Ka arphew saw tarik u Lber ka dei ka sngi kaba kyrpang kaba la tip kum ka International Day for the Right to Truthbad ka dei ruh ka lyngkhuh sngi їap jong u Bishop Oscar Romero. Kumta ngan pynkut ia kane ka puson da ki kyntien jong u Bishop Romero kiba ong-
“Їa U Blei ngi lah ban shem ha ki jaka bad ki khep ba don ka jingsynshar bad jingbishar hok bad ngi lah ruh ban їashem ia U ha ka lynti ka jingshisha”
Ka Kitab Eksodus bad ki khana kiba don ha ka kim dei shuh kiba dang thymmai, la ïai ïathuh-ïai pynshai shynna ia ki na kawei ka por sha kawei pat bad yn sa nang ïai pule bad ïai ïathuhkhana ha ki juk ki ban sa wan. Ka Kitab Eksodus ka don ka khubor kaba khlaiῆ bad khraw ym tang ia ka jingim briew shimet, hynrei khamtam eh ia ki kynhun jaitbynriew ne ki kynhun briew kiba ïaid lyngba ka lawar ding jong ka jingshah khῆoit beiῆ. Ka kitab Eksodus ka long ka nongmuna ia ki jaitbynriew ne ki kynhun briew kiba ïeng ban ïakhun pyrshah ia ka jingthombor, jingleh shilliang bad jingleh bymhok jong kiba donbor. Kiba bun ki jaitbynriew ne ki kynhun briew ha ka pyrthei ki la pyndonkam ia ka khubor bad ki khana jong ka kitab Exodus na ka bynta ban ïakhun bad ïaleh ban ioh ka jinglaitluid.
Ha kane ka Baibl Sunday ki kyntien jingkyrmen ki long aiu ka Baibl Ka Kren. Ka Baibl ka dei ka kotbah bad ka kot bakhuid kaba wat ki bym ngeit khristan ruh ki sngewtynnad ban pule ia ka. Lehse don kiba pyrkhat ba ka Baibl kam don khubor shuh bad kam don ei ei shuh ban hikai. Kajuh shi kajuh ki briew ki la pule ia ka mynta la palat hajar snem bad lehse ka la rngat ki pasoh bad jor jinghikai. Hynrei ka Baibl ka don ki kyntien kiba im bad kiba ai jingkyrmen, bad ki briew na ka pateng sha ka pateng ki Ïai pynlong ia ka Baibl ba kan kren.
Mynta ka sngi ngin pule ia ka jingrwai Salm ba Sawphew (40) bad ka Khasi- CL Version ka pyndonkam da kine ki kyntien ha ka Salm 40:3, “U hikai ia nga ban rwai ia ka jingrwai bathymmai”, katba ha ka Khasi OV (Reference) pat la pyndonkam da ki kyntien, “Bad U la buh ia ka jingrwai bathymmai ha ka shyntur jong nga”. Niuma, ngin ym iatai hangne ia ka rukom pynkylla ktien, hynrei ngin pule ia kane ka jingrwai Salm bad pyndei ia ka bad ka por ba ngi im.
Ka Ri India ka la kynjoh 73 (hynniewphew lai) snem ka rta naduh ba la ioh ia ka jinglaitluid na ka Sorkar Bilat. Ngi niewkor shikatdei ia kane ka jinglaitluid bad ha kajuh ka por pat ngi syier bad artatien iohba ha kane ka juk ka jinglaitluid ka dei tang ka pushara ia ka shynrong maw jingtep? Kan sah kynmaw ruh ba ngi rakhe ia ka Sngi Laitluid hapdeng ka khlam bad ka dei ka jingkit kaba khia tam ban khyllie pat ia ka Ri na ka jingpynjot jong ka khlam.
Ka snem 2020 ruh ka dei ka ‘nemsniew namar ka khlam corona bad sa katno tylli ki snem kin nangsniew nangne shakhmat? Tang mar ia sdang ban pur ka khlam ha ka Jylla, ngi la pyrkhat beit tang ia ka jingduh bad jingiap. Mano ban iap? La sngew ngiew shisha, la kum kato ka por ba jia ka khlam ha Nongkyrdan hyndai kaba i bah S.J Duncan i pynpaw kumne, “Jar jar! Wow! la kynjah ka shnong ka thaw. Ka shnong nongiap ki ong.La tieng ki briew. Balei ka jia kumne?..ki dwar, thliew iing ki ang, ki sah rynghang Mano pat ban khyrdep? Mano ban khang…?
Mynta kumne ngi don hapdeng ka khlam bad ka khlam ka la pynjot bad pynjulor ia ka jingim. Kumta ka jingkhot ia ngi ka long ym tang ba ngin ia duwai lang, hynrei ban iakhun, ban iaksaid bad iatreilang para shnong para thaw, para kher para mer bad ruh u Blei un iatreilang bad ngi ba na kane ka khlam kan mih ka pyrthei-mariang kaba thymmai- ka pyrthei kaba shngain bad kaba khiah krat ; ka pyrthei kaba dap kyrhai, ka pyrthei kaba ia ieid, ia niewkor bad ia burom kylliang iwei ia iwei pat bad kan mih ruh ka imlang sahlang ka bym lah shilliang bad ka bym leh shilliang khmat bad kaba ialong mar ryngkat ha khmat u Blei ha khmat u briew.
U Blei un kyrkhu ia phi baroh
Kaei ka jingmut jong ka Good Friday ha kine ki sngi ba lynshop ka khlam? Sngap ia ka Sermon U Rev. Kyrsoibor Pyrtuh.
U Jisu U La Jan Wan?
Ka jingwan arsien u Jisu Khrist watla ka dei ka mat kaba iakren tang hapoh ka jylli Khristan pynban ki don ki khep ba ka ktah ia ka imlang-sahlang, ia ka jingiadei shi iing shi sem ne para marjan ne para shnong bad ka wanrah ia ka jingpait iing bad pait Balang. Katkum ka Bible, ha ki sngi kiba nyngkong jong ka Balang Khristan ki bangeit ha u Jisu ki ap khmih lynti ba kata ka iia bad ka jingwan arsien kan jia noh ha ka pateng jong ki hi.
Share this: