Ka Sermon Ha Ki Sngi Ka Khlam Corona

Haba U Jisu u la hiar na ka lieng, bad haba u la iohi ia u paidbah babun, ia ka dohnud jong u la pyndap da ka jingisynei ia ki bad u la pynkhiah ia kito kiba pang”
Mathaios 14 :14

“Phi dei ma phi hi ban ai ei ei ia ki ba kin bam…”
Markos 6:37

Kine ki artylli ki dkhot ba la kdew ha khmat ki pynkynmaw ia ngi ia kawei ka kambah jong u Jisu bad kata ka dei kaba bsa ia ki san hajar ngut kiba thngan. Ka Bible ka iathuh ia ngi ba u Jisu u la leh tang kumba lai phew hynniew tylli ei ei ki kambah ha shilynter ka jingim bad ka mission jong u. Hynrei ka kam kaba khraw ba u Jisu u leh ka long ba u lumlang ia u paidbah bad ai ha u ia ka khubor kaba bha, ka khubor jong ka jingkyrmen. U la lah ban lumlang ia u paidbah ban hikai bad ai mynsiem ia ki ban iakhun bad iaksaid ha ka jingim ha ka hok bad jingshisha. U la lah ban lumlang ia u paidbah bad iatrei lang bad ki ban pynjia long ia ki kambah. Hoid u leh ia ki kambah da kaba pynbna shai kdar ba ngi dei ban kynthup lang ia kiba pang niang thohlieh ha ka imlang sahlang, ym dei ban isih ne niewbein ne ban kyntait ia ki bad u pynkhuid bad pynkhiah ia ki. U Jisu u iarap bad pynkhiah ia kito ki briew ki bym don ka lad ban ioh ia ka jingsumar pang, u briew uba pang iap shilliang lai phew phra snem (Ioanis 5:1-15) uba la duh lad bad duh jingkyrmen namar ba ym don mano mano ruh ban rah ne iarap ia u ban ktah ia ka um kaba khih ha ka pung Bethesda, U Jisu u iarap bad pynkhiah ia u. Ka kam kaba khraw ba u Jisu u leh ka long ba u hikai shaphang ka jingieid bad u ai nam ia ka khubor ba bha jong u da ka Gospel ka Jingieid, ban ieid ia u para marjan kumba ialade. Ban ieid ia u Blei bad ia ki parabriew. Kine ki khana shaphang ki kambah ba la thoh ha ka Bible ki iathuh ia ngi ia kane kawei ka jngshisha ba U Jisu lyngba ki kambah u iakhun pyrshah ia ka jinglong jingman ka koit ka khiah bad ka sumar pang kaba lah shilliang, kaba khanglad ia kiba bun, khamtam ia ki rangli ki juki ban ioh jingiarap bad ka jingkoit jingkhiah ha ka por ba ki donkam. Ki kambah ki iathuh shai ia ngi ba u Jisu u don ha ka liang kiba shah ban bein, ki riewkynthei, ki nuti, ki nongkhrong, ki nongbylla sngi, ki nongrep, ki nongtong dohkha bad ryngkat lang bad u paidabah u leh ia ki kambah kiba ai mynsiem bad ai jingkyrmen.

Ki kambah ba u Jisu u leh ki mih na ka mynsiem ka jingiatip lem. Ka dei ka mynsiem iatip lem kaba pynkha ia ki kambah. Ka mynsiem iatip lem ka sngew lem ia kwei pat, ka pyrkhat lem ia ka jingbit jingbiang jong kiwei. Ka mynsiem iatiplem kam khwan, kam sarong, kam kyreit, kam hanga mei bad kam khun ranab sha lade. Ka mynisem iatip lem ka pynkha ia ka jinglong bad jingim ka ban iabit iabiang lang, ka ban iaimlang iasahlang, ka ban iabam lang iasambynta lang na ka spah mariang bad ka ban ialong maryngkat hakhmat u Blei hakhmat u briew bad hakhmat ka ain.

U Jisu um ngeit ha ka pyrkhat shimet bad ka Balang ha ki sngi kiba nyngkong ruh, hadien ba u Jisu u la kiew sha bneng, ka dei ka kynhun kaba thymmai kaba ieng ha ka nongrim ban iaimlang ban iasahlang, ban iabam lang bad iasam lang ia ki jingbam bad ki jingdon jingem (Kam Apostol 2:43-47).Ryngkat bad u paidbah u Jisu u shakri ban pynbha bad kyntiew ia ka longbriew man briew bad ka Balang ka dei ka kynhun kaba thymmai kaba don ha pyrthei ban shakri, ban ai jingtngen bad ai jingkyrmen. Haba u Jisu u leh ia ki kambah um leh marwei ne um leh ban pynpaw ba u long uba khrawbor. U leh ia ki kambah namar ka por ka dawa bad ban kdew bad iakhun pyrshah ia ka jingduna, ka jingkhwan, ka jingarsap bad ka jinglah shilliang jong ka imlang shalang bad ka synshar khaddar. Ki kambah u Jisu kin ym jia lymda ki paidbah kiba bud ia u ki iashim bynta lang, dei ki paidbah kiba pyntyllun ia u mawkhang jong ka jingtep u Lazarus bad dei ki synran kiba leit wad mano napdeng kita ki san hajar ngut kiba kloi ban iasam lem ia ki jngbam ha uta u paidbah uba thngan. Ki paidbah ki iashim bynta lang ha ki kambah u Jisu.

Ha kane ka por jong ka khlam Corona, ka long ka por kaba jwat bad kaba eh, ym tang ka khlam kaba pyntieng bad pynartatien ia ngi, hynrei ka jingim ka la julor shikatdei, naduh ka trei ka ktah, ka ioh ka kot, ka kamai kajih, ka koit ka khiah bad ka iaid ka ieng, ka shong ka sah kam thikna shuh. Kiba shah ktah jur bad shah pynjulor tam ka jingim ki dei ki nongbylla sngi, ki kup shilliang ki sem shilliang, kiba duk , ki nongrep, ki nongkyndong bad ki briew kiba im kyndoi jakpoh na kti ha ktien (shyntur). Wat lada kane ka khlam bad ka jingkhang shnong ka kut noh kan shim por da ki snem ba kine kin khie im biang bad kin khyllie ia lade na ka jingjulor. Kaei kaba ngi donkam ban leh mynta ka long ban iawan lang kawei kum ki khunbynriew, ym kum ka Jaidbynriew ne ban iaphiah kyrdan la ka jong ka jong, ban iaieng lang kawei ban iada ia ka jingim bad ka kamai kajih bad ka jakpoh bad ban iakyrshan iwei ia iwei ha ka liang ka koit ka khiah bad kiwei de ki bynta. Naduh uba duk haduh uba riewspah, uba nang ba stad uba bieit ba them, uba shong iing paki dulan uba shong ha iing tyrpait ne uba shong wai ha iing lynter, uba lieh uba iong, u greek, u jiw, u jentil, u dkhar u lyngkien, u trai ri trai muluk baroh lang kin ioh ryntih bad mar ryngkat khlem pyniapher, ia ki jingiarap, ki jingsumar pang bad ki lad jingkoit jingkhiah kiba paka. Ngin kyrshan lang ia ki nongtrei nongbylla sngi,ki nongdie madan, ki nonghikai skul, ki nongtrei iing, ki nongtrei kynta, ki nongrep bad ia ki khun samla kiba seng kam lajong kiba im mynta ha ka jingsyier mynsiem kumno ban siew dep ia ka ram ba ki la shim na ki bank na ka bynta ban seng kam. Kiba shong wai kiba la artatien la kin lah ne em ban siew ia ka bai wai iing namar ba ki la duh ka kamai bad bylla sngi, kiba don kiba ha iing kiba pang khyllai, kiba pang cancer, ba pang AIDS bad kiwei kiba shem kordit kumno ban bteng ia ka jingsumar haba kumne ka ioh ka kot bad ka kamai kajih ka la khyllem. Kiba kit ram ban pyndap ia ki jingdonkam ka jingim bad kiba la bynda ia ki jingdon jingem, ka khyndew, ka kper, ka lum, ka khlaw bad ka hali ban kyrshan bai skul ia ki khun kiba leit pule shabar shnong bad ban ioh sumar pang. Ngi donkam ia ki kambah ha kane ka por bad khlem artatien ki kambah kin jia long lada ngi iatreilang bad kiei kiba ngi lah ban leh ki long kumne- (i) ban sam jingbam ei (free ration) ia ki briew kiba duk bad kyrduh na ka bynta ki 8 bad 10 tylli ki bnai ki ban wan bad ki Balang, ki kynhun niam, ki Dorbar Shnong bad ki seng trei mon sngewbha ki lah ban leh ia kane (ii) ba ki trai iing kin map noh ia ka bai wai iing ne bai wai dukan na ka bynta kine khyndiat bnai kiba ki briew ki la duh kamai namar ka jingkhang shnong. (iii) ba ki skul kin ym shim ne kin pynduna ia ka bai skul ha kane ka snem (iv) ba ka Sorkar kan iarap ia ki samla kiba seng kam lajong bad kan shim ia ka jingkit khlieh ban bthah ia ki bank ban map noh ia ka sut bad ban shah ia ki ban siew ia ka ram suki suki katkum ka bor bad jinglah jong ki. (v) ba ka sorkar kan ai jingiarap pisa ia ki nongrep bad ki nongbylla sngi bad ruh ban bthah ia ki bank ban map noh ia ka ram jong ki nongrep bad ki nongbylla sngi kiba shim ram na ka bynta ban kyrshan ia ka rep ka riang bad ki kam ki kti jong ki. (vi) ban thaw lad bad kyrshan pisa kyrpang ia kiba pang khyllai, ba pang cancer, AIDs, Covid19 bad kiwei de ki jingpang kiba eh. Ha kane ka rukom ngin lah ban ia kyrshan iwei ia iwei pat, ban ia khyllie biang ia ka kamai kajih, ka ioh ka kot jong ngi bad ban ia pynim, ban ai jingim bad ai jingkyrmen iwei ia iwei pat.

Ha kum kane ka por ngi kynmaw kyrpang ia ki nongtrei Hospital bad kiba trei ha ki tnat ka koit ka khiah. Ki doctor, ki nurse, ki nongdie dawai, ki nongtrei ha ki PHC, CHC bad ki Hospital naduh ki doctor haduh ki ward maid ki ward boy, ki kong, ki bhai, ki bhen kiba niad kiba sar bad pynkhuid ia ki Hospital ngi duwai kyrpang na ka bynta jong ki. Ki nongtrei Hospital ki don ha madan thma ban iakhun pyrshah ia ka khlam Corona bad ka jingim jong ki ka don hapdeng ka jingma kaba khraw. Ha kine ki khyndiat sngi ba la lah nga ioh ka khubor kaba pynkhia mynsiem na ki paralok doctor kiba trei ha ki Hospital kiba heh bad ba paw ha Ri India ba ki iathuh ia ki jingeh bad jingduna ki tiar iada ialade bad ki lad jingsumar ia ki briew kiba la ngat ha ka jingpang Covid19 bad nga ithuh ruh shibun ngut ki nongtrei Hospital bad nga la ju iadon lang ruh bad ki ha ki por ba ki iakhun ia ki hok jong ki bad nga tip biang biang ia ki jingeh jong ki bad katno tam mynta kumne hapdeng kane ka thma pyrshah ia ka khlam Corona. Ka long ka khubor kaba diaw bad kaba ktah shibun, hynrei kine ki paralok doctor bad ki paralok nongtrei Hospital ki ai mynsiem bad ai jingkyrmen shibun haba ki ong kumne- “ ngi don ha madan thma bad ngi la jied ia kane ka kam bad ngin tur shaphrang bad ngin ym phai dien shuh”. Ngi ai khublei ia phi ki doctor, ki nurse bad ki nongtrei Hospital kiba ieid, ngi burom bad niewkor shibun ia phi bad ngi duwai na ka bynta jong phi ba U Blei Trai Kynrad un da un sumar ia phi.

U Moses bad ki paidbah haba ki la shah khang lynti ha ka duriaw ba saw ha ka jingiaid lynti jong ki sha ka jinglaitluid, ki la lynga bad shaiong, U Moses u la iam bad lynniar bad pan jingiarap hakhmat u Blei, pynban u Blei u jubab ko Moses “balei ba me iam kyang jam ba men ioh jingiarap? khie ong ha ki paidbah ba kin nang iaid shaphrang” ( Exodus 14:15). Ma ngi ruh ngin hap iaid shaphrang ha ka jingim. Niuma, ngim tip sa katno kan neh kane ka jingkhang shnong? Sa katno kan neh kane ka jingthut ka kamai kajih bad jingduh kamai bad jakpoh? Ka khlam lada ka kynjah noh shipor ruh, kam mut pat ba ka jingpang Covid19 kam don shuh? Nalor ba la ban khia lypa ia ngi da ki jingeh, ka jingduk jingkyrduh, ka jinglah shilliang ka ioh ka kot bad jingleh shilliang khmat ha ki bynta bapher jong ka jingim bad ki jingpang kiba bun bad kiba shyrkhei kiba la don lypa ha ka pyrthei, mynta pat sa kane kawei? Tangba ka bym lah long hi ruh ba ngin shu iashong sah kumne hapoh kut, kan poi hi ka por ba sa shisien pat ngin hap ban mih bad krih sha ki kam ki duk, sha ki lyngkha ki hali bad sha ki ophis bad ki factory, ngin hap ban iaksaid bad iakhun bad ka jingim kaba dangsah bad ban aiti pateng ha ki longdien. Ki longdien te kin sa kylli kaei kaba jia bad ka khlam aiu kata kaba bam im ia kane ka pateng jong ngi mynta? Bad ki khun rit, ki pyrsa rit bad para rit jong ngi mynta kiba lui lui ki bym tip ia ka dang ka duh ki shu peit da ki khmat ba lui lui jong ki sha ngi bad sha ka lawei bad da ka jingsngur mynsiem ki khmih lynti ba ngin aiti pateng ha ki ia ka pyrthei kaba khiah krat bad ka mariang kaba khuid. Ki khmih lynti ruh ba ngin pynioh ha ki ia ka ioh ka kot, ka kamai kajih ka bym lah shilliang bad ka imlang sahlang ne ka synshar ka bym leh shilliang.

Ngin nang iaid shaphrang da ka jingngeit bad jingkyrmen. Ki lum kiba dang sah kim long kham eh kim long kham khraw ia kwei kiba la lah bad to ngin ia ong, ai ngin bat ka kti ka jong Me ha ki um ko Trai ba bha. Ka lieng jong ka jingim hateng hateng ka tuid ha ki um kiba jai jai bad ki er batesi kiba beh pangad bad teng teng pat ka lieng ka tuid ruh ha ki umsaw bad ki lat lat. Ngi don mynta ha khmat ka pyrem, ka aiom ka jingsdang ka jingim ba thymmai hadien ka tlang kaba pjah, ba dait thah bad kaba iap; to ngin kyrmen ba kane ka pyrem kaba im, kaba syiad bad ka lyer jong ka kan thang bad beh sha jngai ia ka khlam ka ngoh. Katba ngi dang iaksaid bad iakhun pyrshah ia khlam Corona to ngin bud ryntih ia ki jingpynbeit bad jingbthah ka tnat ka koit ka khiah ban ym ialum bad iamih paidbah, ban sumar bad pynkhuid ialade bad ki shnong ki thaw, ban iarap ialade bad ban ym buh ia kiwei ha ka jingeh lymne ban long ka daw ban pynsaphriang ia ka khlam bad ruh ban ym ibien ne kynshi ne beh shnong iano iano kiba la ngat ha ka jingpang Covid19, hynrei ban wan shakhmat ban iarap bad kyrshan ia ki bad ia kiba ha iing jong ki. Ngi duwai ruh ba ki riewstad kin shem noh ia ki dawai bad ki lad jingsumar ban iada, ban pynim bad pynkhiah ia u khun bynriew na ka khlam Corona bad ruh baroh ngin ioh ia kita ki lada jingiada bad jingsumar.

Ngan pynkut ia kane ka khubor da ki kyntien u Rev Dr J.William Barber Jr. “ u khniang jingpang khlam Corona u hikai ia ngi ba nangne shakhmat ngi dei ban sngewthuh, ba ka hok jong ki briew baroh ban ioh ia koit ka khiah bad ka jingsumar pang ba paka, ba ka bainong bai bylla sngi kaba biang briew bad kaba im , ka ioh kam ioh jam bad ki hok jong ki nongtrei nongbylla kim dei shuh ki mat ne ki ishu jong ki seng ne kynhun kiba don sha ka liang kadiang ne ki left group, hynrei ki dei ki mat kiba kdew kaei kaba dei bad kaei kaba lait bad ki dei ki mat kiba ktah ia ka iap bad ka im jong ngi ki khun bynriew”.

Ngin ia ienglang kawei bad ngin iakhun ia kane ka khlam bad ryngkat lang ngin jop ia kane ka thma.

To ngin sumar bad leh adkar ialade bad U Blei Trai Kynrad un kyrkhu ia ngi baroh.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers

Kyrsoibor Pyrtuh is a pastor interested in intersection between theology and social power

One Comment

  1. A,wanniang
    September 20, 2021
    Reply

    Biang bha phi pynmih khubor kumne ka iarap ia ngi kiba duna ha ka jingtip ia ka ktien u Blei

Leave a Reply