren bynniaw kumta, uwei u briew uba kim lah ban ithuh u la wan bsuh hapdeng jong ki bad u la kylli pynban na ki kaei kaba la jia bad ki їakren shaphang kaei? Wa tang ma phi pleng uba don ha Jerusalem ha kine ki lai sngi kiba la lah u bym tip ei ei shaphang kiba la jingjia? la jubab u Kleopas. 

U Lukas bad khamtam u Markos, kim shim la їathuh bniah ha kano ka dur u Jisu uba la mihpat u la burieh їalade na ki. Ka dur khmat jong u Kleopas bad u paralok jong u ka noh hi їan bad ki їamrem, ki dang pyrkhat ruh ynda kin poi ha shnong aiu kin ong? katba u ‘riew nongwei pat u khlong na ki shaphang ki jingjia kiba la jia ha Jerusalem? Ha lynti, u Kleopas lem bad u paralok ki la їathuhkhana ha u ‘riew nongwei shaphang baroh kaba la jia ha Jersualem ba u Jisu uba na Nazareth u la shah pynїap bad dei ki Lyngdoh sadusi, ki pharisi bad ki stad aiῆ kiba la їadonkti ban їasylla bad ki nongsynshar ka Hima Rom ban pynїap bad pynkut noh ia ki kam jong u. Ki Lyngdoh sadusi bad ka Sanhedrin ki la aiti ha ki shipai ka Hima Rom ban sahnarphna bad pynїap ia U, ki la bynrap shuh shuh. 

Ki synran bad ma ngi ki riewpaitbah ngi la ngeit ha ki kam jong U bad ngi la buh ka jingkyrmen kaba khraw, phewse ka shu kut noh kumne! Lah lai sngi kynthih ka la їaid mynta bad toi ki la don ki kynthei kiba wan їathuh ba u Jisu u la mihpat te hynrei kim tip haei u don? Ma ngi kiba la ngeit bad kyrmen ha U ngi la kulmar jingmut bad sheptieng. Kata ka jingkyrmen baroh ka la long tang kum ki palong um sabon kiba pra noh ha ka lyer bad ka jingkyrmen ka la long tang ha ka mynhynnin bad ka la leit noh, ki la kren kutlad.

Ha ka lynti їaid u Jisu uba la mihpat u la ailad ia kine arngut ban pynpaw bad ba kin sei lut ia ka jingsngew bynniaw jong ki. Ha kajuh ka por pat u Jisu u tynruh bad ktik ia ka jingmut jingpyrkhat jong ki da kaba sot bad pynkynmaw ia ki halor kaei kaba la thoh ha ka Jingthoh Bakhuid- “Hato kam long kaba donkam ia u Messaiah ban shahshitom ia kine kiei kiei baroh nangta ban rung sha ka burom jong u?” U Messaiah ne u Nongpynim u dei ban shah shitom bad shah їap. U la wan sha ka pyrthei ban mad lang ia ki jingeh, ki jingsuh jingthar bad ki jingdukha kumba ki khunbynriew ki mad. 

Ka jingmihpat u Jisu ka shat phalang ia kawei ka jingshisha, ba hoid ka pyrthei bad ka Hima Rom ki la pynshitom beiῆ bad pynїap ia u Nongpynim hynrei kine ki bor kim lah pat ban pynїap ia ka thymmei saiῆpyrkhat bad ia ki nongrim ka Hima U Blei kiba u Jisu u la seng nongrim, kum ka synshar hok- ka bishar hok, ka jingieit bad jingїalong mar ryngkat. Ki bor ka pyrthei bad Hima Rom ki la pynїap ia ka met u Jisu, hynrei kim shym la lah ban pynduh ne pyndam ia ki kam ba radbah jong U. U Jisu u їai mihpat ha ki kambah jong u, ki synran bad ka Balang ki bteng ia ki kam ba u Jisu u la trei.

Ka jingїaidlynti sha ka shnong Emmaus ka kut ha ka jingїabam miet ha kaba u Kleopas bad u paralok ki la bat bad kyrpad ia u Jisu ban sah miet bad ki- “…ki da ong,To sah bad ngi …Kumta u la leit ban sah bad ki. U la shong bam bad ki, u la shim ia u kpu, bad u la duwai; nangta u la kdiah ia u kpu bad ai ha ki…” Hangta hi la plie ia ki khmat bad ki la ithuh ba u dei u Jisu uba la mihpat bad mar kumta hi u Jisu ruh u la jah noh na ki. Ňiuma, ka khana ka kut kyndit kynsan bad u Jisu u shu jah rngai na ka kamra bam. Lada don ei ei ban pyrkhat ka long ba u Kleopas bad u paralok ki sngewthuh shai ba ki kam kiba khraw kiba u Jisu u la sdang ki dei ban im pat, ka jingїalap ia ka khubor ka Jingieit bad ki kambah kiba ai jingtngen bad ai jingkyrmen ia ki briew ki dei ban їaibteng.

Ka jingmihpat u Jisu Khrist ka dei ka khep kaba kyrpang bad ka pynkynmaw ba ki kam ba radbah jong u Jisu ki їai im bad ki їai mihpat. Kumta ka jingkyrmen ka їaineh la ka long myhynnin ne mynta ne lashai. U Kleopas bad u paralok hadien ba ki la їashem markhmat ia u Jisu uba la mihpat mar mar ki la leit phai sha Jerusalem ban їakynduh biang bad kiwei pat ki synran ban їathuh ha ki ia kaei kaba ki la їohi bad ban pynskhem ba ka jingkyrmen ka dang im bad ka jingkyrmen ka long mynta bad kan long ha ka lashai ruh.

Amen

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15,446 other subscribers

Kyrsoibor Pyrtuh is a pastor interested in intersection between theology and social power

Be First to Comment

    Leave a Reply